Football AgenCY I bihchiang lawk ang aw

Mizo zingah pawh Football hmanga ei zawng tam tak kan lo awm ve ta a. Football hmanga ei zawng zingah hian tun dinhmunah chuan Agent nei lovin a awm theih tawh loh te pawh a tihtheih awm e. Heng kan Mizo professional footballer-teho hian Agent an nei vek ti ila kan sawi sual awm lo ve. India ram bik hi han thlir ta ila, kum 2013 aṭang khan ISL chu khelh ṭan a ni a. ISL khelh a nih hnu aṭangin nasa takin India football-ah hian sum chevel a tam lehzual a ni.

Tunhma chuan Kolkata giants kan tih mai East Bengal leh Mohun Bagan te bakah Goa lam aṭangin Churchill Brothers SC leh Dempo SC te hian sum an hmang nasain players hlawhte pawh an pe ṭha a, a bak club dangte hi chu sum an hmang hnem tia hriat an nilem lo. Kum 2013 a IMG-Reliance, AIFF leh Star Sports ten ISL an rawn chhawpchhuah tak hnuah chuan India mi hausa tam tak leh celebrity-te'n club an rawn nei ta a, an rawn nei satliah mai ni lovin kalphung fel tak neiin sum pawh an rawn thehchhuak nasa ta hlawm hle a ni. Players inchuhna a nasa a, Players-te hlawh tam taka sawmtu an rawn awm ta a ni. Hemi hunlai aṭang hian Football Agent te pawh nasa takin kan ramah pawh an rawn inlar ve ṭan ta a ni.

Agent chuan eng hna nge an thawh kan tih chuan, players te aiawhtu ti ila kan sawi sual awm lo ve. Heng Agent te hian Players te aiawhin Club leh company te hnenah Negotiation leh Business deal tihsak hi an hna ber chu a ni. Company kan tih hian Agent te hian an players te Ballboot, thawmhnaw, suppliments, energy drink etc-a sponsorship an hmuh theih nan theihtawp an chhuahsak bawk ṭhin a ni.

Kan hriat angin a players tam takte hi chu ziak leh chhiar thiam lem lo leh mi biak thiam lem lo; mi zakzum te te an ni a. Chungho tan hlei hlei chuan Agent-te hi an pawimawh lehzual ṭhin a ni. Agent-te hi a tlangpuiin mi lehkhathiam, tawnhriat ngah leh mi biangbiak thiam em em an ni a, chu bakah Contract chhung thu zirchiang peih leh an Players te ṭhatna tur dah lal thiam tak an ni tlangpui a ni. Hetia Agent te hian an players te ai an awh avang hian club aṭang leh inbiakrem dan azirin an players te aṭangin ei an lo nei ve ṭhin a. India ramah hi chuan a tlangpuiin Agent tehian 5%–15% an ei ṭhin a. A tam zawk chuan 5% hi an ei ber a ni. 5% an ei kan tih hian entirna'n Player pakhat hi Club-in lo la duh ta se, a Agent hian season khatah nuai za (1Cr) a hlawh tur a ni tiin club chu a dawr ang a, a lo hlawhtlin chuan Club chuan player hlawh (1 Cr) chu season khat chhung khan a tlangpuiin vawi sawm pekah an pe tla ang a, Agent fee (5% of 1 Cr = 5 Lakhs) erawh chu a tlangpuiin Club-in vawi khat pekah season tawp dawnah Agent kha an pe ṭhin a ni.

Contract offer chungchangah pawh players langsar leh langsar lem lo inkar hi a hla thei viau mai a, players langsarte chu Club hian Agent fee pek hi an hreh lo tlangpui a ni. Amaherawhchu players langsar lem lo hi chuan club hian agent fee pek an hreh ṭhin avangin Players leh agent khan inremsiamin a hlawh aṭangin thla bia an Agent te pek changte pawh an nei ve ṭhin bawk a ni. Mizote zingah hian Football agent Licnei hi an awm kei chuan ka la hre lo va, an lo awm a nih pawhin an tam lo vang. Agent nih hi thil awlsam tak niin lang mah se, Agent ṭha nih erawh chu thil harsa tak leh hna hahthlak tak a ni tih a chiang reng. Kan ramah te ngat phei chuan Football Club Owner, Technical Director, Manager etc te connections va neih ṭhat mai piahlamah, va biak peih a, va kawm ngeihte pawh a ṭul viau a ni.

Tun dinhmunah hian India-ah hian Football agent 300 chuang awm anga hriat a ni a, mi tam zawk hi chuan agency/company din kher lo hian hna dang thawk pahin football agent hi an ni ṭhin a, mahse hengho hi chu an hlawhtling lovin an tei rei peih lo tlangpui ṭhin a ni. Kan ramah pawh hian mumal taka license nei thlap, Agency company dinte pawh an awm nual a ni. Chungho zingah chuan ka hriat ang angte leh kan Mizo players tute ngeawm tihte kan hriatna tizau atan han thailang dawn ila.

1. World 1 Sports: World 1 sports hi tunhma kha chuan Football Solutions tia hriat lar an ni a, an hming an thlak chhan hi chu foreign company te nen zau zawka an thawhho duh vangte pawh ti ila a sual awm lo ve. An CEO hi Varun Achreja a ni. Anni hian Champhai lamah Young Legends League te lo kalpuiin, Mizoramah hian hma an rawn la nasa ṭhin hle a, anmahni lo hmelhriat pawh kan awm nual ang. Anni hian players 68 neiin India Football Agency-te zingah chuan an nei ngah ber nia hriat a ni. Tunah hian anni hnuaiah hian kan Mizo players ṭha awmte tlem azawng han tarlang ila.

i) Jerry Mawihmingthanga
ii) Jerry Lalrinzuala
iii) K Lalthathanga (Puite-a)
iv) Daniel Lalhlimpuia
v) LalrindikaRalte (Didika)

2. Best of You Sports: Anni pawh hi tunhmaa The Football Edge kha an ni a, Best of You Sports Global, Foreign lam nen tie-up an neih avangin Best of You Sports, India tih an ni ta a ni. An agency CEO hi Anuj Kichlu a ni a, experience nei ngah tawh tak niin Baichung Bhutia leh Reneddy Singh te lo enkawl tawh ṭhintu an ni. Anni hi a hmaa kan sawite ai khian players hi an nei tlem zawk a, 65 nei nia hriat ni mah se, Sandesh Jhingan, Jeje Lalpekhlua, Pritam Kottaletcte an neih avangin India Football Agency-te zingah chuan players market value belhkhawmin hlutna nei sang ber an ni. Anni hian mipa mai pawh ni lovin hmeichhiate pawh players an nei. Chung zingah chuan tuna Rangers FC-a khel mek Bala Devi pawh hi a tel a ni. Kan Mizo players ṭha awmte han tarlang ve leh ila.

i) JejeLalpekhlua
ii) Lalengmawia (Apuia). Apuia hian tunhnaiah a agent hi a thlak nia hriat a ni.
iii) Laldinliana Renthlei
iv) Lalramchullova

3. Four Flags: Anni hi agency hi tunhnaiah hian an ṭhang chak hle a ni. Four Flags founder hi Sonu Lamba a ni. Anni hian India Football Legend Sunil Chhetri an nei a ni. Sunil Chhetri bakah hian Manvir Singh, Udantate ho pawh an awm ve bawk a, tuna kan India Senior team (World Cup Qualifiers khelh zawh tak) ah hian players thawh hnem ber nia hriat a ni. Mizo player erawh hi chu an nei tam vak lova, an neih zinga ka hriatte han tarlang ve leh ila.

i) Edmund Lalrindika
ii) LalengzamaVangchhia

Heng kan tarlan takte 3 hi India ramah chuan tuna kan football agency kan neih ṭhat berte nia hriat an ni a, an zingah hian tu nge ṭha ber tih erawh sawi thiam a har hle. (Vanneihthlak takin anni, agency founder te khi Football avanga ka hmelhriatte leh ka ṭhiante ka tihtheih vek an ni a. An vai hian an smart hlawm hle a ni.)

Heng agency 3 ho bakah hian The Sports Company, Lianzuala Chhangte awmna, Treble Sports Management leh Birbal Sports and Entertainment, kan Mizo players tam tak awmna hi Top 10 Agency thlang dawn se chuan an lang pha ve ngei chuan ka ring.

Kan Mizo players football lo khel tawhte leh la khel zel turte hian Agent kan thlan thiam hi a pawimawh em em a ni. Kum 18 la tling lo phei chu Agent neih hi danin a la phal lo va, kan nu leh pate hi kan Agent-te chu an ni. Agency te nen inremna siam a nih dawn pawhin kan nu leh pate'n inremna an siampui zawk tur a ni. Hei hi tuna Mizo players Academy hrang hranga awm mekte leh lo la khel zel turte hian kan hriat a ṭha.

Agent thlan hi hmanhmawh chi a ni lo va, chuvangin Agent nei turin keima'n performance ka nei em tihte pawh kan inzawh a pawimawh awm e. Agent ṭha tak neih a, keimahni kan ṭhat leh si loh chuan awmzia a awm lo ve thei bawk. Chuvangin, Agent te hi an awm belh zel dawn niin a lang a, chumi hunah chuan, “I agent ka lo ni ang e,” tia sawmna dawn hi hlawhtlinna a la ni lo tih hriat a ṭha. Sawmna kan dawng a nih pawhin uluk takin eng agency nge an nih, eng nge an hmalak tawhna leh tute nge an players te, ka kum ang rual an tam em tih leh ka position-a khel ve an kawl hnem tawh em tihte lo zawh nachang hriata uluk taka thutlukna siam a ṭha ber ang.

Asoma