RSBY leh Mizoram State Health Care Scheme (Sawrkar bultum Health Insurance)

Mizote kan chang­kangin kan vengva chho zel a, a hmaa kan ngaihven lem loh health insurance-te pawh hman ṭangkai dan kan thiam chho ve zel a. Chutih lai chuan mi tam takin kan la ngaihsak tawk lo. A hnuaia inbiakna hi lo en ila

Bial chhung mi: Ka pu, hei kan pa hi cancer a lo ni tih kan hre chhuak thut a, kan harsa si a, khawngaih takin min puih dan a awm thei lo maw?

Minister/ MLA: A nih tak chu maw le. RSBY emaw Health care emawah in in register em?

Bial chhung mi: Nia, a pawi tak tak a ni, a hunlai khan tih nachang kan lo hre lova. Ka pu, tuna tih leh theih dan min zawn pui hram teh.

Minister/ MLA: An hotute kan bia ang e... hello, pi/ pu...., tunah hian rsby leh health care registration kha khar a ni tawh nge a la kal mek? khar ni tawh se tih dan a la awm thei ang em aw?

Health care lam hotute: Sir/ madam, a hun lai a pel tawh a, tunah chuan tih­ngaihna a awm tawh lo, a pawi hle mai.

Minister/ MLA: A nih tak chu maw le. (bial lam lokalte hnenah) a pawi hle mai, a hunlaiin in lo ti si lova, tunah chuan a theih tawh si lova engtin nge kan tih ang aw...

He inbiak kualna hi thil thar a ni lem lo. A tuate tan mah a nuam lo. Minister/ MLA tan nuam hek suh, Health Care hotute tan nuam hek suh, inziak lut lo damlo tan phei chun manganthlak tak a ni.

Hei hi a pumpelh dan a awm. Tunah hian RSBY-a tel thei tur, lehkhathem pek zawng zawngte khan khua/venga thlalak hun an rawn puan/ sawi lo ngai pawi­mawh ula, chhung­kaw kima thlalak ngei tum tur a ni.

RSBY-a tel thei lo, sawrkar aṭanga MR bill thei lo tan pawh Health Care Scheme inziahluh hun hawn a ni ṭan dawn e, mahni veng sub centre leh information thupuan ngaihven ang aw. Damlo thei vek kan ni a, hman ṭangkai i tum ang. Hman ngai lova awm phei chu thil lawmawm tak a ni ang; chhungkua kan hrisel tihna. Chumai bakah i va insure-na hmang khan kal buai ngai lovin mi damlo i lo kan reng a ni bawk dawn asin! Chhiatni fund kan thawh vek, hmang ṭangkaitu nih kan duh lo vek ang deuh hi a ni thei ang chu. I motor i insure theih chuan i hriselna insure chu mi pangngai tih tur a nih hmel e.

RSBY leh Health Care Scheme enrol­ment/ registra­tion hawn a ni thuai dawn e. February ni 12 aṭanga May ni 31 thleng mahni awmna veng health sub centre-ah zawh fiah leh inziah luh theih a ni ang. MLA/ MDC/ Councillor/ VC/ LC-te pawhin mahni bial ṭheuhah ṭan la turin kan in ngen e.

Dr Para