VAI FINNA LAKAH INVENG ILA

Vai finna han sawi hi chuan ‘phakar’ tih hi a ri tel ve ziah. Mizote finna leh Sapho finnate chu a dang leh a. Vaiho fin danah chuan sum dawnnaah te, Politics-ah te, anmahni dawr­tute tana ṭha lem lo turah pawh an tana ṭha tur a nih dawn phawt chuan chutiang ang chu kalpui an duh ṭhin. 

Chutiang ang chu a tirah ṭha deuhin a lang a, a rei hunah a ṭha lo telh telh ṭhin. A tirah an thil tih puite nen inrem takin a hlawkna an tel tlang a, engtiklaiin nge tih pawh hriat hman lohin thil an lo tidanglam hret a, chuta ṭang chuan anmahni an hlawk telh telh a, an thiltih puite an hlawk lo telh telh thung ṭhin. 

Vai fin phakarna avangin Mizoramah sum dahna phuah chawp, Bank lem tam tak hawn a lo ni tawh a, mi tam tak ten an sum neih chhun an dah a, thil ṭha taka a kal laiin chhuanlam eng eng emaw an siam chawp a, chutih laiin an sum dawn khawl sa te vai ramah an chhep relh a, a tawpah chuan sum dahtuten an chan fai vek ṭhin. 

Chutiang tih ching­ho chuan a tirah policy ṭha tak anga langin an tlangzarh a, a rei deuh hnuah an dan siamte chu an palzut leh mai ṭhin. 

Dikna palzut te chu eng thamah mah an ngai lo. Mi fingah an inngai zawk hial niin a lang. 

Heng Bank lem leh pawisa dah punna te avang hian Mizorama chhungkaw tam tak chu an lo rethei zo tawh a, chhungkaw tam tak chu lungngaiin an ṭhu mek a ni. Heng thil dik lo titute puibawmtu-ah hian Mizote ṭang lo ila, eng anga hlawkna tur pawh ni se kan hnar ngam zel a ṭul a ni. Hetiang ang lakah hian Zo fate kan fimkhur thiam a ṭul. 

Tunlai hian mobile phone lamah an ṭuan leh mek a, suma inbum­na laka kan him theihna tur chuan, lo chhan let loh tawp mai kha a him ber a ni. Vaiho hi an sual e kan tihna chu a ni miah lo, mi ṭha tak tak, dikna ngainatu tam tak an awm ve a ni. Amaherawhchu, keini ang mi fing lo takte bulah hian sumdawnna hi an kal pui ṭha duh lo zawk nge ni hriat a ni lo. Vai chhangthawp siam te pawh hi a tirah chuan an siam lian ṭha viau a, a rei hnuah chuan a te telh telh tawh mai ṭhin a ni. 

Tunlai CAA an tih te pawh hi Central-a Vai mi finghovin an rawn duan chhuah a ni. India Constitution duangtute khan phakarna tel miah lovin a ṭha theih tawpin an siam a, tunlai Politician te erawh chuan an awmna party tana ṭha tur zawngin hma an la fo ṭhin a ni. 

CAA hi India rama hnam tenaute chim­ralna a thlen thei tura ngaih a ni.

 

Mizote hi hnam tlemte kan la ni a, kan ramah pawisa hlirin min rawn vur dawn mah se, kan hnam ralna tur a nih dawn chuan kan do tlat tur a ni ang. Mizo ka ni a, mahse ka awmna hnam kha a ral chuan a hma angin hlutna ka nei tawh lo ang. Hnam tana thil hlauhawmah chuan in phatsan lovin kan do tlan a ṭul. 

CAA avangin mi vaibelchhe tam tak an lo luh hunah chung ho chuan CAA duang chhuaktute chu, vote leh an theihna apiangah an vulh lian reng tawh mai dawn a ni. 

Kan ram pawnah hian maktaduai tam tak chu ram nei lo vai an awm mek a, heng zing aṭang hian firfiak te, thihchilhtute an lo chhuak ṭhin. An hlauhawmin pawisak an nei tawh ṭhin lo. Tunlai thil awmzia hi Zofate hian kan mitmei reng chu a va ṭul em!