KHAWIAH NGE DAMLO AN DAH - ZMC-AH NGE SRHF-AH?

Kan sawi tura kan luh hmain thuhmahruai ang deuh hlek han nei phawt i la.

Mizoram sawrkarin doctor ni tura zirna in kan neihchhun chu Congress sawrkar hun lai khan Falkawnah bun a ni a, a hming atan Congress sawrkar khan Mizoram Institute of Medical Education & Research (MIMER) a vuah a. Doctor ni tura zirna in reng reng hian zirlaite'n a tak (practical) a an zirna tur damdawiin an neih ngei ngei a ngaih avangin MIMER din a nih hma hian hluihlawn deuhthaw lo ni tawh, State Referral Hospital, Falkawn (SRHF) tura ruahman chu Congress sawrkar bawk hian tharthawh lehin doctor ni tura zirna inin a hman turin State Referral Hospital hi a cheibawl chho a. Zirlaite hman tura pawm tlak ni tura damdawiin cheibawl a nih hnu hian zirna in, MIMER chu a lo piang thei ta a ni.

Kum 2018 State Assembly inthlan kan neih a, MNF-in sawrkarna an chan khan MNF sawrkar hian a tih hmasak pawla a neih chu he zirna in hming thlak hi a ni. Mipuiin a lam tawia "MIMER" tia kan lo hmelhriat tawh chu Zoram Medical College tia rawn thlakin MNF sawrkar chuan he zirna in leh a tel lova zirna in awm thei lo, damdawiin chu an buatsaih hlawhtlin ang dawn dawnin a rik chhuahtir ta hial a, MIMER ni ṭhin ZMC lo ni ta pawh mipui chuan ngaiah kan neih ta a tih theih awm e.

Heng hi a tawi zawnga ZMC leh SRHF lo pian dante a ni a. Tunah chuan kan thupuiah lo lut tawh ila. Zoram Medical College hi zirna in sang dang ang bawkin "college" a ni ve mai a. Mahse college dang ang lo takin an laboratory pui ber chu damdawiin, State Referral Hospital, Falkawn hi a ni mauh mai. He damdawiina damlote damlohna leh doctor zirchhuak tawhte'n an enkawl dante chu an zirlai pawimawh tak mai chauh ni lovin an zir ber a ni a. Chuvangin, damdawiin leh chu damdawiina damlo awmte tel lo chuan college hi a awm thei lo a ni.

Hemi a nih vang hian College leh Hospital hi kan sawi pawlh nawk nawk a, thil thuhmun ni hiala ngaihnate pawh mipuiah a awm niin a lang. Damlo damdawiina dah luhte hi sawrkar hial pawhin, "Zoram Medical College-a dah luh a/an ni," tiin a sawi ṭhin a, mipui tan chuan ZMC hi damdawiin emaw tih mai chu a awl hle ang. College-a dah luhte hi damlo ni lovin zirlai zawk an ni a, damlote chu ZMC-a zirlaite'n inzirna atana an hman, State Referral Hospital, Falkawn (SRHF)-a enkawl tura dah te hi an ni.

Doctor zirna in eng emaw zat hian zirlaite zirna tur damdawiin hi hming hran neihtir lovin zirna in hming an puttir ve mai a. Entirnan, Mizoram aṭanga hnai ber doctor zirna chu Silchar Medical College khu a nih hmel a; khu zirna in khu a hmingpum chu "Silchar Medical College & Hospital" tih a ni. 1968-a din, Silchar Medical College & Hospital hi tunhma chuan Mizote pan ber pakhat a ni ṭhin a, kum eng emaw zat chu Silchar khawpui chhungah khuan a awm nghe nghe a ni.

Silchar Medical College ang khuan doctor zirna in kan neih ve chhun, ZMC hian zirlaite inzirna tur damdawi in hming putpui a neih ve loh avangin Falkawna kan damdawi in neih saw Zoram Medical College han tih ve mai a rem lo va. Saw damdawi in saw din a nih hma aṭang tawha "State Referral Hospital" tih a lo nih tawh avangin hming hran nei a ni a. A nih dan dik takah phei chuan State Referral Hospital, Falkawn behchhanin MIMER kha din a ni a, MIMER a ni emaw, ZMC a ni ta emaw pawh lo ni se, saw damdawi in hming saw ZMC ni lovin State Referral Hospital, Falkawn a ni tih kan hriat a ṭha awm e. A sei teh duah em mai kan ti a nih pawhin referral hospital dang kan neih loh avangin "State Referral Hospital" emaw, "SRF" emaw ti pawhin sawi ta mai ila, a pawiin a rinawm lo.

Falkawna damlo dahna leh enkawlna saw Zoram Medical College a ni lo tih kan hriat a ṭha a. Mizoram sawrkarin a tlin leh ta lo a, doctor zirna hi lo awm leh ta lo pawh ni se la, damdawi in, State Referral Hospital saw chu a awm reng dawn a, chuvangin kan thliar hran thiam pawh hi a pawimawh awm e. Doctor zirnainte hian zirlaite tan damdawiin an nei tel zawk ṭhin a nih laiin keini ramah hi chuan kan damdawi inin zirna in a nei tel zawk niin a lang (a chhan pawh SRHF avangin doctor zirna hi awm thei chauh a ni) a, chuvangin Zoram Medical College hian State Referral Hospital hi a luahlan thiang lo a, a luahlan thei bawk lo a ni. Chuvangin a luhna gate chunga "ZORAM MEDICAL COLLEGE" tih intar kulh pawh saw a dik tawk lo. Doctor zirna in hi a chhuanawm em mai kan ti a, dah chungnun zawk kan duh a nih pawhin "ZORAM MEDICAL COLLEGE & STATE REFERRAL HOSPITAL, FALKAWN" tia damdawi in hming tarlan tel hi sawrkar tih tur niin a lang.

David M. Thangliana