Party lian pahnih candidate tur hi
MLA neih zat aṭanga teh dawn chuan party lian hi pakhat chiah kan nei mek a, amaherawhchu tun hmaa ro an lo rel tawh dan aṭanga thlir chuan party lian tih hi pahnih kan nei thei a, chungte chu Congress leh MNF hi an ni mai awm e.
Congress hian thawhpui an neih loh tur thu emaw, an neih tur thu emaw an la sawi lova, kum tina an tih ṭhin angin an tana ṭha tur a nih chuan mal din an hnial lo vang a, a ṭul chuan MNF tih loh chu an thawhpui hreh hauvin a rinawm lo. MNF hi chuan huaisen taka an ‘mal din’ tur thu vawi tam tak an puang tawh a, BJP nen sawi zawm an hlauh luatah a hun hmain an kal dan tur hi an puang ta niin a ngaih theih.
MNF-in an mal din tur thu an puan hian an zawmpui nia mipuiin an ngaih BJP nen an thawh dun loh tur thu an puanna angah kan ngai thei ang.
Party lian pahnih hian bial 40-ah candidate an siam turah ngai ila. MNF hian NGO-te duh dan angin Chakma candidate neih an duh loh chu an President Pu Zoramthanga ngeiin a sawi a. ZNP President Pu Lalduhoma phei chuan lawmthu a sawi hnan rap tawh a ni. Amaherawhchu, politician-te hi chuan sawi hreh tak tak an neih loh avangin khatih hunlaia a thusawi kha zawm lovin MNF hian candidate 40 an siam a rinawm a (BJP an thawhpui loh chuan), chung zinga bial hnih velah chuan Chakma pawh an awm ngeiin a rinawm.
Mipuiin an hriat chak chu heng kan party lian pahnih hian ‘senior’ hi an din tir leh dawn em? tih hi a ni. A sawi mawina lamah chuan ‘experienced campaigner’ an ni a, a mawi lo zawnga sawi chuan ‘putar’ han tih mai tur pawh an ni ve tawh a, kan party liante hian an la dah lui dawn nge midang tan hmun an kian ve tawh ang? tih hi ngaihthlak chakawm chu a ni.
Mizoramah hian political party zinga thil lang chiang tak chu ‘leadership crisis’ a ni. Vairam kan sawisel a, an hruaitu lian an lal leh lutuk a, an pathian biak a, mihring leh mihring an inngaihsan lutuk avangin an kalphung a dik lova, heng ho hi dictaor angin an awm e, kan han ti ṭhin tak nang a, hruaitu lian awm lo chuan pawl hi a kal thei lo.
Brig Ṭhenphunga active theih loh rualin a party a chuai a, Pu Laldenga thih hnuah MNF kha an buai rei hle. Comngress hi Pu Lal Thanhawla hi awm lo se hmuh tur awm lo khawpin an ral thei hial awm asin ni. Tunah hian Pu Lal Thanhawla leh Pu Zoramthanga hi la chhuak ta ila, party lian pahnih hi party lian an ni zo lovang.
Hei vang hian Pu Hawla leh Pu Zorama hi chu an din a la ngai mai ni lovin langsar lurha an awm a la ngai. Tichuan, Congress lamah hian en ta ila, hruaitu ṭhenkhat hi chu an kum a ta tawh vangin an hunlaia pa ṭha tak an nih pawhin an hun a liam tawh tia chawlh tir mai a hun tawhin a rinawm. MNF lamah hian kum lama senior ve tawh hi an nei nual bawk a, an hunlaia Minister an lo nih tawh vangte leh tuna political party lama nihna an neih san avang ringawta candidate an nih leh chuan an tifuh lo thei bawk a ni.
Thawk khat lai khan ‘ṭhalai’ tih ringawt mai kha a ri ring a, thlirna pakhatah chuan ṭhalai ringawt hi chuan rama n kaihruai thiam lo vang. Chuvangin, experience nei hi an awm a ngai a, heng mite hian lehkhathiam thlir zau deuhte kawppui ta se, chu chuan ram chu an siam theiin a rinawm. Party lian pahnih candidate set hun hi mipuiin an thlir a, chumi mil chuan kan inthlan sukthlek pawh hi a awm dawn a ni.
Tuna ṭangrual pawlte hi Third Front an ni ta a, kan party lian pahnih mipuiin an nin viau chuan chance chu an nei ve thei ang a, anmahni party strength chuan beisei tur an la nei phak lovang. Mipui nawlpui hian kan hruaitu neih sate leh tun hma deuha min hruai tawhtute hi an lo nin tawh viau chuan an keuh thlu rup ang a, kan beisei vak loh mipuiin an la enchhin loh Third Front lam tan hian beiseina a awm ve thei bawk. Mimala mi ṭha tak tak awm khawm hi mipuiin kan duh nge duh lo tih chu inthlan hunah a hriat ang.
Congress-a MLA candidate tur 40 zingah hian ‘hmel thar’ tih tur hi chu mi panga vel tan bak a tam berah hmun ruak a awm dawn hmel lova; MNF hian hmelthar lam ringawt an beisei chuan an tisual ve thei bawk si a, rilru fim tak hman hunlai a ni. Inthlan hi thil harsa tak angin lang mah se, tunah chuan mi pathum inelna mai a ni dawn a, candidate siam thiam chuan tu pawh hi tling thei, tla thei an ni mai dawn si a, Mizoramah hian ‘bial him’ tia sawi ngam tur hi mi pathum pali bak hi an awmin a lang si lo.
Malsawmtluanga