Lockdown hi ti zawng hian ngaihtuah ve thung ang

Lockdown duh ngawih ngawih hi thlabi hlawh kiam miah lo an nih kher loh pawhin nitin eichawp zawng chu an ni lo tlang­pui. Hripui kai duh vek chu kan ni ang. 

Lockdown duhte hian, sawrkar puan kher lovin mahni in an inkharkhip thei em? Theih awm tak, sawrkarin lockdown a puan hian veng bil task force ten eichawp lam hun an siamah chhungkaw khat aṭangin mamawh zual lamin fimkhur takin kan chhuak a, a bak kan inkharkhip tlangpui. Chuti a nih chuan natna benvawn nei, chhungkuaah tar leh upa high risk group neite chuan lockdown kher lovin mahni inkharkhip se, Lockdown laia mamawh an lam zawk ang thoin khawsa ta mai se, inleng leh fee neuh neuh, kohhran thawhlawm khawn thlengin an duh loh chuan tlawh pawh an duh loh thu tar mai se. 

Lockdown kher loh chuan pisa kai a ngai si alawm, an tih pawhin sawrkar hian lockdown a sawrkar hnathawk chawlh leh sumdawnna chawlh tir ṭhuap ai chuan chung mite chu hlawh kiam lo pawhin pisa chawlh pe se - chawlh vek ai chuan a la hlawk pui tho ang.

Nitin eichawp zawng, hnathawh mamawh hrileng karah eitur dap ngaite hi lockdown hnan vek tawh lo ila, lockdown duh chu mahni a inkhar­khip mai theih a ni. 

Mi dang zawng zawng nena inkharkhip duh tlat, midang tawrhna thlen tel hi pumpelh dan zawn a ngai ta. Hnuchhuina atan leh a zual nasa tur ven nan kar khat te hi chu harsa tak pawhin a tih nawk nawk theih, a aia rei hi chu pumpelh zawn hram a va ṭha tawh em. 

Hnam upa zawk leh ram dang, hmun dangah pawh an tuar, an thih pui, mahse nunphung pangngai an kalpui a, a duh chu an inkharkhip mai. 

Buhfai ngawr ngawr hi a ni lo, a bak chawi tur, inluah man, tui bill, electric bill, a tam lutuk, sawrkar hnathawk awm lohna chhungkua te hi heng bill te hi ngaih­hna­thiam thei ila, chutiang ti turin kan sawrkar hi a pachhe deuh si em? 

Hri kai hi hmun dang angin tamin, a natna lang chhuak te hi nasa in, thihpui te hi hmun dang ang maiin tam ve ila ka tihna a ni lo. Keini kan nih bik vanga fihlim viau bik turah in ngai lo ila, engemaw chen hi chu midangte leh ramdang te tawrh chen hi tuar ve thei kan ni tih hi rilru-ah pawm thiam ila. Chu mi rilru pu chung chuan he hripui do kawngah rahbi thar pen zir a va ngai em.