Kut hnathawktu leh sawrkar inkarah middle man awm lo se

Sawrkar kan tih leh kut hnathawktute hi tangho leh inzawm tlat an ni a. Ram intodelhna leh hmasawnnate, National Income kan tihte hi kut hnathawktute thawh chhuah tlem leh tamah a innghat a, an thawhho ṭhat a pawimawh.

Indian economic kan zir ve lai khan kan loneitute changkan theih lohna chu middle man (laitla) vang a ni. Loneitute thawhchhuah leh sawngbawlnaah hian Middle man in a hlawkna an hui zova, loneitute an rethei. "A ba in an piang a, a ba in an thi," (Our farmer born in debt died in debt) an ti!

Leilet lam hi han chhuibing lawk ila. Leilet hi kum 58 ka enkawl tawh a. Zau tinah hian committee nghet tak - FMC, AMFU etc. kan nei

ṭheuh a. Sawrkarin Agri Dept, Minor Irrigation Dept etc min enkawl a, Link Road laih te, Tuikhuah, thlai chi/ ṭiak sem te a ni ṭhin. Heng atan hian sawrkarin contractor/ supplier te, rorel lai party campaigner leh chhungkhat laina hnaiten an thawk a. Loneitu committee te hriat lohin sub-contractor-ah te pek a niin sawrkar department-te sub-contractor-ah an ṭang bawk a. Department enpuitu tur chu contractor-te an ni tlat ṭhin. Hna thawhna sum ber kha hnathawhna hmun thleng a tlem lutuk ṭhin a, vawikhat phei chu CM-in, "development sum 25 % tal hian hna thawk ṭha se," a ti, an ti hial a nih kha.

Ṭum khat chu Buffaco sum tih lai khan, "In zau meidum-ah sum a tam a, sawrkar-in committee a siam thil sem tur rawn lam ru," min ti a. Kuhva ṭiak 24 ṭheuh kan dawng a. Kolasib DC-in Committee an ṭha lo tiin a ṭhiat a. 2nd phase atan a din thar a. Kei pawh member-ah min dah a. Mahse, rei lote-ah, "2nd phase sum a awm lo," an ti a, kan tawp der. Leilet siam nan a sum hmang lovin, sum siam nan leilet kan hmang ta a ni awm e kan ti ta mai mai a. Hemi hunlai vel hian leibat tuilian chim tlangram sazu seh zawh te tan ṭanpuina dil theih an ti a. Kan dil a, kan zaua mi pakhat Pu Kapa chuan Rs. 250 a hmu an tia, a dang a awm lo.

NLUP pawh hi a ṭhatna chu Development sum kut hnathawktu a thleng ṭha hi a ni. Mahse, hetah pawh hian Party mi leh sa hi Middle man-ah an ṭang em ni a tih theih. Kan hmabakah NEDP emaw SEDP emaw pawh hmang dawn ila, laitla (middle man) awm lo se.

Tichuan, kut hnathawktu intelkhawm AMFU, FMC, huan neitu, ran vulhtu, thil­siamtu intelkhawm committee kutah hian a theih chin chin chu sum pek nise. An nin thiam takin hnatlang te siamin enkawl se. Department concerned (neitu) official ten ṭhahnem ngai takin enkawl­puiin kaihruai se a ṭhat a rinawm. Assam hunlaia leilet tam tak siam theihna pawh hetiang hi niin a hriat.

Chutianga kut hnathawktu hlawm hrang hrang leh leilet lo neih zau hrang hrang committee-te rinpui bera an ṭan dawn chuan sawrkarah committee tinte Co-operative Society Act 2005 hnuaiah in Register ṭheuh sela. Co-operative hotuten dan leh dun hmangin an kaihruai ang a, thawk dik lo suspend leh thawk ṭha lo desolve (tih tawp) te pawh a ṭul chuan tih nise. Khawtlang development sum te pawh hi Party VC kut-ah dah lovin Society-in thawk se.

Co-operative Society-ah chuan eng party pawh, sawrkar hnathawk pawh member an ni thei a. Mithiam, mi vengva leh neinungte pawhin khawtlang leh ram tan an thawk thei a, a ngelnghet bik a ni. Kan mi chinchang hriaten America Pilgrim Father tih te, Europe ram tam tak, Japan, Korea, Israel etc. dinchhuahna pawh Cooperative Society ang chi a ni an ti a. Kan ram leh hnam tana remchang siam thiam an awm a rinawm. Sawrkar thar 2018-ah chuan middle man awm lava, Cooperative Society hmanga kut hnathawktute chawikan dan duan chhuah a ṭhat a rinawm.

Kan kut hnathawktute ber an pachhiat reng mai hi i phal lo ang u. Zoram mi tlemte tan hian leileh theih zawng kan leh chuan ei leh barah na na na chuan kan intodelh thei kan ti fo sia. Hetianga kan tih chuan huan neih, ran vulh leh thil siam lamah hmasawnna a ni thei ang.

V.L. Nghaka