ASSAM NENA RAMRI BUAI BUAIPUI HMAIN TIHTUR KAN NEI

Assam nena ramri buaina kan neih dan hi Mizote hian chiang takin kan hre kim hle tawh awm e. Assam nena kan buaina hmun hi Cachar District mai ni tawh lovin, Karimganj District a tel bawk. Heng Vaiho kan tih maite hi Hindu leh Muslim-ho an ni. Heng kan ṭhenawmte chanchin leh ramri buai dan hi chipchiar taka ziah a chakawm hle mai. Heng Vaiho hi Mizo thisen chuan a ngam salh salh ngei mai.

Assam nena ramri buai hi thil namai a ni tawh lo va, mihring leh mihring inbei tur kan ni tawh a. Kan beih turte dinhmun zawk hi ralpui phiara kan phiar hmasak a ngai. "I zuan hmain i zuanna tur en hmasa rawh," tih ngaiin kan la awm a. Assam mite tan erawh chuan "Zuan hmasa phawt rawh," ti thei dinhmunah an ding thung.

Assam leh Mizoram inthlunzawm dan en hian, anni tan hian an eng nge kan nih a, keini tan kan eng nge an nih? tih hriat a ṭul hle. Mizo thisenin Vaiho kan hlauh loh ngawtna hian awmzia a nei ta lo!

Mizo pi leh pute huaisenna thuthlung ropui ber hmanga Assam nena ramri buai hi sut a ngai ta. Mizo Hnam thlah kal zelah, eng nge kan huaisenna leh mite kan ngam/kan hneh theihna thuruk chu le? Rilṭam chunga Ral beih chu a huaisen theih loh va, hneh an har.

Mizoram hi vawiin niah kan intodelh thut dawn lo. Nimahsela, nghei si lova kan nun dan tur hi kan rel fel hmasak a ngai. Sawrkar ei leh bar ngaihtuahtute'n Buhfai thla thum ei kan chhekkhawl tih lam ni lovin, tun dinhmunah, Assam nena ramri buai luhchilh kan duh tawh bawk si lai hian, kan inngaihtuah chian phawt a ṭul.

Assam state-ah Mizoram Buhzem awm anga ngaih tur. Mizoram chakkhai hi Tripura leh Manipur aṭanga la tura kan inngai hi innghahna tlak a ni lo. Aizawl Dawrpui phei Traffic Motor jam nasat vanga Saron veng lama hel leh Chanmari West lama hel ang lek a ni. Assam state chhunga Mizoram mamawh awm tlat hi mawl taka ngaihtuah loh tur. Assam kawngpui kaltlang tho tho tih hi fing taka ngaihtuah tur a ni zawk.

Assam nena ramri buai kan neihna hmuna zuk inlan luai luai lam ni lovin, ramri buai inveisiak lam ni lovin, ramri buaina hmun ringawt buaipui hmasa lovin, ramri lama zu inhawrkhawm hmasa ngawt lovin, Politics Game atana hnuk lut lovin, tihtur hmasa ber ngaihtuah hmasak tur kan nei tihah hian din phawt a ṭul.

Mizote hi hmelma ral rel thiam tak kan ni. Tunah erawh ral bei turin chakna thahrui ni tin mamawh nghei si lova engtin nge hmelma kan beih ang le? Hei hi inzawt hmasa ngam ang u.

Kan thahrui ber ei leh bar, ni tin mamawhte Assam state aṭanga la lut thei tho si a, Assam nena indo bawk si chu ngaihtuah a ṭul.

Assam nena ramri buai hi kan luhchilh tak tak dawn a nih chuan, ram hruaitu leh Pawl hruaitute'n dawhkan kila kan ei leh bar tur leh kan ni tin mamawh nghei loh dan tur rel fel hmasak hi kan tih tur hmasa ber a ni.

Mihring leh mihring inbei lova, Rorelna Court hmanga Ramri buai inbeih lah hi Ukil-ho sum siamna ang maiin, Cachar leh Karinganj ho nen kher kher hi chuan a tawpah mihring inbeih leh tho a ngai ṭhin. Chuvangin, Assam nena ramri buai kan neih chungchangah hian rilṭama awm hmasa bik lo va, ni tin mamawh nei chung leh tha thlah lova kan beih theihna tur tal hi chu ngaihtuahho a ngai hle.

F. Vanlalpeka IMCS, Aizawl