TRUMP-A STATE OF THE UNION ADDRESS

United States-ah khuan kum tin, President-in rorel khawl, Congress in pahnih member-te infina ṭhu khawm hmaah thu a sawi ṭhin a, State of the Union Address an ti. President an nih kum khatna (term khata kum hmasa ber)-ah erawh chuan an sawi ngai lo. Tunah hian Donald Trump-a'n a State of the Union Address hmasa ber a sawi.

India ramah hian Parlia­ment Budget session ṭan ni-ah President-in Parliament in hnih - Lok Sabha leh Rajya Sabha member-te infina ṭhu khawm hmaah thu a sawi ṭhin bawk a, January 29 khan President Kovind-a pawhin a sawi kha, ani pawh hi nikuma thlan a ni a, a vawi khat sawina ve tho a ni.

January 30-a Trump-a State of the Union Address hmasa berah hian kum khat kal ta chhunga a kaihhruai sorkar hnathawh tlangpui a sawi a - America mi tin tana he ram tiropui leh turin, hmathlir dik leh chiang tak nei chungin hma lam kan pan mek a, hlawhtlinna nasa tak kan hmu tawh. Kan rin lâwk leh, rin lâwk rual loh dodalnate pawh kan tâwk. Lawmna leh harsatna tam tak kan hmachhawn a, tuilian, kangmei leh thlipui rapthlak takte kan tuar a, heng zawng zawngah hian America rilru chhungril mawina leh, a hnungzang ruh, kahpathir anga khauh leh sak pawh kan hmu tel zel. Heng fiahna tinah hian America mi huaisen, tute nge kan nih leh engnge kan tih theih min hriat thartirtute kan hmu thar zel bawk.

Kum khat kal ta chhung khan kan lo hriat fo tawh - America mite tluka huaisen, hlauh nei lo leh tum ruh hi an awm lo tih khawvel hian a hmu a, kan hmaa chhuak apiang, hneh tak leh ṭha takin kan hmachhawn thei zel a ni. Mipuite ṭanrualna hmangin America ram him, chak leh chhuanawm tak kan din mek a nih hi. Tun hi America tan hun rangkachak a ni a, kan suangtuah leh mitthla ṭhin ram din turin tun anga hun ṭha a la awm ngai lo. America mi tu tan pawh, tun hi hun lawmawm a ni a, thawkrim, mahni inring ngam leh America ram ring tâwkte chuan an beisei leh an suangtuah chu a takah an chantir thei vek a ni.

Kan hma lamah hian engin nge min hmuakṭ Eng ang ram nge kan nih zel angṭ Kan za hian, pawl khat, Ame­rica chhungkua kan ni a, in thuhmuna cheng, thinlung thuhmun pu, hmathlir thuhmun nei, puanzar thuhmun hmang kan ni. America mite nun laipui leh an innghahna chu sorkar leh inrelbawlna lam ni lovin, rinna leh chhungkaw rilru put tlatna hi a ni tih kan hre ṭheuh a, kan thupui pawh 'Pathian kan ring' tih a ni. America mite hian an ram an hmangaih avangin, hmangaihna leh rinawmna-a enkawltu sorkar neih pawh an phu a ni. Hnathawh tur a tam hle mai. Ruihhlo avangin kum 2016 chhung khan America mi 64,000 an thi a, ni tin mi 174, darkar tin mi 7 zel thi ang an ni. Hri chhia ang maia léng, ruihhlo ànchhia hi khauhin sut kian huphurhawm hle mah se, America mi kan ni miau a, kan hneh ngei dawn a ni.

Kan nihna leh dinhmun hi chhuang zel chunga harsatna te kan hmachhawn zel phawt chuan, kan hlen chhuah theih loh thil engmah a awm thei lo. Kan thil ngaihhlut leh kan duhzawng hi kan hriat chian a, kan mipuite kan rin ngam a, Pathian kan rin tlat bawk chuan, kan hlawhchham thei lo. Chhungkua kan hmuingil zel ang a, kan mipuiten hamṭhat­na an hmu ang a, he ram hi ram him, chak, chhuanawm, thilti­thei leh ram zalen a ni kum­khua ang. Pathianin he ram hi malsawm mawlh rawh se.

RK Lianzuala