WEL COME - 2018

Thu kamkeuna: Hringfate khawvelah hian tumah hi inhmusit thei zia zang kan lo awm lo; a hnuhnung ber pawh a hmasa berah a ṭan theih a, tuna dinhmun sâng tak chelha kan mi ngaihsan te ngei pawh hi khutah an la awm thei asin. Khuta mite hi, khitah an la awm ve thei bawk a, a tu amah hi in hmusita in hnuaichhiah ngawt chi a lo ni lo - kan khualzinna ramah hian.

Kum a thar ta: Kumin chu kum dang ang lo takin, kumthar ni-ah ni chhuak hmel hmu lo vin, khawdur duhawm lovin min tuam a, kum ralmuang duhawm a ni lo va, Pathian ṭihna nena hmachhawn ngai chi, kum duhawm ni tura chhung tin tena kan hman fimkhur tlan a ṭha hle ang.

Hmasawn tumna nen lo chuan kum hi chhiar liam ngawt a rem ngai lo va. Kum 2017 liam ta kha, kan kum chhiat kum a nih deuh paw'n; kum 2018 hi kan malsawm dawn kumah i chhiar teh ang u hmiang i. Kum thar hian malsawmna chhung tin teah her chhuah pui ṭheuh se, tih hi mi tin te-ah ka duh tak zet a ni.

Shiv Kher-a'n ti hian a lo sawi teh tlat a, "Hnehtute hian thil danglam tak an ti bik lo, an tih dan a danglam mai a ni zawk," tiin. Ka ngaihtuaha ka ngaihtuah leh ṭhin hian a dik a ni. Tihdan danglamin kohhran a siam ṭha a, sorkar danglamin change a thlen a, khawtlang danglamin hriselna a thlen thuizia hre chiangtute vek kan ni miau va. Mahni danglam ngam hmasawnna hian, kan nun leh ram pum kang fai hmasa ṭheuh se, tlem tlemah zia tak a awm tur hi a ni a.

Kum 2018-ah hian: Tar chak lo te, natna ina a run mek te, mahni in lum aia damdawiin khuma nitin hun hmang tam zawk te; nitina ang khat ṭheuhva hring fate chunga rorel ṭhin - thihna ina a run mek lusun chhungkua zawng zawngte tan kum 2018 hi kan kum ṭhat kum lo niin, kan malsawm dawn kum, kan dam ṭhat kum, kan lawm kum leh hlim kum duhawm ber lo ni ṭheuh se, tih hi ka duh tak zet a ni.

I hmangaihna lantir uar rawh: Kan tunlai khawvel thiamna sang tak karah hian, mahni ṭheuhin mahni hmunah kan tlei vek emaw tih tur khawpin kan hlim tawk a; mah se, kan hlimna erawh duhawm aiin huatthlala awm a ni deuh zawk zaw mah ṭhin. Mahni hmun ṭheuhva kan hlimna zawn danah a tawpah mahni vekin a sawhkhawk kan tuar leh a, a tawpah thihna leh manganna, rilru hahna leh phurritin min tlakbuak leh a; khua a var lo hle ṭhin.

Chung te chu tlansanin kum 2018-ah chuan hmangaihna tam nun nen, mahni invawng fel ila, hlim sang chungin mi chhawn uar ila, zahawm dera nung lovin zahawm takin nung mai ila, kan phak tawkah kan neih chhun Pathianina min pek hmangaihna hi sem chhuah i uar ang u - sem chhuah hi pun leh zualna a ni tel si a.

Natna khuma mu te tan i hmangaihna i lantirna hmanga i thiltih kha a tawk a, mite ṭanpui nan tam lua/ tlem lua awm lova i ṭanpuina kha malsawmna rahka a ni asin. Malsawmna hi pek chhuaha pung um lamah teh chi a ni lo va, pek/ luan chhuah tamnaah zawk mahni nun a hlim mai ṭhin.

Beiseina thar nen: Beiseina nei lo tluka mi hlauhawm an awm lo va, beiseina thar neia nitin kawla ni chhuak chhiarte nun erawh a duhawm ber leh lawi si! Beiseina thar nen; kum 2018-ah hian, zirlai kan nihnaah te, kan hnathawhnaah te, kan thiltihna kawng engkimah hlawhchhama kan beidawn hunah hlawhtlinna bul a inṭan fo va, chu chu kan hre lo hle ṭhin mai pawh a. Chumi kawngah te chuan kan harh a ngai. Mi hlawhtling ti-a kan hriat tam zawkte hi, vawi tam lo hlawhchham fo tawh te an ni. Vawiinah hian chung mi te chu hlimin an nui asin.

Inthlan kum: Kan ram hian kawng tam takin Pathian malsawmna kan dawng a, hma kan sawn viau rualin hmasawnna erawh a inkhai rual ṭhaṭhum lo hle.

Kumin 2018 MLA, General Election kan neihna turah te hian, Lalpa mi hriat, a duhzawng ti ṭhin mi te chauh thlang chhuakin; a ṭha lo kan tih te chu huaisen takin kan vote hmangin kan ṭawngṭai chhannaah ngaiin kan peih/ hnawl ngam dawn lo'm ni? Kohhran mite ṭawngṭaina hi a thlawn tur a ni lo vang.

Ram hruaitu tur kan thlannaah hian, Pathian rawn tlangin kohhran mite ṭawngṭaina hian, kohhran leh kan ram tana ṭha lo tur mi te chu kan vote hlu tak hmangin lantir ila, a tu a te pawh ni se kan hnawl fithla ngam tur a ni dawn lo vem ni?! Pathian engkim tithei rawn chungin ram hruaitu, Pathian ruatte hi i thlang chhuak ang u.

Wel Come - 2018: Beiseina nei tawh lo te, natna ina a run mek te, thih ngama nâ damdawi in liana inenkawl mek te tan kan khawvel ni mawi lo ni se, hmalam hun atana beiseina nun min neihtirtu kum ṭha lo ni mawlh se. He khawvelah hian, hausakna avanga nuih tur ni se, ka nui ngai lovang a, hmelṭhat avanga hlim tur ni se - ka hlim ngai tawp lo vang.

Tihsual avanga tluk hlen tur ni se, tho tur ka'n awm nang i. Mahse, hlimin kan nui a, hlimin kan tho va, kan tlu hlen ngai lo vang; kan tho leh ṭhin zawk tur a ni dawn lo'm ni - hringfate hi.

Siamtu'n kan hlim leh tawrh, lungngaih leh ṭah, engkim a phal a, engkim tuar thei tura a din leh a duan a te kan lo ni zawk si! I hringnunah khan i harsatna tawhah beidawngin kun ngai lo la; ni a tla a, a pil hlen ngai lohna leiah hian - kumkhaw daih harsatna a awm chuang si lo va. Chu nun nen, 'Wel Come - 2018' i hmang ho teh ang u hmiang.

LH.Hauheng, Nghilhloh Rûn