Sâhâwk kher loh ni se

March 5, 2016, Inrinni chawhnu a ni a, New Champhai khelmuala KṬP General Conference-a Variety Programme hman a ni. Tlangval pakhat hian 'Keini zawng kan lo KṬP zel ang e' tih hla a sa a, mipuiin bán an vai suau suau a, an lám suau suau a, an sâhâwk a ni. Kei erawh chu ka ṭhu ngawi reng a, mipuiin an lawm em em leh sâhâwk titiha an lâmpui hla thute chu ka ngaihtuah neuh neuh a.

Ni e, kha hla, 'Keini zawng kan lo KṬP zel ang e,' tih hla kha KṬP member tan chuan a hlu viau pawh a ni mai thei a. KṬP member tam tak khan an lâmpui a, an khekpui a, an kúk ruih ruih bawk a. Ṭhalai ver vawr, tha za zek zawk tan chuan a nuam viaute pawh a ni ang. Tin, a music khan mipui a nawr (pump) tawh a, Thlarau Thianghlimin a nawrna ai maha nasain a nawr tawh a; rüm sawi hleih theih loha nasain ṭhalaite kha nawr a, an phu ta suau suau ni mai hian ka ngaihtuah a!

KṬP-te hi kan rawngbawlnaah hian kan hlim tur ni a. A thu tak deuh lai, a urhsûn lai thilte kan tih rual hian, khawvel lam thil deuh reuha a hlimawm leh nuam laite pawh kan ti ve tur a ni, kan ti thei ang. Pathian nena kan inkara hlimna bakah, taksa thilah hlim takin kan awm ve tur a ni.

Branch chhungah emaw, Bialah a ni emaw, ram pum huap ang pawha programme kan hmanahte pawh hlim takin hun kan hmang ve tur a nih rual hian, a mawi tawk chin, KṬP programme leh tih atana mawi leh âwm chin ngaihtuah fo erawh a ṭha khawp mai.

A thiangzau thei lai ber angah pawh ni se, KṬP inkhawm leh inpawlhona (fellowship) programme angahte hi chuan 'sâhâwk' anga ngaih theih chin hi chu thleng lo hram ila a mawi viau ang; rimawiin chhungril lama a rawn nawr emaw, min tizauthau tawh emaw a nih pawhin, sâhâwk chuang lo tura insum hram hram a ngai a ni.

'Keini zawng kan lo KṬP zel ang e,' tih hla hi KṬP member tam tak tan chuan a hlu viau a ni mai thei a. Mahse, kei, kum 20 tlin hma aṭanga KṬP-a tel ve tho, phak ang tawk tawka rawngbawlna lama ke pen ve hram hram thinlungah erawh, a thawk dik lo tehreng nge maw ni, mi tih-elna hla angin a thawk tlat mai thung a. KṬP ni ve lo ṭhalai pawl dangte leh KṬP member ni ve tho, khawvel sualnain a la tihbuai, KṬP-a tel ve hleithei lote deusawhna hla ang zawngin a thawk a, tuipui ve a har ngei mai!

A hla tawp lam deuhah khan,
'Thenkhatten vanglai an chen,
Siamtu ngaihsak loin,
Zu leh drugs nulat tlangvalna nen,
A tawp chu lungngaihna mai maw'
'Chatuan nun nei turin
Kristian thalaiten vanglai kan chen e'
tihte a ni tain ka hria a.

'Anni chuan Pathian ngaihsak loin khawvel an chen a, zu leh drug, nulat tlangvalnate an chen a, keini erawh chuan KṬP-ah kan vanglai kan chen e' tihna a ni ber a. Hei tak hi KṬP-ten rawngbawlna pawimawh taka kan neih, Pathian ngaihsak lo, Kohhran leh KṬP-a tel lo, sualin a tihbuai mekte hui khawmna lam aiin, deusawhna lam ang zawngin a thawk tlat mai pek a!

Chuvang chu a ni ber mai, kum 15 vel KṬP-a lo tel ve tawhin 'Kan lo KṬP zel ang e,' tih ka tuipui ve theih hauh loh chhan chu! Central KṬP Leader hlui pakhatin hla pakhat, conference hlabua telh a duh miah loh pakhatte pawh min tihre chhuak rum rum a. A leader tawh loh hnuah erawh chuan chu hla chu conference hla bu-ah an tel zui ta tho a.

Zoramchhana Khiangte