Covid 19 kan hlauh luat vangin nunna kan chân em?
Kan hriat angin Covid-19 in Kolasib District min luhchilh mek a, Positive thar apiang mai kaina chin hriat loh a ni ta zel mai. (Covid nêna lendun kan la thiam lo a ni thei em?)
Hetih lai mek hian kan hlauh luat vang hian nunna kan chan zel dawn em? tih chu thil ngaihtuah zui ngai tak a ni.
Tunhnaiah Kolasib District Hospital-ah Emergency-in dam lo nikhawhrelo ṭum thum khawtlanga ka thawhpuite nen kan buaipui a, Casualty indahluh hmain Covid-19 test paltlang a ngai a, Test result nghah chhung mi pakhat tan 15 min bawr vel a ngai ṭhin. Damlo kan hruai Casualty-a luhpui tur pawhin, test paltlang a ngai. Eng anga Emergency pawh ni se Covid-19 test result chhuah hma chu doctor leh nurse -te'n an khawih thei lo. Hmanhmawh taka nunna chhan tura tlanluh pawhin test result nghah a ngai, a chang chuan emergency e ti lo chuan a test-tu tur koh a ngaih chang pawh a awm. Result a chhuah hma chu nikhawhrelo; hmanhmawh taka damlo kan tlanpui pawh casualty kawtah motor chhungah kan la dah a ngai a, medical miten khawih thiang loah an ngai. Result chhuah veleh test result hmanhmawh taka tlanluhpuiin duty va hmuh hnuah Casualty-ah zawn luh an ni chauh ṭhin. Tunhnaia emergency-a casualty-a mi 3 kan buaipuite pawh result a chhuak a, casualty kan han luhpui a, doctor-in an en meuh chuan brought death (a thi saa luhpui) a nih hi min tihsak.
Nizanah kan venga mi hnamdang zirtirtu chu zan dar 11 bawr velah a chauh vangin Private Hospital panpui a ni a, Private Hospital-ah an en hmain Covid-19 test hmasak a ni a, a fapa a kalpuitu pawh test a ngai, result an nghah hnuah vanduaithlâk takin damlo hi a positive hlauh, positive a ni tih hriat a nih hnuah Hospital a pan chhan engmah beisei tur awm loin Seṭhawn CCC-ah phurh chhoh tura buatsaih nghal a ni. Thu dawnnain a sawi danin medical mi tu mahin Hospital zan rei tawh lama an pan chhan ber a taksa chau chu endik a ni lo a, ambulance-ah phurh chhoh turin buatsaih nghal a ni. A fapa Ambulance-a paw lut tura tih lah, a la naupan avangin a pa hi a paw zo lo, mita lo hmutute sawi danin a chauh em vangin Ambulance-ah pawh hian a vak lut a ni ber an ti. 'tiang khawpa taksa chau, doctor thiamteah beiseina neia an pan laiin, inenkawlna ṭha pawh awm lohna hmun Seṭhawn CCC lamah phurh liam a ni a, zing dar 7-ah chuan a fapain a taksa a'n khawih, a lo dai vek tawh kaihthawh tur a awm tawh lo, rilru a khawih takzet a ni.
VLTF-ten hri a darh loh nan invenna tur hmanraw ṭha pawh nei loin chhun zanin veng chhungah hma an la, VLTF hruaitu zingah Covid-19 Positive an awm nual. Hetih lai hian kan Medical mite thuam nei ṭha zawkte'n nunna chhan tura, Covid kan rálpui hlauh tlat mai hi a pawi takzet a ni. A zawng zawng chuan an ni kher lo maithei, ka tawng fu ve deuh hrim him nge ni. Hri vangin nunna kan chan a, hri hlauh luat vangin nunna kan chan bawk. Sorkar aṭanga invenna tur PPE leh glove-te sanitize-te kan dawng ṭha lo a nih pawhin khawtlangah mi inphalte leh mi inpete aṭang pawhin kan District inenkawlna tur mamawh chu kan hmuh a rinawm.
State dang leh Ramdangten Covid damlo an enkawl dante leh Hospital-a damlo an enkawl dante hi inzirnan hmang ila, hrilen ṭantirha China medical team-te inpek dan kan hmuh aṭangte hian rilru thar pu thei ila a va duhawm dawn em, nunna hi a hlu si a.
Manghaka, Kolasib