Serchhip inthlan result leh 2023

Serchhip bial MLA by-election-a ZPM candidate Pu Lalduhoma a tlin chian em em dan kha kum 2023 MLA inthlan nen hian a inzawm thui hle tih a rin theih.

Kha inthlan result kha Cocid-19 boruak zawkin a hliah avang leh politics sawina boruak a awm loh avangin mumal taka review hi ka la chhiar lo a, mimawl review leh rin dan nen kum 2023 a nghawng theih dan turte thiam ang angin kan ziak ang e.

Serchhip hi chu 'Congress Bial Him' tih ṭhin a ni. Pu Lal Thanhawla kha a tling chho char char a, mahse tlak dawn kum hi chuan a mak ve khawp mai an han che sual khauh zel a. Pu Hawla pawhin bial hnih kha chuh lo se Serchhipah khan tling leh ngei tura a lan laiin mipui zingah ning an lo awm ve bawk nen rin loh takin Serchhip bialah Pu Lalduhoma a tling ta a ni.

Kum 2018 inthlanah khan Pu Duhoma vote 5481, Pu Hawla 5071 leh Pu Ramzauva (MNF) vote 4313 a ni. Mi ṭhenkhatin Pu Duhoma kha MNF candidate Pu Ramzauva vaw chhe tur mai maia ding anga an puh kha a dik lo; Pu Duhoma'n Congress bial him a chhuhsak ta zawk a ni.

MNF-in fair lo taka Pu Duhoma an heka an tlak tir hnuah inthlan ṭhat a ni. Bye-election reng reng chu 'Khawvar hnua inthlan' tih a ni a, MNF pawhin bel chhunga sa tih an chian avangin an duhsak tak an Vice President Pu Vanlalzawma chu Minister ni thei turin kum 2021 bye-election ah chuan an han candidate ta a, mahse MNF an mualpho. Hei hi Pu Zawma mualphona ni lovin MNF mualphona a ni.

Pu Zawma hian ruling an nih hnua, CM leh Minister zawng zawngin intiamna hrang hrang nen an campaign hnuah pawh vote 5319 chiah a hmu thei. Pu Duhoma ve thung chuan vote 8269 a hmu a, Congress lamin Pu Laltlansanga candadate-in vote 2604 an hmu. Pu Duhoma hian vote 49% a hmu phak daih a ni.

MNF lam chuan, "Kum 2018 aiin kan hmu sang zawk tho," tih an han sawi a, hei chu chauh thubarawh a ni. Congress pawh an tlahniam a, MNF chu ruling ni chungin an mualpho va he inthlan ṭhatah hian winner pakhat chiah awmin chu chu ZPM an ni ta a ni.

2018 ah khan ZPM MLA Pu Duhoma kha ZPM Flag, ZPM Symbol leh ZPM hla pui nen a in candidate a, chu chu Serchhip mipuiin an lo thlang tlinga ZPM MLA a ni ngei a, mahse Assembly House lama an ngam loh avangin a paih theih dan zawngin fair lo takin an hek a. MNF in an paih ta a. Chu mi hnua mipui court lamin Pu Duhoma a tlin tir danah hian kum 2023 inthlan tur thui takin a kawk a ni.

MNF chu an sorkar lai reng pawhin an mi hmingṭha leh pa fel Pu Zawma pawh an tlin pui theih tawh loh avangin an tlakna hmahruai atan Serchhip hi a rawn hmang mai tih hi bye-election review ka hmuh dan a ni.

Vanlalrema