Mipui hi dem tawh lovang u

Tun hnaiah kan ram hruaitute ngei leh mipui aṭang pawhin, "Mipui hian thu an awih lo lutuk a," tih leh, "Mipui hian kan zir lo ve bawk a ni," tih kan hre ṭhin. Covid-19 chungchangah hian Mizoram mipui aia thawh hlawk hi an awm lova, Mizo mipuite aia hripui do tura inlung rual pawh an awm lo. Chuti chunga mipui dem na thu lo chhuak hi i dem ve zawk teh ang.

Mipui hian thu an awih sa ngai lo khawi hmunah mah, chu vang tak chuan 'roreltu' an mamawh ta a ni. Mipui awm dan tur an rel ang a, mipuiin chu chu an zawm leh zawm loh an vil bawk ang.

Chutianga enkawl tur chuan Police tam tak Mizoram sorkarin a nei a, an pute huan sam leh an pute in sa mai maia awm Police hi ko khawmin mipuiin sorkar thu­chhuah an zawm theihna turin kawi tin thler tinah rawn duty se mipui chuan thu an zawm mai dawn a ni. Chuvangin, mipui thuawih tir theitu chu roreltute an ni - Covid darh chhan hi mipui an ni love.

Kan sorkar hruai­tute pawh Covid tlem­in a han ziaawm deuhe lo ṭawng chapo ve hman ziah, "Kan sorkar chak tak," lo ti thul, "Keini state ang reng renga Covid-19 dona kawnga ti ṭha an awm lo," tihte kan ram hruaitute khan an han sawi ngam a. Kan sorkar tih ni lovin Task Force te vang a ni zawk lo maw?

Task Force in lut leh chhuak tur an veng a, hri vei an awmin an buaipui a, test tur pawh an buaipui a, positive te an chhui zui a, Task Force te chet ṭhat hi sorkar chet ṭhatna lam pawh zuk ni suh.

Covid dinhmun a ṭhat deuha sorkar vanga ṭha anga sawia Covid dinhmun a chhiat deuhva mipui thuawih loh vanga Covid hluar anga sawi chin hi a ṭha lo. Mipui chuan roreltu ṭha an awm chuan thu an zawm mai a, kan ram Covid dinhmunah hian tumahin mipui hi dem tawh lovang u.

Mipui thuawih leh sorkar pui ṭha ber state kan ni zawk a ni.

James LR Hnamte