Tangka sum ngainat hi sual tinreng bul a ni
Khawvelah hian thlemna te, awhna te leh ruk duhna te, tu chungah pawh a lo thleng a, mi hausa leh rethei kan inang vek. Nasa takin eiru thei te kan dem a, kan sawisel nasa a, thi tlak hialah kan chhuah ṭhin. Mahse, chu pa ngei chu eiru thei dinhmuna a din ve chiah chuan a tlanchhe thei bik chuang lo, dinhmun ṭhaa ding lo kan nih mai vanga itsikna rilru lo chhuaka mi tam tak mite demtu kan awm ṭhin. Heng zawng zawng hi sual hrin chhuah vek a ni.
Amaherawhchu, sual hi ngaihzam mai chi a ni lo a nia; Akana chungah a lo thlenga a hneh lo va, tichuan hremna a tuar a ni. Lora E. Clement hian a lehkhabu ṭha tak ‘Managing Yourself’ tih a ziah buah hian millionaire engemaw zat chanchin a sawi a. Chumi zinga mi, pa hausa tak mai pawh hian thlemna chu a hneh lo va, jail-ah rei tak a thil ruk avangin a tang a.
Ni khat chu a ṭhian hlui hian a va tlawh a, ani chuan hriau leh hruihrual nena bag a lo ṭhui lai a hmu a. A ṭhian chuan, “Hello! thil i ṭhui ka hmu che a!” a ti a. Ani mi hausa pa chuan, “Ni lo, ka lawmman ka hmu a nih hi” a lo ti a. Mi thil tisual phawk leh hriat te hi nuam kan lo tih viau a ngai lem lo. Awt a rukru bawk chuan mathei lovin an thiltih man chu an seng ngei dawn tho.
Chutiang ti ve duh lo, awhna pawhin a zem thluk zawh loh te hi mi a, mi mawl, fing lo kan ti mai dawn em ni? A hmabak chu retheihna chauh a ni, khawvelah hian chan tur an nei ve lo kan ti mai ang maw? teuh lo mai!
Chutiang mi pakhat chu tlangval Bill-a a ni. Bank-ah dollar sawmhnih la chhuak turin a kal a, Cashier chuan a chhiar a, dollar nga note pahnih leh sawm note pakhat a pe a, chu chu sawmhnih a ni. Bill-a chuan pawisa chu a la a, a kal chhuak ta a. Mahse pawn a thlen hma chuan pawisa chu a chhiar ve a. Dollar nga note pahnih leh dollar sawm note pahnih a ni tlat mai. Dollar sawm note pahnih chu a lo inbelhbawm ni ngei tur a ni, ngawi rengin dollar sawm note chu cashier hnenah a kir leh ta a.
A mawl kan ti maw! Lo ngaithla teh! Thla engemaw zat hnuah chuan Bank Manager chuan a car khalh tur driver a mamawh a. Chutih lai chuan Bill-a pawhin hna a la zawng ve mek bawk a. Tichuan, cashier chuan Bank Manager hnenah chuan Bill-a chu a kawhhmuh ta a. “Kha tlangval kha lunghlu truck load khat phur tur pawhin ka ring ngam a ni,” a ti hial a. Chu mai ni lovin, chu hna chu engngemaw chen a chelh hnuin Bank Manager chuan ama private stenographer atan a chhawr ta hial a ni. Rinawmna hi mawl leh fin lohna a ni hauh lo mai!
Thil te tham te nia lang te hi ngainep lutuk suh u. Hetiang thil te tham belhkhawm hian mihring rilru chu Krista annaah emaw a chherchhuak mai thin.
Dik tak leh taima taka thawktu chu mi zahawmah a inchher chhuak ṭhin a, mi hlemhle leh ruk ruk ching, hretu der ni chunga mi sum chhuhsak ṭhintu chu hrem lohvin a chhuak lovang a, mualpho takin a la awm zawk ang.
Tangka sum ngainat hi sual tinreng bul a ni. (I Tim 6:10)
Vanhmingliana (Taua), Dawrpui