Eptu lam chu ni ila...

Mizoram Assembly inthlan kum kan lo thleng leh ta. “Kum 10 danah sorkar a inthlak

ṭhin” tia innghat ringawt ni lo eptu lam kan neih loh chuan kum 10 dana thleng ṭhin hi a thlen loh ṭum a nih theih ka rin avangin kei ‘change’ duh hian eptu lam chu ni ta ila thil ka tih tur point hrang hrang kan chhawp chhuak ve teh ang.

1. NLUP ka copy paste lo ang - Tuna kan eptu pawl lian ber MNF hian NLUP an duh lohzia nasa takin a tirah khan an au chhuahpui a, nimahsela a vawi hnihna atana mawng sawh dawpa an tlak zawn tak hnu khan ngaihtuahna thar an nei a, “NLUP hi Congress chakna hnar a nih vangin NLUP aia pawisa sem tam i tum ang,” ti niawm takin SEDP an han duang ta a, mipui chuan MNF-NLUP an tih sak ta tho tho a ni. He SEDP hi an han sawi chhoh danah phei chuan, “Lekhathiam hna hmu lote tan unemployment allowance thla tin pek a ni ang," an han ti rup mai a, pui tak tur a ni.

He SEDP hi NLUP copy paste ang mai, a pawisa zat leh a kalphung tlem tlem thlak a, a tawpa an tum chu ‘pawisa sem’ tho a nih vangin tlin tumna chi niin ka hre lo.

2. Dik lo ka zawng chhuak ang - Tunah hian Congress hovin intithei taka an sawi ziah chu, “Kan Minis­ter te dik lohna hai chhuah tur an hre lo,” tih lam hawi ṭawng­­kam hi a ni. Sawi nawn leh ṭhin ila MNF hunlai khan Minister te kha an fing tawk lova, langsar tak takin an hmingchhe duh a, tunah chuan Congress Minister te chu an fing kar tawh.

Heti vang hian an felin an thianghlim tih chu a ni lo. Congress Minister-te hian tu contractor leh supplier nge hna an pek tam fal bik? Tu leh tu hi nge pawisa bawm inzen ṭawm? Hna lian an pekte hian eng nge ‘lawmthu sawina’ atan an pek let? Eng chinah nge an inthurual? tih te hi zawn chhuah tum se, hei hi an hai chhuak thei a nih chuan Congress vote paihna tur leh a zawng chhuaktute vote hmuhna tur a ni ang.

3. Chakma politics sawi vul - Seat 40 inchuh tur an nih hi eptu lam hian hre reng se. Tunah hian Cong­ress chuan Chakma seat hnih hi an chan reng avangin Chakna lam hi an sawi dawn lo. Mizorama seat 38 dangah hian in concentrate ngam se, Chakma bial hniha candidate siam lo ngam khawpin ṭan la law law se, tichuan mipui pawh an hip ang.

Tuna YMA leh MZP-te au hla ram leh hnam humhalh lam hawi hian Chakma lam kuangkuang duh lovin thil kal pui se, chu chu campaign au hlaah hmang se an ṭhatpui ka ring. Chakma biala candidate siam ting tang, tling leh si lo, a danga ‘Mizo hlang’ tia auna chance ṭha tichhe vek bawk si ang kha a thlen lohna turin.

4. Kawngpui politics - Mizoramah nikum fur aia kawng­pui a chhiat kha tun hnaiah sawi tur a tam lo. Khang thlakate kha a takin kan la kawl mai bakah tunah pawh siam ṭhat hman loh tam tak a awm dawn. Eptu tan chuan ‘kawngpui’ hi priority-ah dah se, chu chu au hla berah hmang se a fuh ka ring. Kuthnathawktute tih ang reng hi chu inthlan dawn apianga party tin au hla a ni a, a takah eng ruai an thlen pui lo.

Kawngpui hi chu a taka kan hmuh, mi zawng zawng nghawng a nih vangin tun hi au chhuah puina chance ṭha tak a niin ka hria.

Lalremsanga (Marema)