KAN SAWRKAR HNU KUM 5 AH, CHHUNG TINTE KUM KHAT LAKLUH CHU NUAI 5 - 10 A NI ANG - Zoramthanga (25th Oct 2017)

Hetiang thusawi mawi leh ngaihthlak hahdam, a taka chan theih leh theih loh dan chhutzui lo va, 'THU ROMEI' zamtir thiamte kamṭha inhip behtir ta mai hi an lo tam theih viau dan chu, vawiina hetiang lam sawi thiam, specialist, han tih theih hiala mawi, a sawitute dinhmun hian a tarlang chiang viau si.

Han bihchiansak chuan, "Kan sawrkar hnu kum 5-ah" a ti tlat a, India ram dan angin thlantlin an nih chuan, Kum 5 an sawrkar ang a, chumi hnuah midang kum 5 an sawrkar chho leh ang. An sawrkar hnu kum 5-na a nih avangin midang sawrkar leh hun term tawp lamah tihna a ni ang a, chuti a nih chuan kum 2028-ah chhungkaw tin kum khat sum lakluh chu nuai 5–10 a ni tawh dawn a nih chu.

An sawrkar chhung chuan eng kan ni dawn lo va, midang an sawrkar leh hnuah pawh, chu'ng sawrkar term tawp lama thil thleng tur chu Pu Zoramthanga hian a lo sawi lawk a ni. Zawlnei Isaia te sawi anga dik a ni ang emaw?

Thu puang lawk ṭhinte hi ZAWLNEI kan ti ṭhin a, ṭhenkhat chu an huaipui awm thei viau mai. Tuna kan Zawlnei CM thupuan ang deuh hian, thil dang dangah pawh kan ram leh a chhunga chengte hmalam thuhla a sawi lawk nual mai. Chu'ng a thusawite chu Zawlnei dang ang lo takin, a tihpuitlinna tur pawh anmahni kovah a awm thu a puang nual a nih hi maw.

"Darkar 24 Flag kan zar hman chuan UNO an lo thlawk lut ang a," tia Zawlnei lian zawk sawite kha a lo awm a, an lo awih ve viau bawk si a nih chuan, UNO an lo thlawh luhna tur Airport pakhat pawh kan nei lo tih lam reng reng ngaihtuah thleng pha lo B. Com degree nei hialte kha an awm ni awm tak a ni.

Chutianga Lunglei khuaa an public meeting-a an thu ngaihthlak hunlai an thlirlethona ṭum khatah phei chuan, minister chu an fiam ta hluai a, an nuihzat deuha a hriat avang khan a hawi kual a, "Kei chauh ka nia mi, kut beng zingah khan, Pu...a pawh a awm ve tho," a ti ta mai mai a, 'tia an sawiho a, an nuih dar dar thu kha sawiin mi pakhat chu ka bulah a titi nasa mai a ni.

Hetia "Thu romei" ang vela Zawlnei CM thusawi ang vel hi kan inhnehtir chhung chuan, tu mah dang mawhchhiat chi vak pawh a ni lo, kan phak tawk hruaitu, kan level hrechianga min zenthuk thei, roreltu fin riauna kawng nei kan nei a nih mai hi, kan tih a, kan pawm thiam a ngai. A chhan chu Danpuiah KUM 5 ATANa thlan an ni tlat a ni. Chutih lai chuan hetiang thu romei man thiam a, kan dinhmun hriate chuan, a hranpaa mahni chhungkaw hmakhua tal ngai a, anmahnia innghat lova, hma kan lak sauh sauh a ngai ta tih hriain ke i pen zel rih phawt mai teh ang.

Anmahni hliahkhuh tuma eng phiar phiara thiam chi tin lo thawhpuitute tal hian an hruaina hnuaiah hian, an zarzo a, a ṭha zawnga an lo dinchhuahpui hlauh chuan, lawmpui zel rih bawk ila a ṭha phawt ang e. Kan tihsual zar zo kan ni mai a, a bak ke kan pentir leh a nih phei chuan, a hnuaia phunchiar kan awm a nih pawhin, misual thawmhnaw lekah i dah zel ang u. Kan ram hmakhua hmu leh hre lawk SELF STYLE ZAWLNEI hian ama thuin a dawhsan ṭhutnaah hian a lawn mai thei lo va, kan hlankai a ni miau si!

DAN pawngsuala zirtirtu 154 lai an lak thar nia sawite hi, an thiam leh phaktawkah ngaiin, ram leh hnam tana an chhawpchhuah ang ang hi chhiatpui lo va, eng emaw kawng zawng tala hma kan sawn phah beiseiin, a ṭha zawnga lo her remsak hram hramte pawh zir a ngai ta hial a nih hi. Dan erawh chu a kawng zawhtir kan tum zel bawk dawn nia.

Lalrammawia