ENG KAN TI TA NGE NI LE

Kristian zaah za ni tawh mah suh ila, Kristian ram tia hriat kan ni a. Pawn lam aṭanga thlir chuan Kristian zia ni awm a lang chu- inremna, inhmangaihna, inlainat tawnna, adt hi an ni a. Chhung lamah erawh chuan chumi letling hlauh chu kan ni thung em ni? Chawhmeh sema kan inpuih dual dual te hi sawi vul chuk mah ila, a lehlam a lo lang chhuak leh ṭhin. Insawisak hlum tih te, veng aṭanga inhnawh chhuah tih te hi hman ata tawh a khat tawkin a la ri fo mai.

Kan pi leh pute kha indo mi an ni a, an hmelma lu lak chu hnehnaah ngai ṭhin mah ni se, anmahni khuaah na na na chuan thleng lo se an duh a, dan fel tak an lo duang reng a ni. Kan Hnam Dan Bu (customary law) chang 34-na (Khawtlang mawhphurhna kawng dangte), then 9-naah chuan heti hian kan hmu:

Hman laiin khawtlangah mi hnawksak leh kawhmawh bawl bikte chu, an in leh lovah chuangkai lovin an ensan ṭhin. Thih thua thlan inlaihsak duh loh thleng thlenga ensan erawh a awm ngai lo an lo ti a. Chang 123-na (Kutthlak), ṭhen 2-naah: Miin, nunna atana hlauhawm khawpa mi dang taksa englai pawh a tihnat chuan Hliampui tuar khawpa kutthlak a ni. Hetianga kutthlaktu chu a pawi khawih dan azirin hrem theih a ni tih a ni chauh. An khawtlangah khan mi tihmawh deuh te chu an awm ve a nih hmel a, an hrem mai a ni.

Kan khawtlang sawi lan tawha sawi tel ngei ngei ngai chu tlawmngai pawl hrang hrangte hi an ni awm e. Tangkaina tam tak an nei ang, thilṭha tih lamah chuan mipui pawhin kan thlawp a, kan thlawp zel pawhin a rinawm. Mizote hi tlawmngai nih duha hmanhlel, tlawmngaihna ngaisang em em hnam kan ni. Chu tlawmngaihna chu midang te tana thil ṭha tih duhna a ni ber mai.

Thil ṭha tih kan duh ṭheuh a, thilṭha tih kan duh luat avanga midang tihnat emaw rahbeh hi kan Mizona leh kan kristianna nen a inrem teh ṭeuh lo. A chak zawk kan nih vangtea midang kan rahbeh hian kan chetphung chuan a lian zawk emaw a chak zawk min nih tir lo va, dan chunga lengah pawh min siam hek lo. Nobel Peace Prize hial pawh lo dawng tawh, Dr. Muhammad Yunus-a te hial pawh dan chungah an leng thei lo chu a nih kha.

Indian Constitution han en ila, Article 21-na - Human Rights innghahna tih khawpa pawimawh a awm dim diam, hetiangin:

“Mi tupawh, dan rorelna hmachhuan loh chuan a mimal zalenna chhuh sak tur a ni lo” (let chhuak tak maw!). He dan hnuaiah hian thil tam tak a leng ang a, miin ‘Right to Live’ an ‘enjoy’ na lo tihchhiat sak chu he dan - article 21-na bawhchhiatna a ni ang. The Code of Criminal Procedure, 1973 section 354(3) pawh hian a ṭul tawpkhawkah lo chuan India dan pui hian nunna lak a duh lohzia a ti chiang hle awm e.

Death penalty pek hi a hreh hle.Delhi-a National Law University-in zirchianna a neihah chuan 1947-a zalenna kan sual chhuah aṭanga tun hun thlengin danin death penalty a pek tawh hi 755 an ni a, mihring awm zat nena han chhut pawhin a tam lutuk hran lo. Kum 2012 khan Delhi-a pawngsualna (gangrape) leh tualthahna thubuaiah mi pali chu Zirtawpni tlai dar 5:30 ah a ruala tihhlum an ni a, hei hi hetianga a ruala mi 4 khaihlum vawikhatna a ni. ‘Death penalty’ hian khaihlum chauh a huam lo deuh, India ramah chuan khaihlum leh kahhlum hi tihdan tlangpui niin Criminal Procedure Code hnuaiah chuan khaihlum hi civilian court system a intihhlumna a ni a, sipai lamah erawh The Army Act 1950 hnuaiah khaihlum leh kahhlum hi hman ve ve a ni.

Global Peace Index 2020 chuan Iceland ram chu ram ralmuang berah an thlang a, kum 13 chhung a zawnin he dinhmun hi an hauh tawh a ni. Kum 2017 khan tualthahna registered pali a awm a, a kum leh 2018 ah 1 chauh. Kum 1928 khan ‘death penalty’ chu nuai reh a ni a, chumi achin Iceland danah hmun a chang tawh lo. United Nations Sustainable Development Solutions Network-in World Happiness Report a siamah pawh Iceland hi 4 na an ni reng a ni, a awm viau e (1-na chu Findand an ni, vawi 4 a zawnin an hauh tawh).

Hmun changkang leh mihring hmasawnna apiangah nunna an hlut. Kan damloh pawhin nunna chhan tumin sum kan seng ṭhin. Kan khawtlang tana ṭhatna duhna avangin midang kutthlak a thleng chawk. Vengchhung hnawksak deuh te pawh tun hma deuh chuan hnawhchhuah an ni teh fo a, dan erawh chuan hnawhchhuah phalna min pe lo.

India Danpui a article 19(1)hnuaiah hian ṭhen 7 lai a awm a, a 5-naah chuan India khua leh tui nihna nei zawng zawng chuan India ram chhung khawi hmunah pawh an chen theih thu a lo awm khiau mai. Thuneitu zawk nih vanga mi nunna kan chhahsak hian mi Human Rights chhuhsakna avangin man kan tawk daih thei a ni - IPC section 302 hmang pawhin.

Mi zawng zawng hian thil sual tiin kan famkim lo va, thuruk pawi leh ril tak kan nei maithei, hmachhawn a, siamṭhat a pawimawh a ni. Thil ṭha duh vang leh thil ṭha lo tih chhiat/tih rem duh pawh ni ila, kan thisen lum avanga mi sawisak emaw nunna hial lak te phei chu he khawvel dan bawhchhiatna bakah Pathian pawisawina a tling. (Genesis 4: 9-13).

L.Keivom chuan, “…hnam upa leh naupang tehna chu hriatna, thiamna leh finnaa hnam tawnhriat thuk leh thuk lovah a innghat niin a lang”, a lo ti a. Chanchin Ṭha kan dawnna pawh kum 127 lai a ni tawh a, hnam naupang leh hun hlui zia hi i paih tawh ang u.

Debbie Rinawmi