Police lamah kan in enfiah a ngai

Vanglaini ni 31-1-2018 chhuak phek hmasa ber headline-ah khan ‘Mizoramin DGP nghet nei rih lo’ tih thupui kha a chuang kuau mai a. A chhung thu han chhiar chian chuan kan Mizo DGP Pu Lalthianghlima IPS chu Manipur-ah a cadre lamah sorkar laipuiin a la kir a, tichuan Mizo a thlak theitu tur direct IPS kan nei lo a lo ni reng mai a. 1995 hnu lam kum 22 zet chu kan Mizo fa IPS inziak tling kan awm tawh lo a lo ni reng mai. Tunah hian Direct IPS chu Mizo pahnih chauh kan nei tawh a lo ni reng a.

‘Zirna lamah kan ṭhang, sikul pawh kan nei ṭha, phai pawh pan a ngai ta meuh lo’ tihte kan sawi fova, tih rualin kan deh chhuah lam hi han thlir ila, central service lamah kan phai telh telh a, kan rama hna ruak angah pawh vai leh hnam dang an tam telh telh mai dawn a nih hi! Tuna a lan dan chuan DGP pawh Mizo fa dik tak chu kum 20 bawr vel chu nei lovin kan awm dawn niin a lang thei ta hial mai.

Kan state sorkar hian State Public Service Commission chhuakte hi a voh mah mah a ni thei em? Dinhmun sang leh ṭha tak takah a hlang kai zung zung a, chuvangin kan naupangte hian hun engemaw ti chhung kha chu Central Service hlutna leh ṭulna hre lovin an awm tir ni theiin a lang tlat. Tin, Ministerial Service a lutte pawh hna sang tak tak thlengin a kaisan tir a, LDC a lutte pawh Secretary thleng hial hialin an kaisang thei a. Chuvangin, kan ṭhalaite hian state chhunga awm reng chungin, fight hah vak pawh ngai lovin IAS etc, post te an thleng thei tho tih an hre si a. A tawpah hna sang tak tak, direct Central Service ngaihna ang chi-ah kan artelukawn ta niin a lang.

Hetiang a nih avang hian kan state sorkar pawh hi a kal danah fimkhur sela, a hnathawkte pawh duhsak tawk nei sela, tihrualin MPSC mi te pawh an hna quota hi, huat thu ni suh se ti tlemin emaw chintawk nei deuh se a ṭha hle ang. Chuti a nih loh chuan kan naupangte hian central service hlutna leh ngaihsanna pawh an nei lo lutuk mai dawn. Confer lah kan uar narawh, kan senior officer zingah hian hming tawpa IPS, IAS han ziak thei hi chu an kuh fur tawh a, mahse Chief Secretary han tling tur meuh erawh zawng an vang leh pharh mai lovang maw le! State service-te kan voh lutuk chhung chuan hma kan sawn thui lo ang tih a hlauhawm.

Sap sikul kan uar a, sap ṭawng kan pawngpaw ngaihsan pawh hi a ṭha lo. Mizo Medium a zir a nih lai kha chuan saptawng thiam tumin sapṭawng lehkhabu hmuh theih ang ang kha an chhiar nasa a, chuvangin central service-ah pawh an inziah tlin phah ṭhin a nih hmel a. Tun lai kan naupangte hi nal tak takin an han ṭawng a, thiam tak takna turin lehkha an chhiar tlem leh si! Chuvangin nu leh pate, ṭhalaite leh kan sorkar ngei pawh hi i inngaihtuah ṭha leh deuh teh ang u.

Patrick Z, Chhingchhip