RTPCR KHAWL BUN ṬULNA HRE LO SORKAR!
Lunglei District tan Civil Hospital a RTPCR khawl bun chu tun dinhmunah mamawhna a awm rih lo tiin Mizoram sawrkhar aiawh ukil-in Gauhati High court ah a sawi tih hi thu dik a nih ngai chuan Lunglei district mipuite hi eng vangin nge kan ngawih reng ang a, tihtur nei lo ang maia kan thlir reng ringawt ang le?
Kan sawrkhar hian hripui leng avanga kan tawrhna te, kan manganna leh rumna zawng zawng hi a hre lo em ni, nge hripui avanga mipui engmah tithei lote chunga lal hrawt hi nuam an ti zawk? RTPCR khawl a thlawnin an dawng a, chu pawh chu kum khat aia rei an kawl ta, a bunna tur pindan pawh a thara buatsaih kher lovin tuna room awmsa te hman theiha buatsaih mai tur pawh anmahni tirh expert team ngeiten a awm tih an sawi hnuah, chhuanlam siamin RTPCR khawl bun mai theih a nih loh thu an sawi leh a.
Mi ṭhahnemngaite Court hiala an zualko hnuah engmah ruahmanna pawh awm sa lovin court hmaa hmai phihfaina tur leh mipui bumna tur nge ni zawk, a hmun tur an han laih tir leh chawpchilh a. Khawl bun ṭulna a awm lo an tih si chuan hengte hi engah nge an tih?
Tunah hrilengin min tuam mek a, veng tin kan buai lai leh thihpui hial kan awm chhoh lai hian RTPCR khawl bun ṭulna hre lo sawrkhar kan lo nei a nih chuan a vanduaithlak tak zet a ni. Tunah hian hri a darh nasa ta a, nitin hrikai an pung zel a, test sen loh inringhlel an awm mai dawn a ni. Test result lah chu backlog an ti, beisei angin a chhuah zung zung theih loh chang a awm te hi buaina tham a ni.
Hetiang dinhmuna kan din laia sawrkhar berin RTPCR khawl bun ṭulna a hre lo a nih chuan eng vang nge ni ang?
1. Lunglei mipuite hian hri an la kai tam tawk lo, tun aia nasa fe in hri vei phawt rawh se an tihna a ni thei em?
2. Hri vanga thi an la tlem lutuk, thi zawih zawih phawt rawh se an tihna a ni thei mai em?
3. Hri avanga chhuanchham an la tlem, mipui an la mangang tawk lo, an tihna a ni thei em?
4. Mipui tawrhna hi a let tam fe in pung leh phawt rawh se an tihna em ni?
He sawrkhara mawhphurhna nei, MLA te a bik takin Lunglei District chhunga mite tal hian anmahni vote tlingtute harsatna leh manganna hi an hre lo em ni le? an mipuite tan hian 'aw' han chhuah ngam hram se kan va ti em.
KL Chhawnzauva