Negative Certificate

Covid-19 avangin Mizoram Damdawiin hmun tam takah Covid Negative Certificate nei lo chu inentir theih a ni tawh lo! Emergency ah tak ngial pawh Covid test zel a ngai hi chu ennawn a ngai a ni.

Medical Staff te tih ang chiah hian dawrkai zawng zawng hian an dawr a thil lei chu Covid Negative Certificate lo phut ve ta se la? A nih loh leh Bank-a thawkte hian an tih ang chiah hian lo ti ve se la engtin nge kan awm ang?

Covid natna do hneh tur hian hrisel a ngai a, natna hlek neih chuan in enkawl zung zung hun anih laiin a khawlhkham zawnga Sawrkarin hma a la hi chu ennawn a ngai takzet a ni. Doctor te hian OPD-a an thut chhung chauh tal chu PPE full set an ha thei mai lo em ni? Emergency case-ah pawh Covid test hmasak zel a ngai hi a zia lo lam deuh a ni. Min enkawl tura Sawrkarin hlawh neia a rawihten heti em ema an damlote an hlau mai hi a dik em? Entirna'n, mi; Stroke avangin casualty-ah emergency-in kal se Covid test nghah chhungin chhan hman lohvin awm se a dik dawn em ni?

Mizorama Retailer zawng zawng hian Covid Negative Certificate nei lo chu Buhfai pe duh lo ta se kan dem ang em?

Truck Driver ho hian, "In khaw­tlangin Covid Nagative Certificate in neih loh chuan in khuaah Buhfai kan dah lo ang," ti ta se kan dem viau ang. Doctor an nih avanga anmahni dawrtute Negative Certificate an phût hi eng nge a dik bikna?

Kan Sawrkar hian ngaihtuah ṭha leh rawh se. Covid Symtom nei pawh ni lo – kut sât palh, kawng herh leh beng kherh tih vel leh pumnate pawhin Covid test nana Rs. 200 kan chawi zel chuan tunah Lockdown avanga thawhchhuah nei lo tan chuan a luhaithlak takzet a ni.

Marema Ralte