Wake up Call

Engpawhnise, tun ṭum lockdown hi han zo se. Kan sorkar pawhin tih tak meuhvin, tih tak meuhvin kan economic siamṭhat hna hi in sawrbing se a hun ta a nih hi.

Tun dinhmunah chuan contract ther­hlo te te sem, step rem contract, electric supply etc thil ṭul lo hi chu stop vek rih se.

Kan potential neihna, production kan neih theihna, sumpai kan hailuh theihna tur economic activity lamah insawng bing a ngai a, kum 3-5 chhung chu helam hi buaipui char char phawt a ngai a ni.

Tin, hruaitu ṭha chuan mipui aiin mipuite mamawh chu a hre zawk tur a ni. A bikin Covid vanga kan buai zual lai phei chuan eizawnna hi kan ngai pawimawh hle tur a ni.

Kan sorkarna chelh mektu MNF sorkar pawh hian thil ṭul lo leh holam mai maia sorkar an kalpui reng a nih vaih chuan ram hmangaihna nei lo tih hial tlak an ni ang. Nakinah tuna kan kalphung leh hun tawnin a zir loh vanga a sawp a nasap viau hnuah kan la thlir kir ang a, thil ṭul hmasa ni loa sum kan lo sen ṭeuhna te pawh hailan a ni ang a, a pawi dan a thuah hnih viau a dawn a, chutih hunah chuan inchhirin awmzia a nei pha tawh bawk lo ang.

Industry awm lo, factory awm lo, income tax pe bawk si lo, vaiho chhiah pek khawm saa nung, central chawmhlawm min ti a, ringlo miten min deusawh mek lai hian ngaihtuahna thar i hmang teh ang u.

Entirna pakhat sawi ang. Kan sorkar hian central lama an ṭangkaipui mek entawnin mahni a eizawnna daptute (entrepreneurs) ten dahkham leh gua­rantor ngai loa loan lak theihna scheme, CGTMSE leh PM SVANidhi te hi ṭangkai taka kan hman theih nan kalpuiin ngai pawimawh (prirority) pe se. Sum tam tak senna contract hna sem leh construction lam chu loh theih loh chauh thawkin titawp ngam se.

Party worker-te sum siamna pek zel hi development a ni lo bawk.

Hri a leng emaw leng lo emaw kan tual chhung thilchhuak leh tharchhuah pro­mote zawnga kal a hun ngawih ngawih tawh a ni tawp mai. Chutianga hma la tur chuan Entre­preneurship Development chak taka kalpui mai bakah enterprise creation siam a ngai. Ruahmanna mumal - roadmap siam a hun tak zet a ni. Hei hi wake up call a ni.

Joseph L. Ralte