Kawng siam chungchang...

Ram changkang a piangin kawngpui ṭha an ngaipawimawh a, hmasawnna bul a ni tih an hriat vangte pawh a ni ang. India hmarchhaka state pakhatah kan cheng a, tlangram a nih vang nge kawngpui kan nei ṭha lo viau mai. Prime Minister Narendra Modi-a kaihhruai sorkar nge dem tur ni a, state sorkar zawk? Ram leilungin a zir loh vang leh, state intodelh lo kan nih vang zawk pawh hriatthiam harsa tak a ni.

Assembly Elec­tion a lo hnai leh ta a, sorkarna fawng vuantute pawhin kawngpui siam ṭhat an ngaipawimawh thar leh ta viau mai. Eng hun pawh nise kawngpui ṭha neihna a nih chuan a lawmawm a, sawisel chiam chi lah ni hek lo. Amaherawhchu inthlan dawn hnaih chauha kawngpui siam ṭha ṭhin sorkar tia sawi a nih hunah chuan state dang aiin nasa takin kan lo hnufual tawh ang tih a hlauhawm hle. Kawngpui ṭha kan duh vek a, sorkara thu neitute hlei hlei hian an duhin a rinawm. A siamna tur sum a awm lo nge ni a, thil dangah pawh pen a ni ṭhin tih chu ngaihtuh tham tak a ni.

Harh a hun
Fiamthua an sawi ṭhin, 'Campaign laia an iptepui banna ni si, inthlan zawh hnua kan puin iptepui a ah kan hre ngai lo' an tih san leh ang hi kan ni ang tih a hlauhawm hle.

Vote duh vanga mi hnuaihnung ber thlenga min ngaih­sak em em rual hian, a tam zawk chuan inthlan zawh hnuah hriatzui an hlawh ṭhin lo hi a pawi hle. Veng leh khawtinin hmasawn an duh a, chumi tur chuan kawngpui ṭha chu a pawimawh hmasa a ni. Chumi nei tur chuan ṭanrual a ngai a, party leh mimal hamṭhatna tur thil a leng tur a ni lo.

Khawtlanga ṭan­rual hun a ni a, koh­hran leh pawl bik inrawlhna chi a ni lo. Inthan zawh hnu pawha Minister leh MLA te pawhin an namnul ngam loh tura ṭanrual a ngai a, chu chu hmasawnna tur kawngdik pawh a ni. Veng a ni emaw khua ang pawh nise kwngsiam chungchangah kher hi chuan ṭangrual tlang i la, chu chu kan zavai atana ṭha tur pawh a ni. Mi­puite i harh ang u.

Matea Pa