RAMRI BUAI CHUNGCHANG LEH SOCIAL MEDIA
Tunlai hian ramri buai kaihhnawiha thinrim inhrikthlakna thu bawraw tak tak social media-ah hmuh tur a tam hle a. Sawrkar hmalakna duhkhawp lohna thu leh, diriam taka sawrkar dawihzepzia auchhuahpuina thu bakah, tharum leh thisenchhuah pawisak lohna lam hawi hmuh tur a tam hle bawk. Ralthuam nena inhmelma beih mai kan sawi mawi nasa a nih hi!
Kan thinrim chhan hi chu a hriat thiam theih viau. Hei leh chen ramri chungchangah kan buai tawh laiin, tu sawrkar mah hian ramri hi tihtakzetin an la buaipui lo niin a lang. Chutih laiin ṭhenawm state an viak a ṭha a, tharum nen min nek sek mai si a, ram hmangaihtu tan chuan a thanat thlak em bawk a ni!
Mahse, ka’n ti teh ang. Tuna kan buaipui ang luai luai leh, kan thinrim insawh ṭawngkam tam tak hi chu kan ti lutuk mah mah em aw, ka ti deuh.
1. Tharum thawh kan sawi mawi mah mah: Tharum thawha thisen chhuah zawnga thazat lutuk hi Lal Isua zirtirna nen a inrem lo. Thuthlung thar zirtirna pumpui thlir hian, Isua ringtute tan thisen chhuah leh nunna la zawnga tharum thawh hi infuihna chi niin lang lo. Lal Isuan, “Khandaih ruaitute zawng zawng chu khandaih vekah an thi dawn si a,” a ti a (Mt 26: 52). Chuvangin, tharum thawh chaka kan inhrosa vak vak hi a Pathian thu lo riau.
2. Sawrkar hruaitute kan hruai sual thei: ‘Dawizep sawrkar’ tia kan diriam vak vak hian a ni lo zawngin kan fuih khaw lo thei. Naupang, insual rilru pawh pu lem lo, fuihpawrh vanga pawng ta thar thar kan ang deuh. Thil awmdan uluk taka thlir chunga sawrkarin hma a la a nih chuan thuhran; chuti ni lo va, fuihpawrh vanga insual ngam ta viau anga a lan chuan, a tihsualah kan tel ve tihna a ni ang. Sawrkar hruaitute hian media pressure hi rilru fim takin thlifim thiam se kan ti hle mai.
3. Inkah hi ramri buai chinfelna a ni lo: Inkah chiam vangin ramri a fel ngawt lo ang. Ramri chu dawhkan kil hova sawifel chi a ni zawk. Political platform-a hmalakna mumal awm lo va, buaina hmanga chinfel ṭha dawn riau va ngaih hi a Pathian thu lo hlein a lang zawk. Ramri buaina chinfel kawngah hian sawrkar hi pen chak deuh se kan va ti em!
4. Rilru piangsual thei lakah inven a ṭul: Ram leh hnam hmangaih hi a ṭha e. Nimahsela kalsualpui theih tak a ni. German pa Hitlera kha ram hmangaih rum rut mi a ni. Indopui I-naa German tlawm kha a tha a na ngawih ngawih mai a. German hnam chu chi ṭha bik nia lantirin, ram hmangaihna thlarau-ah German mipui a khalh lut a. German kristiante pawhin an zawm dual mai a ni. Chi ṭha lo nia a lantir Juda ho chu kristiante chuan an hnualsuat ve ta a, Kohhran zinga an tel pawh phal lovin, an inkhawmna aṭangin an hnawtchhuak hial ṭhin a ni.
Hitlera a kal uchuak tial tial a. Khawvela insuatna rapthlak ber tih ngam a lo thleng ta! A zirtirna do let turin German kristianten chakna an nei tawh lo va, Hitlera thil tih sualah khan an tel ve tlat tawh zawk a ni.
Hetih lai hian Dietrich Bonhoeffer erawh Pathian thutakah a ding nghet tlat a. Hnam a hmangaih loh vang ni lovin, Hitlera kalphung chu Pathian thu nen a inmil lo tiin a dodal tlat a, Confessing Church a lo pian phah ta a. A tawpah phei chuan a martar zui ta nghe nghe a nih kha.
Kan tunlai boruakah hian ram hmangaih chu a ṭha e. Amaherawhchu, tharum thawh leh thisen chhuah tur zawnga infuih chiam chiam a, thu buluk tak tak phuhchhuah fo hi a dik theiin a lang lo! Heti zawnga kan kal thui lutuk chuan chanchin ṭha zirtirna laipui aṭangin kan peng thui lutuk palh ang a, Pathian kan tivui ang tih a hlauhawm hlel lo ve. Kan sipaiten theihtawp chuahin ram venhim hna thawk zel se.
Sawrkarin a theih chen chenah inremna dawhkan kila chinfel tum bawk se la. Mipui erawh kan kamchhuak te i fimkhur tlang ang u. “Thu ṭha lo reng in kaan chhuak suh se,” tih a nih kha (Eph 4:29).
Rev. Lalrintluanga