PATHIANNI BAWHCHHIAT

Vanglaini ni 27-1-2018 chhuak ‘Ngaihdan’ tih column a Pu/ Tv. Ramropuia thu ziak ‘Pathianni bawhchhiat’ tih kha ka lo chhiar ve a. Han tuihnih ve hlek ṭha in ka hria a, chuvangin a thupuiah pawh ‘Pathianni bawhchhiat’ tih bawk ka han hmang ve nghal mai a ni e.

‘BJP sorkar hnu hin Pathianni ngaih pawimawh lohna a lian ta’ tia a han sawite kha a dik hle a, kan ni pawimawh ber mai Krismas nite pawh Good Governance Day-ahte an puang duh hial mai a, a mak khawp mai. Tin, Central Minister Mizorama lo zin turte pawh Pathianni kher kherin an lokal ta fo mai a, heng thilahte hian in enfiah a ngai viau awm e.

Enga pawh chu ni se an ni Hindu kulmukhote chu an duh duh ni-ah an lokal ang chu. An tan Pathianni hranpa a awm ve lem hlei nem. Eng nge hetianga an lokalte hi kan lo sawisel fo le? Keimahni zawk hi kan pawimawh zawk fet lo maw? Anni khualpang zinte chu an duh hun hun leh an duh ni niah lo kal se la, Pathianni, kan ni serh bera an lokal a nihte chuan kei ni Kristian ram, Pathianni chu engmah ti lova serhtute kan ni a, a hmuah pawh lo hmuah duh hauh loh mai tur a ni dawn lawmaw ni le?

Kan rin Pathian lam ngaihtuah lova, khawvel lal lokal tur kan lo buaipui tlat zawk chhung hi chuan min pal dal tum chuan an lokal zing telh telh zawk ang tih hi hriat a ṭha hle mai. An lo zin dawn chuan zin programme-te pawh an han pe lawk ngei chuan a rinawm a, hemi hun takah hian Pathianni a lokal tur an nih chuan airport-ah kan lo dawngsawng thei dawn lova, eng programme mah hemi ni hi chuan kan buaipui thei dawn lo tihte lo hriat lawk tir ni sela. Chuta an lokal lui a nih ngat chuan kan sawi lawk ang ngeiin ti tlang ta ila, an lokal nawn fo chuan a rinawm lo a ni.

Tuna a lan dan chuan engmah sawi ṭha ngam lovin, rilrua inthiam vak lo chung siin, ui dawih zawk an sawi ang maiin, meikhupin kan lo hmuakin, programme kan lo hman pui ṭhin niin a lang. Secular State kan nihnate pawh lantir a hun hle a, tih rualin Special Provision State kan nihnate hlei hlei hi lantirna hun ṭha tak a ni zawk lo maw le? Nge kan state hi kan rethei em a, kan hotupa sawi dan takin ‘chawm hlawm state’ kan ni si a, kan retheih avang hian Pathian pawh kan tih hman lo zawk le?

Kan hotupa ber pawh kum heti zat Chief Minister a ni chung leh NLUP ṭhami heti zat a sem chung pawhin a ṭawngka lamah ‘chawm hlawm state’ tih te, ‘state rethei ber’ tihte ala sawi cham chi a, kan NLUP lah a hlawhtling hlein sawi a ni bawk si a, a thu leh ui beng hlin thiam a har hle zawng a ni e.

Kan Krismas ni lah ‘Good Governance Day’ tiin min puan sak a, hengte pawh a puan tan kum kha chuan han hmang tawk pawh kan awm nual a ni lawm ni le! Hetiang kan sakhaw ni pawimawhte kawng danga an her a nih pawh a ngawih reng hi a fuh ber dawn e maw ni le? Kan Good Friday nite pawh chutia Bank Holiday a puan a nih leh zel pawha lo ngawih reng hi a fuh ber lovang a! Central ngeng chhun thei deuh turin state mipuite hriatah tal hi chuan vaupung han tih nat ve deuh awm tak a ni lo maw le? Thil dang ṭul vak lo tak takah pawh kan ṭawng theiin kan vaupung a na viau si. Zu zawrh chungchangahte pawh Kohhrante vauna dengkhawng tak tak kan auchhuah pui thei si a, tih laia kan Kohhran ni pawimawh hetia an pawngsual tumna lama kan kha a chih leh tlat hi chu kan va zuamawm dawn tak em!

Hetiang a nih avang hian kan hotupa ber hian Pathianni bawhchhia a lokalte hi chu lo welcome duh lo ngam se, a hote leh a department concern-te pawh welcome lo turin thupek chhuah ngam se, rei chu an han ti lui fo ngam lovang a! Pu Laldenga sorkar leh India sorkar inremnaah pawh khan ‘kan sakhaw tihdan phung kalh zawng reng renga dan siam tur a ni lo khan sawi a ni si a, chuvangin he lamah hi chuan huaisen i zir teh ang u. BJP leh Central Minister an nih vanga mei khupa lo awm ngawt zawng a dawihzep thlak deuh a ni e.

Patrick Z, Chhingchhip