DAN ṬHA LO

India dan pakhat IPC Section 124A–Sedition Law chungchang chu Supreme Courtah sawiho a ni a, zalenna kan neih aṭanga kum 75 hnuah pawh la hman zui zel chi a nih leh nih loh te, zalen taka kan ngaihdan puanchhuahna a khap em tih vel chungchang an khel a ni.

Sedition Law chuan inrem lohna thlen zawnga thuziak leh sawite hremna a sawi a ni ber a, British hunlaia siam tawh a ni. He dan hi Mahatma Gandhi lakah hman lo ni tawhin Chief Justice chuan, 'Colonial law a ni a, zalenna a rapbet a ni... Mistiri hnena thing tan phalna pek a, ram vahna atana hmangsual ang a ni' a ti a ni.

Hemi thil hmang hian Manipur mi Erendro Leichombam pawh man a ni tawh a, mahse Supreme Court chuan chhuah nghal turin Sorkar a hrilh nghe nghe a ni. A thu post chu, 'Bawng zunin COVID-19 a tidam lo' tih a ni.

Sedition Law ber hi ka sawi tum a ni lo a, 'Kan ṭhatna tura dan siam hrulah hian dan kengkawhtute'n an duh danin dan an kengkawh ṭhin em?' tih leh 'Kan dan siamtute hian mipui huapin an ngaihtuah ṭhin em?' tih hi ngaihtuah zui a ṭha awm e. Khua leh tui ni ṭheuh ṭheuh hian dikna chanvo kan neih dan te a inchen em? Thil ṭha kan duhna hian a aia ṭha lo zawk bawhchhiat a neih leh neih lohte hi kan chhût ngun a ngai hle mai.

Kan dante hi Democracy kan nihna angin mipuite tana siam a ni a, mi tu pawhin kan duhzawng kan tih theihna tur te, chutiangin midang tana hnawksak a thlen loh dan turte a ni hlawm a. Mahse dan ṭha lem lo kan neih chuan a kengkawhtute'n dik lo takin an huatzawng hremna atan an hmang thei ṭhin a ni.

Chutiang dan hmang chuan an huatzawngte an man ang a, thiam loh chantir an ni thei a, mahse an duhsak zawngte man chuang si lovin an ngaidam leh si ang a, an duh angin rorelna an kutah an keng tlang thei tihna a ni dawn a, hei hian thil pawi tak tak a thlen thei; an thiltih inang rengah a titu azirin rorelna inang lo an dawng thei a, dan kengkawhtuin a duh dana Dan a hrilhfiah theih avangin intlawnna, inthamna a thlen thei bawk.

Kan dan neih hrang hrangte hi mipui tana hnawksak thenfaina atana hman a ni em? Kan dan ṭhenkhatte hian man ngam bik leh man ngam loh bik an nei em? A kengkawhtute hnenah an duh dana thuneihna lekkawh theihna a pe tel emṭ Kan dan hian mipuite welfare aiin mi ṭhenkhatte welfare a ngaipawimawh zawka ngaih theih a ni ṭhin em? Dan ṭhenkhatte hi mimal emaw, pawl ṭhenkhat bik nawrna avanga siam a niin kan hre ṭhin em?

Dan ṭha lo bawk, a kenkawhna lama rualkhai lo phei chu mipui nawlpuite tan a hnawksak hle ang a, a tuartute hi an dikna auchhuahpui ngam lo an nih lek phei chuan pawnlama fai vur si hian inrahbehna nasa tak kan society chhungah hian a thleng thei viau a ni.

Sorkar ṭha chuan dan ṭha tak, mipuite tana ṭha a siam ang a, a kenkawhna lamah pawh theihtawp a chhuah ang. Mahse dan ṭha lem lo thil, sorkar sum hmuhna tur ringawt emaw, a bei let ngam lotute nekchepna tur emaw, bawngsa ei duh bikte hremna dan emaw, pawl ṭhenkhatin an nawr nat bik vanga dan emaw a siam fo chuan mipui a huap zo lo fo ṭhin.

Mizoram hi pawl hrang hrang kan tam bawk a, sorkar pawh kan pawt sawi nasa thei viau mai. Mipui huap zo lo, mahni pawl duhdan ang ṭheuh ti turin sorkar kan kar fo a, sorkar pawhin fim takin thil a ngaihtuah hleithei lo fo ni pawhin a lang. Chutihlaiin pawl hruaitu rilru changkang tak tak kan nei ve tho a, chu'ng hruaitute chuan an pawl aia ram dah lianin sorkar nawr dan tur tawk an hre ve bawk a ni.

Chhana Ralte