MBKHP THUCHHUAK

Mizoram Baptist Koh­hran Hmeichhe Pawl (MBKHP) inkhawmpui lian chu Lunglawn-ah zawh fel a ni ta a, Zir­tawpni-a Rorel vawi 68-naah palai 566 an tel. An thuchhuak zingah inkhawmpui thlengtu/ dawltu bial ṭanpuina atan MBKHP aṭangin kum tin, cheng nuai thum dah ṭhin ni se, inkhawmpui ṭanpuina atan BKHP member tinin kum tin, Rs 20 zel thawh ṭhin ni se tih a tel a, hei hian beng a verh hle mai. MBKHP inkhawmpui neih leh hun tur hi kum 2021 a ni a, kum 2019 leh 2020-ah rorel inkhawm a awm ang.

Tuna an thuchhuak ang hi chuan, kum thum chhung, inkhawmpui thlengtu/ dawltu bial ṭanpui nan hian MBKHP aṭangin kum tin cheng nuai thum dah a ni ang a. Cheng nuai kua lai a tling hman ang a, chu bâkah member tinin kum tin, Rs. 20/- an thawh chuan kum thumah chuan member tinin Rs.60/- an thawh hman ang. Organiser report-ah khan BKHP member hi 30,061 an ni a, 30,000 ah dah ta ila, kum thum chhunga an thawh tur chu Rs. 18,00,000/- a ni ang. MBKHP budget-a cheng nuai kua nen chuan, cheng nuai 27 emaw lai a lo tling ang. A tlin chiah loh pawhin, cheng nuai 25-ah pawh ni ta se, a lehlamah member pung zelah cheng nuai 30 lam pawh a ni daih thei. An inkhawmpui nana sum heti zat, kum thum chhunga neih hman an tum hian mi tilawm a ni.

Mizorama pawl leh Kohhran tin hi inkhawmpui fo kan ni vek a, hmun hrang hrangah kan thleng hlawm ṭhin a, ram pum huap chu a te tehchiam thei lo tlangpui. Tam viau hi ropui tehna chi khatah kan hmang emaw tih tur a ni deuh bawk si a, sorkar kan pùr nasa mah mah ṭhin hian beng a tithlep tih sawi fo a ni ta. Heti a nih chuan, YMA emaw, tlawmngai pawl dang emaw, Kohhran pawl kan ni emaw, kan intawh khawmna tur buatsaih kawngah hian, tun aia insenso ve te, a senso tur tuak vete kan inhuam deuh deuh a ṭul niin a lang. Ṭhenkhat chuan sorkar pùr hi kan inthlahrung lo khawp mai a, inthlahrun lohna tur chin pawh a awm ang a, a panna kawng, eng, tui, buhfai ilo-ah chuan kan beisei thiang ang chu.

Mahse pandal sakna senso leh senso tur dang atana kan MP/ MLA/ sorkar dept. aṭanga inhlawhna ilo kan beisei dan hi chu, hriam deuhin sawi ta ila, van malsawm duh chi a ni lo fo mai thei. Hmun pakhatah chuan hman deuhah khan an MLA Fund cheng nuai 10 an hmu a, mahse chuti maia inpêk dan a awm lo a, nuai hnih vel senna tur hna an siam chawp a, cheng nuai 8 vel hlawh theih dan tur an ngaihtuah a.... tih thawmte a ri a, entirna pakhat chauh a ni. Member tam tak nei pawl hi chu politician tan chuan ngaih pawimawh loh theih loh, 'pawl hlauhawm' kan ni thuai mai a, Kohhran rim nam pawl phei chu, Pathian malsawmna beisei zel kan nih avangin, kan inkhawmpui sawngbawl danah hian chung lam inrawlh a rem lo nuai ang tih a hlauhawm viau a ni.

Kan lo hriat danin, tun ṭuma Pandal sak nan hian Rs. 35,70,000/- sen a ni a, a thlengtu, Lunglawn Pastor bial khan sorkar pùr lo-in cheng nuai 45 an seng tihte a ni a, an sen zat chu engpawh ni se, 'sorkar an pùr lo' tih hi a lawm­awm hle mai. Kohhran leh pawl ṭhen­khat chu, sorkar tana zahawm thei lo khawpin thil kan dilin kan beisei a, kan ṭawngṭaina te pawh hi hnaivai deuha kan pute hnen aṭanga hmuh nghal zel kan tum emaw tih tur a ni a, lehlamah 'Politician-ten Kohhran min zah lo' kan ti leh a, zahawm ila, min zah mai dawn lo'm ni ka ti. Kan laka thil beisei fo zah hlur chu a har ve te pawh a ni ang!

Kan theih hram chuan, kan inkhawm­pui buatsaihna senso hi a neitu, member-te hian, MBKHP-te tih ang hian i thawh ve ang u. Kum tin Rs. 20/ 50/ 100 hi a na lutuk lo ang. Harsa zualte chu awm theih a ni. Khawpuia

ṭhalai rual tan, kan khawsak dan tlangpui en hian, a harsa lutuk lo theiin a lang. A phun ṭhinte hi a harsa tak tak pawh kan niin a lang lo.

Neitu rilru dik pu chuan rit deuh pawh an tuak hram mai zawk niin a lang. Kan inkhawmpuiah hian mawi, ropui, nalh, changkang, man tam lamah intlansiak lo ila, kan senso pawh a ziaawm ang. Ni thum emaw chauh kan hman tur thilah a hmaa thlengtute khûm tum rànna rilrute pawh awm lo se. A hlawhtlinna chu a man leh senso-ah a awm lo tih pawm nghet ila a ṭha.

RK Lianzuala