Mipate incheina

Kan governor thar tur Lengpui Airport a hmuahna hlim thla leh a hmuaktute kha kan hmu hlawm ang a! Kan governor kha kamis hain a kamis pawh a kekawrah beng lut loin thli thawah a kawr tlang a phe vat vat thei a ni.

Chutih laiin kan CM erawh chuan coat hain, necktie a suih a. Hmanni lawkah Euro 2020 final inkhel kan en a. David Beckham-a pawh suit nen nalh taka incheiin inkhel a en ve a nih kha. EPL inkhelah pawh hian manager tam takin coat /suit nen an naute inkhel an vil ṭhin. Manager ṭhenkhat erawh chu thawmhnaw pangngai nen inkhelhnaah an kal mai ṭhin. Sap ram hi ram vawt a nih vangte pawh ni hmiang coat leh necktie hi an uar viau mai.

Vaiho hi chuan Nehru-a coat/ Nehru jacket ang hi khaw­vawtah chuan an ha hlawm ṭhin chu a nih hi. Vai kan tihte hi ram luma awm an nih vang nge incheina man to hi an uar lo hle a. Mihausa leh officer liante pawh simple taka inthuam khu a tam zawk an ni ṭhin.

Vai milian Mizo­rama lo chuang chhuak­te pawh hi eng­tin vak an inchei lo. Alo buai­puitute hi kan lo inpen­parh zaw mah ṭhin niin ka hmu. Kan CM kal ta pu Hawla kha inchei peih tak a ni a. Mizoram chhungah erawh chuan hmun kilkhawrah a zin ngai awm pawhin kan hre lo.

Kei ni hi chu koh­hran inkhawma suit hak uar tak kan ni a, kohhran upate phei chuan suit nen chauh inkhawm tur emaw kan ti hial a ni ta ber. Sunday-ah phei chuan a ni lehzual. Keini chuan khaw lum leh vawt pawh sawi loin suit haa inkhawm hi 'Sunday best' ah kan ngai ni berin alang.

Tun hnaia mual min liam san ta Rev. Lalhmingchhuanga Zongte khan khaw lum ni pawha suit leh neck tie nena kan inhmuam up tlat mai hi ṭul lo a tih thu a sawi tawh a. Kan politician-te pawh hian coat leh necktie nena assembly session kal tur emaw an ti ve tho niawm tak a ni, an nalh thei ṭhin hle.

Incheina hian mihring min vawng a, a ṭha. Amaherawhchu, incheina hi zahawmna, mahni leh mahni intihzahawmna tur nia kan hriat vang emaw a ni thei. Chuti ni lo se khaw lum tak hnuaiah pawh suit nena inthuam ṭul tlata kan hriatna hi eng dang vang nge ni ang tih hi a chhanna hriat a chakawm viau.

Kan CM pawh kha Lengpui khaw lum hnuaiah governor hmuak turin suit leh necktie nen a kal a. Mahni mawi tih danin silhfen kan inbel thiang. Kan right a ni a, tu sawi leh sel tur mah kan ni lo. Chutih laiin formal deuha inchei hun leh sik leh sa mila inchei hun a awm a, hmuh pawh a nuam zawk.

Suit hi man to tak a ni. Fiamthua kan sawi ṭhin 'mipa nalh duhin lum an pawisa lo a, hmeichhe nalh duhin vawt an pawisa lo' kan tih hi kan tleipui zel rih dawn kan ti tlat a nih chuan kan sawi buai lui lo e.

C. Lal Thlamuana