ACTIVE LEARNING THLEN THEI ONLINE CLASS CHU

Jackie Chan kum 67 mi, a hming tak Fang Shilong, a lemchan thiam avanga mi hriat hlawh leh hausa ta em em, a ro sum hlutna belhkhawm pawh US dollar maktaduai 370 lai tling thei, khawvel Actor sum ngah zinga 13- na ni phak, a Film channate hmuhnawmzia, makzia, finzia leh remhriatzia chu hetiang hian a tarlan theih ang; a buaina leh harsatna tawpah pawh chiai mai loin a awm thei a, a inchhanhimna turin thil awmsa, a hmuh remchan apiang hmangin a mamawh hmanrua a ngaihtuah chhuak mai ṭhin, a hmang thiam fu zel bawk si. Hei tak hi a entawn tlakna chu a ni thei awm e.

Hunkhirh ang reng tak, hripui, kang mei anga chaka leng khawvelin a hmachhawn laiin thumal pahnih lar tak kan hre thar ta, chu chu ONLINE CLASS zirlaite tan tih hi. He Online class hi zirlaite tawrhna thawi dam nana ngaihtuah chhuah a ni deuh ber. Kan state bika zirna lam, class I aṭanga class XII thlenga hotupa ber leh hotu dangten inthlahrung em em a, an rawn lek chhuah dek dek a ni. Zirlai 50% tal pawhin a hlawkna lo tel se la a pawi lo ve, ti lam deuhin thu an nei a ni. A dik a ni, tih loh tawp ai chuan ṭha tak a ni.

Online Class hian neuh neuh ṭul leh mamawh a ngah hle ang, kungkaih leh zawmpui peng pawh a tam khawp ang. Mahse, SMART PHONE a awm a, chu ngei mai chu Online Class tana ṭangkai leh remchang tak, zirtirtu tam ber pawhin an neih a ni. Kan phone tih-Smart chauh duh tawk loin keimahni pawh inpenparhin, intuaihnum ila, zirtirtu smart-in, smart phone-in, smart class la se tih hi hotute chauh ni lo zirlai chhungte zawng zawngin an beisei a ni. Kan service tam tulh tulhin kan inpawmbawr peihna tipung zel se. Zirlai zirna chaka tuihal huam huam leh chhan dang vanga khawng khawro un maite, tui thianghlim lo tulh leh sahriak ṭha tak lo chulh mawlh mawlh hi ṭul tak a ni. Nu leh pa kan thurualpui chuan kan hna a sawt hle ang.

Active Learning awmzia leh kal hmangah chuan hetiang hian, zirlaiin a zir lai ngaihtuahin a bawhzui thin. A zirtirtu thu ngaihtlak ringawt duhtawk lovin, mahnia tih ve tur a nei ṭeuh tih a hria a, a zirlaiah a inhnamhnawih a, a che chhuak nge nge ṭhin. A zirlai leh a kaihhnawih a zawtfiah a, a zawhna chhannate a phuahkhawm a, project-a siamin hnaah a hmang a, internet hmangin research a nei a, a zirbing ṭhin. Thil tak tak a lema chan chhuah, Role Play-te leh a ṭha zawk leh dik zawk hre tura inhnial fiamna, Debate-te a zirna ṭanpuitu atan a hmang ṭhin a ni.

Tichuan, a zirlai phur tak leh thiam tum taka zirtu chu Active Learning chhawrtu leh vawngtu a ni a, hengte hi a hrethiam tawh ṭhin; eng nge a zir tihte, engti anga zir nge a nih tihte leh a thil zir chu engti ang taka ranga zir thiam nge a nih tihte chu. Tunlai Technology hian zirtirtute chu min pui thei ngei tak a; nimahsela zirtirtu hi zirlaite zawhna lo chhang a, amah, zirtirtu ngeiin a siam zawhnate, zirlaiin a chhana lo dawngsawng a, lo chhang a, lo hrilhfiah theitu ṭha ber a la ni.

Zirtirtuin zirlai, lesson a chhawpchhuak ang, chiang leh fel takin a zirtirin a kaihruai ang, a thil zirtir chu finfiahna hmangin a dik ngei a ni tih a tilang ang, sipai za hotuin a sipai ral hmatawnga awm, a la fuih tharin thupek a la pe reng ṭhin angin zirtirtu pawhin finfiahna hmanga entirna a pek hnuah pawh tih tur a la nei a ni. Hetianga fel taka inzirtirnaah chuan Active Learning a lo hnam chhuak tawh ṭhin. Zirtirna inpek hi khawl hmanga robot hna thawhtir ang ngawt hi chu a ni lo, hei hi Online hmanga zirtirna kalpui mekte'n kan vawn reng a ṭul, kan intahhriam deuh deuh hi; Online vang hian a ngai fe zawk a ni.

Zirtirtuin zirlai hnena a zirtirna, zirtur a thawn chhuah tawp mai hi Transmission Style an ti, hetiang Style hi, duh tawh loh, ngaihsan tawh loh, chin zelah duh tawh loh, intihhmuh tawh loh a ni. Online hmanga zirna inpek hi Transmission Style a hnaih hle tih zirtirtuten hriaa fimkhur tak leh inbuatsaihna ṭha tak ngaihtuah tur a ni.

Inzirtirna duhawm leh ṭha, zirlaite sawtpui em em leh Zirlai leh Zirtirtu inthlahdah lova siam theitu chu, ACTVITY BASED LEARNING an ti a ni. Discovery Learning aiin a nep bik awm lo ve. Online class hmanga Active Learning pawt chhuak tur chuan zirtirtu, zirlaite leh nu leh pate ṭha taka inhnimhnaih a, inkungkaih a pawimawh.

Heng vangte hian zirlai ten Online classs an hlawkpui ang ;

1. Zirlai kum leh class mila zirlai, Lesson hriatthiam awlsam, fiahfai tak thawnchhuah. Hriatchianna pawimawh ber chu Zirlai, Lesson-in zirtir a tum hriatchian hi a ni. A buk ṭhelha ṭhelh lo turin zirtirtu inbuatsaihna a tawk.

2. Thu hlawm lian tak, hlawm te tak te tea ṭhendarh theih awmze nei leh indawt ṭha taka remkhawm leh theih si thawnchhuah. Hetiang tithei tur chuan zirlaibu lo pawh thu lak nan hman a ṭul ang.

3. Tawi kim, Lesson kaihhnawih zawhna leh tihtur àwm thawnchhuah. Zawhna siamte chuan hmanlai, tunlai leh nakin hrut tel thei se.

4. Aw (voice) leh chetziaa zirlaite hip thei thawnchhuah. Engpawhnise kan aw, voice hi a fiah hle tur a ni ang, Hmuam chite, ei chite leh in chite nen Online class hi chawhpawlh loh ni se.

5. Ṭawng tlanglawn, mawi leh dik chauh thawnchhuah. Zahmawh leh thu lawi lo anga ngaihtheih pumpelh hram hram a ṭha. Thingpui dawr titi ang leka ngaih loh tur. Thu dengkhawng leh inchungtlakna ṭawngkam zirlaiin a ngaithei ngai lo tih hi theihnghilh ngai loh tur a ni.

6. Entirna, a taka zirtirtuin a tawn tawh ngei zirlai mil tak thawnchhuah. Hetiang tak hi kan nei reng lo a nih chuan zirtirtu ngei pawhin entawn tlaka a ngaihte chanchin ngaihtuah mai pawh phuahchawp leh dawt ai chuan zirlaiin a sawtpui zawk ang.

7. Zirlaiin a zirlai a hriathiam tawh endiksak fo. Zirlaiin harsatna a tawhna lai tak, a thiam loh lai tak, a hriatthiam loh lai takte hre tur chuan ziirtirtuin endik fo a ṭha. Thiam si lo, thiam anga langte, bo lo anga lang bo site, zirlai zingah an awm ṭeuh ṭhin, hei tak hi zirtirtuin a hai hawn tur chu a ni. Zirlaiin a harsatna a hrilh ngamna zirtirtu chu zirtirtu tak tak a ni ang.

Gear Box pakhatnaah chuan, Gear 6 thleng a awm thei, he Gear Box, Domain hi boruak mai leh thil mai maia thun khah a ni lo. Heng thilte hian thun khah muk tlat a ni; Ngaihtuahna, Hriatna, Hriatrengna, Dik leh dik lo hriattheihna, Harsatna chin fel theihna hriatna-tein.

Gear hmasa ber, Level No 1 chu, motor gear angin muang churhin nghet churhin a lang chhuak ṭhin.Zirlaiin a zirtirtu zirtirte, a thu hlan chhawnte, a thil sawite, a thil hrilfiahte a dawngsawng theia a ngaihtuah chhuak leh thei bawk. He, Knowledge Level/Gear thleng hi Mizoram zirtirtu tam berten an zirlaite an lawn chhuahpui, thlenpui theih hram hram niin Educationist-ten an hmu. Step 5 dang lawn lo leh hre lo hian Zirlaite chauh ni lo Zirtirtute pawh kan lo tei mai mai ni mai thei.

Level /Gear No 2 chu Zirtirtuin a zirlaite an zirlai hre thiam tur khawpa a zirtir theihna Stepa a ni. Zirlaiin a thil zir lehlin theihna khawp thiamnate, a awmzia sawifiah theihna khawp thiamnate, tawi fel taka a thil zir leh hriat sawi chhawn leh theihna khawp thiamna chu he level-ah hian a awm. Chu chu zirtirtu zirtir pek a ni deuh ber. Hetiang Gear, Level zirlaite thlenpui thei zirtirtu hi Mizoramin a nei pheuh pheuh chauh a ni awm e.

Zirtirtuin Level 3, Application a thlenpui zirlaite zingah hetiang khawp thiamna nei hi an awm thei awm e, hriatchianna tak tak neitute chu; Luipui leh luite khuap a, kawlphetha siam chhuak thei khawp thiamna neitu. Sapṭawnga Pathian thu sawi leh ṭawngṭai thei khawpa Sapṭawng hmang thiamtu. Sumlu cheng khat pawh nei si lo sumdawng hlawhtling tak. Ziak leh chhiar thiam chang chang chauh nu leh pa nei si, zirna sang University a zirtirtu ni thei, khawvar lam arsi ai pawhin Gear Level No 3, Application muala mahni zirlaite ṭuanpuitu, Zirtirtu hi an tlem zawk hial ang.

Motor Mechanic ṭhenkhat chuan hnehsawh takin Motor Engine hi an thlawn darh vek thei a, dik leh tha takin an rem pum leh thei, a Part hrang hrang inkungkaih dan an bel hle. Hetianga thiamna, bung khat bung tam taka ṭhen thiamna, bung hrang hrang inkungkaih dan hriatthiamna hi zirtirtuin a zirlaite a puak chhuahtir theih chuan Gear /Level 4, Analysis huangah a awmtir a ni ngei ang.Chutianga zirlaite zirtir thiam, zirtir thei chu ram leh hnam HNUNGZANG RUH an tih ṭhinte hi an ni mahna.

US siam Jet Fighter, F-16 chu Pakistan Pilot-te chuan an buh hmun phaizawlah an tlak khukpui vut vut mai ni awm tak a ni, chu Jet Fighter tho chu Israel Pilot- te chuan darkar tam an thlawhpui hmain a Original aia rintlak leh zualin zuk siam danglam thiam a. Israel zirtirtu hian an zirlaite an thlen sanpui hle tih a lang, Level 4 mai lo deuh Level 5 Synthesis mualah an zirlaite an awi thei niin a lang.

Tehfung awmsa hmanga engkima thutlukna dik siam thei zirlai chuan Level 6 thlenga kaihhruai a ni tih a lantir a ni. Thil hlutna leh hlutna lohnate, a ṭha leh ṭha lote, a dik leh dik lote, a ropui leh zahawm lote, a tlo leh tlo lote, a hlawk leh hlawk lote, a hmantlak leh hmantlak lote, ngaihhlut tur dik leh dik lote zirlaiin a hriatthiam chuan Evaluation thleng a zir a ni ang.

Government sikul a ni emaw Mission sikul leh Private sikul a ni emaw; English Medium sikul a ni emaw Mizo Medium sikul a ni emaw, zirlaite hi kan thlenpui Level san leh san loh thua thiam a, thiam lo mai zawk an ni. Sikul, result nei ṭhate hian nei ṭha lote ai chuan an zirlaite Level /Gear sang an thlenpuiin an luhpui nge nge zawk a ni.

Miten min thlir ṭhup, ṭhenkhat phei chuan ka mei rap se an ti ang, a ṭhenin min nuihna tur an lo chang ṭhup ang. Kan class room a zau ta, a lang tlang vek, lang thei lo reng awm lo INBUATSAIHNA ṬHA, Lesson Plan hmanga tih nghet a va ṭul lehzual em. Kan zahawmna hnuh let nan Online Class hi hman tum teh ang.

Mizoram zirtirturte'n kan bo tawh hnu, Fakna leh Chawimawina thliah leh a, khum reng turin ONLINE CLASS-in puan ven sawi chhing ila, Zirtirtute chu “Multi- talented individual” tia fakna, a thangkhawk ngei ang.

R.Lalthangliana, Kanan veng, Aizawl.