Ram hmasawnna kailawn politics

Mizoram hi Lushai Hills tiin 1st April, 1898 khan British awpna hnuaiah a lo piang a. Mizo Lal-te kal tlangin, Circle 18 a ṭhenin rorelna fel tak nen a lo ṭhang chho a. Aizawl chu Capital niin Lunglei chu second capital a ni a, Tlabung chu Trading Centre awmchhun a ni. 1954 ah Lal-ban a ni a, a aiah District Council a lo piang ta. Chumi aṭang chuan Mizo District Council chuan Dan - Acts leh Rules tam tak siam chhuakin rorelna UT kan neih hma zawng a kengkawh ta a. Lal-ban duh pawl Mizo Union chuan District Council-ah thuneihna an chang, chu Council hnuaiah chuan Pu Laldenga pawh Accountant-in a lo thawk tawh ṭhin a ni.

Union Territory-ah ni 21 January, 1972 a hlankai kan ni a, rambuai - Disturbed Area kan nih avangin UT Administration hnuaiah development duh angin a kal tluang thei lo. Mizo mipui leh Kohhrante ngenna avangin Peace Accord ni 30 June, 1986 khan kan lo nei ta. Chumi hnuah state puitlingah ni 22 February, 1987 khan hlan kan ni.

1987 General Elections to Legislative Assembly-ah MNF chuan Ministry a siam a, Pu Laldenga chu Chief Minister hmasa ber niin an party chhungkua buaina avangin kum khat leh thla 9 vel hnuah MNF sorkarna a kehchhe ta. Kum 1989 inthlanpuiah Congress-in sorkarna an rawn siam ve leh ta, Pu Lal Thanhawla chu Chief Miniter rawn niin rambuai kan nih tawh loh avangin development pawh engemaw chen chu tluang takin a kal chho bek bek a, mahse duh anga chakin hmasawnna a awm tawk loh avangin 1998 inthlanpui-ah chuan MNF-in sorkarna an rawn siam ta a. Pu Zoramthanga chu Chief Minister rawn ni chhoin mautam hun lo thleng pawh harsatna awm em em lovin Mizoram chu a kal chho ve zel a. Kum 10 an sawrkar chhungin Mizoram tan thil lian tham development-ah hnutchhiah an neih tlem avangin 2008 inthlanpui chuan Congress NLUP, thiam taka an zawrh chu Mizoram mipui nawlpui, thawk hah lova cheng nuai khat dawn tum mi tam takin an vote avangin hneh takin sorkarna an chang ta. Pu Lal Thanhawla chu Chief Minister niin tun thlengin sorkarna ngelnghet takin an chelh chho ta a ni.

2018 inthlanpui kum kan lo chuang chhuak leh ta. Sorkar dinglai leh kum 10 sorkarna lo siam tawh te’n ‘Mizoram changkan dawrhna tur sector hrang hrangah hmuh tur an siam lo, an mi leh sa, thil titheite chauh vulh lenna bak hmuh tur a awm lo, kan intodelh lo tual tual a, thingtlang chhungkua te’n hmsawnna tluantling an hmu lo’ tih auhla chu opposition party leh sorkarna siam tum party rawn ding chhuak thar chaw tui ber a lo ni ta. Tun dinhmuna party hrang hrang bihchianna han tarlang ila:

Congress- NLUP hi a thawh hnihna kal mekah hian success story han tar chhuah tur an nei tam lutuk lo niin alang, mahni huan thlai, trade lo enkawl mek, mi taima an ṭanpui zui takte hlawhtling erawh an awm nuk mai. Ran vulh, foodstuff, cash crops, vegetables, fruits a pun phah vak lem lo. Silchar aṭangin vegetables lokal pawh a tlak hniam phah chuang lo niin alang. Tun an zawrh mek NEDP- tang te tanpui an tih hi mithiam economic service thiamna hmanga an kalpui mek hian rah ṭha a chhuah ang em tih chu lo thlir zel ila. NLUP hi land survey, soil testing, land classification mumal awm lo, baseline survey mumal awm lova kalpui vang leh party based programme a nih avangin potential areas han indentify awm lo, viable schemes, market oriented schemes lam hawi zawng leh potential persons thlang lova kalpui a nih vang a ni ber ang chu.

Tuna MLA an neihte hi an hausa hlawm a, midang MLA candidate leh tur pawh mi hausa tho an tawkdarh a rinawm. Chu­vangin, crorepati candidates hlir an nih dawn avang leh an party mi leh sa an hlawm

ṭha a, an tawh a la khirh khawp ang. An zu zawrh hi chuan chuti takin a hnuk hniam lo vang. Inthlanpui hun hma daihin an tihtawp a rinawm. An candidate tur awm han thlirlawkin mi hausa an tam hmel a, sorkarna an chang leh a nih chuan Plutocracy - mihausa rorelna bung thar kan chuangkai ṭan ang tih a hlauhawm khawp mai.

MNF- State puitling kan neih hnuah kum sawm chuang ro an rel tawh. An rorel chhung hun hnuhnung lamah hmingchhiatna - ekin kalthei, compensation, Baffacos etc tih velah an hmingchhiat avangin ‘Pathian leh kan ram tan’ bukin an awm, an tling ta lo, Mizoram tan ro tling hnutchhiah an neih hmuh tur a tam lo khawp mai. Tunah an auhla bawk ‘Pathian leh kan ram tan’ tiin SEDP hmathehin an vak kual mek. An hotu ṭhenkhat thusawi, cheng nuai thum chhung tin kan sem ang, a pawisa in kan sem dawn lo, tih vel a inang chiah lo lai awm leh ṭhin leh NEDP an sawi dan pawh a inang chiah lo em ni dawn, mipuiah a tla na vakin a hriat loh. Mithiam rualten idea an thawh khawm an zam chhuak ni mai lo maw? An priority - sector-wise sustainable developments han hlin chhuah tur man fuh a harsa. Voter, a bik takin ṭhalai lam hip tumna a ang deuh mah mah, educated unemployment allowance [B-2.8(v)] pek tum te phei hi chu ‘Graduate thatchhia i siam vak ang aw’ tih lam a hawi em, a practicable dawn chuang em ni?

School kai hun ennawn leh a ni ang [B-3.4(xvii)], han tih te hi helama dodal pawl tih lungawi tumna a ang khawp mai. Tuna mi an lawm luh tam ang hu hian bial him an neih tlem hmel. NEDA hnuaiah hian humhimna an hmuh loh phei chuan an ngaihtuah awm lam deuh a ni. Hei hi anmahni pawhin an hria a ni ang, EVM 2013 inthlanpui khan an lo chhuanlam tawh si a, ballot paper (ballot box hman - tawh loh tur) han sawi mawi leh hian a tichiang thawkhat lo maw! ‘Pathianin a hun tawh a ti’ tih piah lamah hmasawn an mamawh khawp mai.

BJP- An inchhung khurah tui tai put ru a awm. Phailam an pute’n an rawn thlithlai ṭan ta. Tripura, Meghalaya, Nagaland inthlanpui zawhah an kal dan tur chu a hriat ang. Chakma leh Reang tamna western belt - Rajiv Nagar, Tuipuibari - Marpara - Thorang - West Tuipui - Tuichawng - Chawngte - Parva thleng hi an rawn bitum hmasak ber tur niin alang. Pastor senior pakhat pawhin ‘BJP chuan MLA pahnih khat an neih chuan Ministry form turin an rawn lei tling mai ang, Kohhran mi tam tak kan rinawm si lo’ a tih hi Party dang tan inennawnna siamtu ṭha tak a la ni ang.

PRISM- Data leh Statistics awmsa aṭanga Press Release leh Statement ṭha tak tak siam thiam an ni. Sorkarna siam tumin MLA 23 nei thei turah an in ngai. Unit mumal tak an nei tlem, Tun dinhmunah bial him tur an la van hrih. Like-minded Party nen thawh dun lam an hawi dawn nge, a chang changa Press briefing neiha Press Statement siam leh ṭhin mai hi an duhtawk dawn?

MPP- Mizo Peoples Party hi an leader Pu C.Laltanpuia chuan thuthlung ṭha tak mai Mizoram hruaina tur a duang chhuak a, TV lamah pawh ngaihthlak a nuam khawp mai. Han tihlawhtling turin a hrethiam an la tlem deuh, hun lokal zel turah i lo thlir ang.

ZORAMTHAR- Rev. Zaichhawna Hlawndo hian ‘Thuken’ pawimawh tak nen Zoram siamṭhat tumna a nei hi a ngaihsanawm khawp mai. Aizawl leh Lunglei-ah pawh flag nen kawng an zawh, an thu ken erawh ngaihsaktu tun dinhmunah an la tlem deuh.

ZPM- Zoram People’s Movement hi Exodus, ZDF, ZNP, MPC etc. Pawl Inzawmkhawm an ni. An auhla ber chu ‘Mipui sorkar siam’ tih leh Ruling Party - Congress leh MNF Party sorkar hun chhung (kum 30 chuang) hian engmah thil lian tham leh ṭha min hnutchhiah lo, party induhsakna nasa lutuk leh party based sorkar bak an siam lo, tih a ni ber mai. ZPM hian Unit-base in an Party kal an tum lo mai ni lovin ‘Valupa’ rual chu ‘Party Vanguard’ angin an function ang a, mi thiam rual an neihte chu ‘think tank’ group anga function-in next election-ah chuan Mipui Sawrkhar siam an tum a ni.

Sorkarna lo siam tawhte duhtawk lohna sawi ringawt hi chuan thui tak an kal thei dawn em ni? MPF ten nen hian thu khat vua-in ‘Religious-based Movement’ siamin Mizoram Then-Thianghlimna, kawng tin rengah leh ‘Hmasawnna Kailawn’ ngelnghet siam tlang turin an rawn pen chhuak ngam a nih erawh chuan ‘an tum ram - second canaan’ an thleng thei chauh ang.

Tun dinhmunah Exodus laia Mosia kum ang rual pui pui ‘Valupa-ho’ hruaina hnuaiah hian ‘Tuipuisen’ an kan zo meuh dawn em ni le! ‘Where there is unity, there is always victory’ tih changthlanin like-minded people Union an siam thiam a ngai ang. An motto pawh “All-round Developments based on economic, social, political and moral reforms” an kalpui theih chuan kan hnam tluchhe mek hruai chhuak turin kan ‘culture, tradition, patriatism’ vawnghim tur leh ti phuisui chho zel tura in humhalhna an siam thei ang.

CJ Zova Zobawm