Thlai thar hralh dan rawtna
Kan hma lawkah hian sawrkarin hri lêng dan chah nan inkharkhip uar taka kalpui a tum leh dawn ni awmin an sawi. Inkharkhip a ni emaw, ni lo emaw, kan thlai thar chungchangah hian rawt duh ka nei.
Sawrkar inrawlh ve hial pawh a ṭul maithei a, DLTF leh LLTF ruahmanna chinah pawh a fel thluam maithei - VLTF bawk an pawimawh leh ang.
Tun dinhmunah chuan thingtlang khawi khua mai pawh hian thlai kan thar a, kum dang aiin a tihralna a vang. Kumin inkharkhip ṭan rual khan khanghu veh a hun a, thingthupui a chawrno va, ṭhenkhat chuan an huan zau pui puiah thingthupui an ching khat a ni. Chingit pawh lâk a hun daih tawh. Khaw hrang hranga huan lo nghet nei, kum danga an tihral anga tiral thei tawh si lo, LTF ruahmannaa 'luanchhuah' program buatsaiha pe ta ṭawk ṭawk mai khaw hrang hrangah ka hre nuk.
An thilphalna vang te a nih rualin an pek mai loh chuan a chang mai dawn a ni. Mi lakah uiin lang lo mah se, kum danga ni tin cheng 500 - 1000, a hunlaia a sangbi aṭanga a singbi an lakluh vena, naupang admission leh sikul uniform man tur an tuak ve ṭhinna ber a ni.
Ka hmuh phak ve chinah theihai rah ngah tak, Sumo service se khar chhawng hnena hralh chur chur thei khan a hralh ta miah lo va, a hman hmanin an lawhsak chung pawhin a kungah a hmin a, a tla ṭawih tiar tuar mai.
LTF (district level aṭanga village level) leh YMA lam hian hma la se, khua leh khua hi a in chawm theih loh hial maw? Kumina thingtlanga theihai kan ei sen loh lai khan Aizawla kan chhungte chuan theihai vanzia te, a tozia te min rawn hrilh a. Keinin tunah fanghma leh anṭam, maian te ṭhenawmte pek ve zel kan tum a, thingtlangah chuan kan lo intodelh ve vek si. Keimahni kal ngai lovin khawpui min thlunzawm saktu kan mamawh ta a nih hi.
Entir nan, Sihfa khian thlai an ngah deuh a, Aizawla veng lian Ramhlun N emaw an tuam ang. Pangzawl hi chuan kan thar tlem deuh a, veng tê deuh kan tuam ang. A ṭul chuan khaw hnih khaw thumin veng khat pawh kan tuam mai ang. Mahse kan thlai leitu turte khan an duh an thlang zau thei lutuk bik lo vang. An dawr khuaten an thar ang ang zinga mi kha an lei a ngai mai dawn a ni.
Veng tinah chawhmeh zuar leh kharchhawng ṭhang an awm ang a. Anhnah tèl leh chheh zei nuho an awm zel ang. YMA/LTF lamin thawhpui thiam se, an hah man te pawh an hlawh ve ang chu. Hei hian kharchhawng hlawk uchuak, thingtlang aṭanga a tlawma la, khawpuia tito leh vak ṭhin kha a veng bawk ang a, a leitu tan a tlawm bawk ang.
Thingtlang lam hian ropui takin 'thilpek'-ah Mizona kan lantir mek va. Chhunzawm duh pawl an awm nual ang. Entir nan, "Ka samṭawk hi kg 10 hi chuan duh leh man nei ve sela, a bak kg 2 hi chu a mamawh hnenah lo sem ve mai rawh u" ti te, "Hei tê hi a rem rem eiah ka lo vawm ve mai mai ang e," ti duh kan awm reng dawn. Khawpuiah pawh chutiang mamawh chu an awm ve leh chiah ang. Hmel inhre tawn lovin, Mizo pa leh Mizo nauten chawhmeh kan insuah a ni mai!
Thingtlang tam taka VLTF te chuan he thil hi Aizawl (emaw khawpui dang) nena hri inkai pherhna tura kan ngaih theih avangin harsat hmel kan ti deuh maithei. Mahse driver-te hi VC rest house emaw, sikul ruak emaw hmun dang remchanga in-kuaran hreh lo an awm nual ang.
Khawpuiah driver hnathawk châk, tlan chhuahna tur hre lo an tam. Kan thingtlang tlangvalte pawhin hei hi chu an zuam ve zek zek hian ka ring ve bawk e!
Lalrotluanga