HNATHAWH PHAL A HUN TA :

TOTAL LOCKDOWN ENNAWN NI TAWH RAWH SE :
Hripui dona kawngah Mizoram aia thawk ṭha an awm chuang awm lo e.

Chuti chung chuan :
1. Lockdown rei ber kan hmang tawh a. Hri a kiang emaw kiang lo emaw HNATHAWH phal a hun ta.

2. Hri hi engtikah nge a kian ang sawi theih a ni bawk si lo a. Total lockdown kan ṭhatpuina aiin, inkaihhruaina ṭha nen, eng hna pawh thawk theiin inruahman tawh zawk ila, kan ṭhatpuina a sang zawkin leh mirethei leh tu tan pawh a hlawk zawk ngei ang. Total lockdown kan chhiatpui nasatzia hi chhutchhuah thiam a har ta.

Hri nen kan cheng ho zel mai thei a. HRI NENA CHENHO DAN INKAIHHRUAINA ṬHA siam a hun tawh zawk.

3. Hna thawk thei loa inkharkhip a rei lutuk a, Ration Card Var neiho zingah pawh mangang an tam ta hle.

Mizo zingah "Chhuan ka chham ta, ka mangang lutuk," tiin tu pa emaw tu nu emaw mah hi an auchhuah i beisei lo ang u, Mizo zia a ni lo. Aizawlah hi chuan mahni ṭhenawmte pawh kan inhre chiangkuang hlei thei tawh lo a ni a. Building khata cheng za pawh inhriat pawh loh theih tak a ni ta a. Kan fai rel bel inhmuhsak tur pawhin tihngaihna a awm lo. Mahni in chhuahsan dek dek chu pawisa chawina leh tlangauin vantlang hriata puan mualpho a ni nghal zel mai bawk si a. Kei tak ngial hnenah pawh hian an mangan thu rawn sawi an awm fo mai.

4. Hnathawk ni lo; inlenpawh leh hlimhlawp bawlna ang chi reng reng chu phal loh ni zui zel turin inkaihhruai la ni zel tho se.

5. Hna thawk chungin Covid Appropriate Behavior = CAB erawh chu khauh taka kalpui ni tho se.

6. Rei tak inkhung beh hian mipui mamawh inkhawlkhawm lam tura chhuah theih a nih veleh, dawr velah mipui an punkhawm phah chiam ṭhin a, hei hian hri inkaina chance a tisang a, a pawi daih zawk a ni.

7. Total Lockdown hi thlahdul pawh ni se, mipui tam ber hian hri kai kan hlau tawh a, kan fimkhur thiam em em tawh a ni. Hetih karah hian mi fimkhur lo leh luhlul, CAB bawhchhia chu, hrem zui nghal zel ni bawk se.

8. Hnathawh khap chhung a rei lutuk tawh a. Ni khat thawh loh pawh harsat phah nana hmangte tan phei chuan a rei tawh lehzual a, an manganna hi a sang tawh em em a, van a tawng hial tawh ta ve ang. Kan ngaihthah lui tlat dawn em ni?

Thla tin hlawh lak tur nei ve lo ho zawng zawng chuan ṭampui mithi kan hmabak a ni ta der mai a. Hna thawk theia kan inher danglam vat loh phei chuan kan hma lam chu a thim lehzual dawn a ni. Hnathawh khap chhung rei tawh lutuk hi; kan ram leh mipuite hian kan tuar nasa dawn a. Covid vangin mi tam tak an thi tawh a, rilṭama thi kan awm leh lek phei chuan a mualphothlakin a pawi lehzual khawp ang.

Welfare State kan nih angin mipuite welfare ngaih pawimawh ber ni teh se.

9. Hri hi amahin kiam hun a awm a nih hmel a, Total Lockdown rei vanga Covid Hripui hi tlahniam ta niin a lang lo.

Mizoram chu mipuiin sorkar kan ṭawiawm ṭhain kan thawhpui ṭha a, sorkar kaihhruaina kan zawm ṭhain thu kan awih a. Mizoram aia inveng ṭha lo zawk, ram dang leh state dang mipuite , sorkar thu zawm ṭha duh lo tam zawkna ram tam takah te pawh hripui hi a tlahniam viau tawh zawk tlat a ni.

10. Inveng chunga hna kan thawh hi phal a hun tawh takzet a. Kan hmalam thim sukiang turin hna nasa taka kan thawh a ngai.

Sorkar aṭanga chhawmdawlna awm fumfe si loa inkhung beh reng ringawt mai hi mipui kaihhruainna fing lo tak a ni. Mipui hi hnathawktu leh hnathawh tur pawh siamtu kan ni a, working capital pawh kan ei zo zel mai dawn ta a. Thawh tur awm bawk si lo, engmah neih nei bawk si loah sorkar hian mipui hi min siam ṭan ta der mai a nih hi. Hei hi mifing thil tih dan niin a lang thei lo. Kutdawh ram nih mai kan hmabak ṭan ta.

11. Total Lockdown rei leh khauh lutuk vang hian naupang aṭanga puitling thlengin rilru lama ṭhuanawp an tam phah a.

Rilru lama mipui tlakchhiatna hi kan ram tan a pawi thui thei hle ang. Kan mipuite hi kan tichhe vek mai palh ang e. Chhiatna ata chhiat lehzualna a thleng ang tih hi thil hlauhawm tak a ni ta.

12. Lockdown thu ngaihtuahtute zingah thla tin hlawh lak tur nei hi an tam ber a. An thawh loh chuan nghei thei mai Mipui hnuaihnung zawkte khawsak dan leh dinhmun chhiatzia hian ngaih pawimawh a hlawh lo hle niin a lang.

13. LLTF/VLTF-te pawh a theih chin chinah anmahni hna thawk se. Thla tina hlawh pek ngai sorkar hnathawkho hi covid hripui donaah ṭangkai takin hman ni se. A theih chin chinah LLTF/VLTF thawh ai thawk turte pawhin chhawr ni zawk se.

14. Hnathawh khap a nih leh dawn chuan, thla tina hlawh lak tur nei ve lo, an thawh loh ni pawha hlawh lak tur nei lo zawng zawng hi Assistance Rs.300/- per head per day tal pek ni se, chutiang tala sorkarin a tih loh chuan mipui tam ber hian HNATHAWH KHAP HI KAN TLIN TAWH NGANG LO A NI.

Chhinlung Lalzarliana