Candidate-te kan beisei dan a fuh lo

Kan hma lawkah kum 5 chhung atana Mizoram rorel khawlpui ‘MLA’ thlan a lo hun leh ta a. Heta tan hian political party hrang hrangte pawhin an party candidate tur hrual mum nual tawh hlawmin, ṭhenkhat chuan candidate tur ruangam an siamfel mek bawk.

MLA-te hi a nihna takah chuan mipui aiawha rorela ‘Dan’ zamtu leh siamtu tur an ni. Mi ṭhenkhat leh kan thlan chhuah MLA-te zing ngeiah pawh MLA dinhmun nihna tak hre lo kan awm nual awm e. Chung ho ngaih­danah chuan MLA/ Minister-te chu mipui chunga leng, lalna leh thuneih­na zawng zawng pum hmawma sorkar hna petu atan te, sorkar hnathawk huat zawng leh diriam zawngte chunga transfer emaw, suspend leh bantir theitu te, duhsak zawngte hnena contract leh supply pe theitu ngawtah kan ngai ṭhin. Chutiang ngaihdan ringawt chu a dik lo a, mipuiin kan aiawha rorel tura kan thlan, ram leh mipui tana hnathawh kawr hatu, mipuiten kan chhiahhlawh an ni zawk.

A tirte aṭanga kan kalphung fuh tawh loh vang pawh a ni ang a, mipui hian kan biala rawn ding MLA candidate-te kan dawr dan hi a fuh thlawt lo. Kan thlang tling dawn nge dawn lo tih kan hriat hma hauh aṭangin an lakah phut leh beiseina tenawm tak kan nei nghal fur ṭhin. Party worker zinga ṭhenkhat chuan kan party candidate an nih avangin kan harsatna leh buaina hrang hrangte min chinfel sak nghal turah kan beisei ngawt zel bawk.

Mi tam tak chuan bialtu MLA ni lai te, kan biala MLA candidate lakah damlote tlawh chhuaka kan vek turin kan beisei a. Sum hautak zet zet senga mitthi ruang thawn tur leh mitthi reng reng chu ral ngei turin kan ngai nghal ngawt ṭhin. Damlo mitthi ruang buaipui tur chuan ṭhenrual ṭha leh chhungkhat laina hnai te, kohhran bakah eng tik lai pawha mi chanhai leh riangvai lu sun fate laka tlanchhe ngai lo YMA kan nei.

State khat, ram bung khat ve reng ruangah MLA/ Minister-te chu damlo leh mitthi reng reng buaipui fai veka hun hmang tura kan beisei chuan, ram tana finna leh ngaihtuahna ril tak senga kan tana Dan siam turte lakah hian eng dan ṭha mah beisei lo law law ang u.

Eng tik hun lai aṭang khan nge bialtu MLA leh candidate-te lakah hetiang beiseina hi kan neih le? Heti em ema beiseina mak leh danglam kan neih takna hi kum 20 vel kal ta bak aṭang khan a la ni lo mai thei. Tlin duha mipui vote zawng candidate-te chuan tute pawh tihlawm hrim hrim an ngaih avangin damlo leh mitthi ruang buaipui lo bik nih chu an ngam si lo a, an dinhmun hi a hahthlak ṭhin ngawt ta ve ang. Hetih lai hian damlo harsa zual buaipui ngai bik ngawih ngawih leh mithi ruang ngaihsak loh theih loh bikte chu awm ve bawk ṭhin mahse; a zualpui siam ṭha tur chuan an lakah mipui hian chin tawk kan neih thiam a ṭul hmasa a ni.

MLA ni lai emaw, candidate-te hian an hmelhriat sa ni hauh lo, an hming leh an nihna zawt chawpa ruang chunga pangpar an dah ṭhin te, a hming mawiah puana an tuam satliah ṭhin hi, a titu leh mitthi chhungte ngei tan pawh a hlutna a sang lo khawp ang.

Thingtlang/ zokhaw lamah chuan MLA candidate-te chu an motor hmanga buh leh thing phurh sak tur te, tui chawi sak tur tein kan phut ṭhin. Ṭhenkhat chuan khaw kar kawng siam ṭhat sak tur te, laih thar sak tur te, playground zim lai nawr zau sak tur te, Community Hall leh NGO hrang hrang building thuam ṭhat sak tur te, jersy leh mamawh hauh loh silpauline thlenga min pe turin kan phut ṭhin. Hetiang thil kan beisei hi kan mawl vangah puh ila a sual tam lovang. Thlang tling phawt i la, MLA fund hmangin heng zawng zawngte chu an tih tur chiang saah dah ang u.

Khawpui leh thingtlang hmun thenkhatah pawh tlangnel chin tawk nei lo mi thenkhat chuan MLA candidate-te hnenah an building sak laklawh lai chhunzawm tur te, pawisa puk dil te, Gas lakna tur pawisa dil te, fate school admission fee leh hlawhfa rawihna tur thlenga pawisa dil an awm bawk an ti a, a zah theihloh thlak takzet a ni.

Political party tina MLA candidate-te hausak dan hi inthlau tak tak an ni a. Candidate hausa deuh ṭhenkhat chuan a chunga kan sawi takte hi an duh thalin an dinna bialah an tihsak thei ang. MLA hlawh leh an hamṭhatna dawnte kan hre vek a, hetianga tlin loh hlaua sum leh pai senga candidate che bawrh bawrhte hi lo lawm reng reng suh u. Thlang tling pawh ni ila, an senso rulh nan enge an tih duh ang tih kan ngaihtuah tel a ngai a. Hengte hian chawi belh ringawta MLA nih chu an duh bik hauhin a rinawm loh a ni. Kum 5 chhunga i chanvo hmuh ve tur emaw, in bial hmasawnna tur kha in hmuh loh phah daih thei a ni. Anih loh vek pawhin in bialtu MLA kha corrupt takah in chhuah mai ang.

Candidate ṭhenkhat erawh chu rethei leh harsa ve tak tak an ni thei a. Neih zawng zawng baka puk chawpin an dinna bialah tlin ngei tumin an bei ve thin reng a ni. Lo tling ta pawh nise leiba rulhna tur an ngaihtuah hmasak a ngai ngei ang. An tlinglo a nih ngat phei chuan leiba tam tak an hnutchhiah phah thei a ni tih pawh kan venthawn pui a ṭul.

A thuhrimah MLA/ Minister-te hi anmahni thua dan palzutin thil an tisual ngawt ngai lo a, an corrupt nghal zel hek lo. Mipui pawh hian kan dawr dan leh nawr dan a fuh ṭhin lo a. Inthlan lehah tlin loh an hlauh miau si chuan mipui nawrna tihlawhtlingin, dan pel hrata thil an tih a lo ngai ta thin a ni. Kan thlan lal ten dan bak piah lama thil an tih reng reng chuan sorkar kalphung a pelin a dik lo nghal pang a. Chumi tuartute chu keini mirethei bawk kan ni zel ṭhin.

Mizote hian thil dik leh ṭha chu kan hria a, kan sawi tama kan ziak tam narawh bawk. Mahse, thil ṭha titu nih hi kan harsat tlat zawng a nih hi.

R.Lalhmangaiha, Bethlehem Veng