Letterhead-a mihring hming leh Ashoka Pillar awm dun hi

Zoṭawnga tâwi fel taka 'Letterhead' dah hi a awlai lo hle. J.F.Laldailova kha la dam sela Zoṭawngin mawi leh tawi fel takin a dah leh thei ngeiin a rinawm a; mahse, a thih hnuah pawh kum 40 dawn lai a liam ta a, ráwn duh mah ila, ràwn phak a ni tawh si lo!

Pu Remkunga chuan "Lehkha phêk chung lama hming leh address, etc. inziak sa" tiin a hrilh fiah a (English Zirna Dictionary, pp.516). Sapṭawnga an hrilhfiahna chi hnih chauh han tar lang ila. "A printed heading on stationery, esp.one giving the name and address of a business concern, an institution, etc (Webster's Encyclo­pedic unabridged Dictionary, pp.1104) leh "A printed heading on a sheet of letter containing the address etc of an organization or individual (Shorter Oxford English Dictionary, pp.1585).

Letterhead hrilh­fiah chungchangah chuan British-ho aiin American-hovin an tifuh hret àwm e. "Sorkar mi leh sa, pawl leh mi maltena lehkha an ziahna paper chunga an address an ziah hi," tiin a mawl zawngin han dah ve ta mai ila.

Letterhead chan­chin thui tak umzui ka tum lo va, ka sawi tum taka hi chu- Sorkar mi kan ni emaw ni lo emaw lehkha kan ziah a, a chung lam vei lama Ashoka pillar leh address chuan kawptír hi a felhlel a ni, tih hi.

Dan mit aṭanga thlir chuan heta sawifiahna kan tar lan zingah hian Webster's-in a hrilhfiahna hi a rintlak ber awm e. Kan magazine kawl chi hrang hrangte leh Sorkar mi leh sate lehkha ziahte hi han en lêt ila, ṭawng thu che lovah, Sorkar pisa miin a luah hming emaw mimal sawrkar hna vawn hming (designation) leh Ashoka pillar chuang kawp kan hmu zauh zauhin a rin theih a. Ashoka pillar hi India Sorkar chhinchhiah nana hman, thianghlim tak leh zahawm tak a nih avang leh kumkhhuaa awm tur a nih avangin (dan anga Parliament-in a hman dan a tidanglam te a nih ngawt loh chuan) mihring hming nen a chuang kawp thiang lo a ni tih hi hriat a ṭha khawp mai.

Ashoka pillar leh designation leh Sorkara nihna (desig­nation)te chauh an awm kawp thiang a. Hming erawh chu a hnuai lamah a awm thung tur a ni ang.

Hman deuh khan, kum 10 hma lamah khan, minister pakhat chuan Ashoka pillar hnuaia a hming chhut kai tela a letterhead siam a duh tlat mai a ni awm e; a buaipuitu lamten a theih loh a ni tih an hrilh hnu pawhin a tilui deuh tlat a, han hnial kha hrehawm an ti hle a ni awm e.

Letterhead-a Ashoka pillar telh kan duh a nih pawhin mihring hming nena chuan kawptir lovin designation leh address dangte nen dah kawp ila. Letter­head hmang zawng zawngin hei hi hriat ni se a ṭha ngawt ang.

Dr J.T. Vanlalngheta, LLB., Ph.D., DLitt.