Ration buhfai man tlawm tak khul sak versus Tui leh Electric bill tihtlem sak
"Politician hi chuan kan retheihna hi advantage-ah an hmang thiam" an tih zawng zawng tidik famkim turin tun lai hian Mizoramah MLA/ Minister hrang hrangin ration buhfai man tlawm tak mai khulsak an intihhmuh a, an tih ṭhat thu hi chu sawi buai theih a ni lo.
Heng mite tho hi kan Tui Bill leh Electric Bill man tihniam theitute an ni a, min tih hniam sak duh si loh chuan mipui min hmangaih vang aiin miretheite hi hming ṭhat phah tuma advantage a min hman ṭangkai an tum a ni daih zawk lo maw?
Politician senior ber pawl pakhat (a hming chu ti lang lem lo ila a ṭha zawk ang) chuan heti hian a sawi e an ti a, "Politician tan chuan lar hrim hrim hi a pawimawh phawt a, kan hming a lo chhe deuh a nih pawhin kan lar chhung chu a hnuah mipui hnenah vote zawn leh a awl tawh. Chuvangin, eng ti zawng pawhin news lama lan tam hi politician tan chuan a ṭha a ni," a ti e, tih hi titinaah hre chiang deuh pakhat hian a sawi tlat.
Chu chu tun hnaiah hian a dikna kan hmu chho zel a, kan MLA/ Minister te hian ngawi rengin damlo pawh an kan thiam tawh lova thla an lakpui zel a, mitthi rala an kalte pawh thla an la zela chu chu an thehdarh leh zel bawk. A ṭhen hi chu anmahni tihdarh duh pawh a ni zozai bik lova, mahse MLA/ Minister zingah social media lama tih darh tur hrim hrima kid nei hi an awm tih chu mi pangngai chin chuan kan hre chiang a ni.
Tichuan tun hnaiah kan MLA (Ruling leh ruling lo) zingah ration buhfai khulhsak a lar ta khawp mai a, mirethei zawkte ration an khulhsak a ni. Heng miretheite ration man tlawm em em hi khulh sak lo se, an Tui Bill te hi free ta zawk se, an Electric Bill an phurrit hi free zawk se a ṭha lo maw? A nih loh pawhin sorkar hian an mipuite rethei ngawih ngawih ration khulhna pawh harsaa an hriat si chuan ration khulh lam ni lovin chhiah hrang hrang te hi ti hniam ta zawk se a ṭha lo maw?
Ration khulh sak duhtute hian mipui hi an rethei tih an hre chiang a, ration man tlawm tawh (nasa taka subsidised tawh a ni) hnu pawhin an lei thei lova hria in an han khulhsak a, an ti ṭha e. Mahse heng miretheite hi an hmangaih tak tak a nih chuan Tui Bill free, Electric Bill Free ta sem, chhiah te hi tihniam ta zawk se miretheite hi an hmangaih tih a hriat theih zawk ngei ang.
Michael Zosangliana