Covid +ve Exit test neih loh hi kan pawm chiah lo a ni.
Kan ṭhian pakhat chuan, "Mahni puar chuan ṭhiante rilṭam tawrhpui chu ziaawm tak a ni," a ti fiamthu ṭhin a. He thu hi tuna Covid-19 positive-te chhuak tur kan tihdan nen inang riauva hriatna ka nei a. A ralmuang chin aṭanga a vei mekte tana relsak chu ziaawm tak a ni a, mahni chunga a tlak erawh chuan a reltute ngei pawh hian ngaihngam takin an lo khawsakpui ang em? tih zawhna a lian khawp mai.
Sorkar-in Covid-19 positive-te chu a enkawlna aṭanga an chhuah dawna an dam leh dam loh endik kher tawh lo a, natna lanchhuah dan (symptoms) an neih loh chuan an vei aṭanga ni 10-naah a Se zawl chhuah tawp mai hi chu mipui hian kan pawm chiah lo niin a lang. Medical team lam leh sorkar hotute lam aṭangin an han sawifiah ngial a, media lamah te an han thehdarh a, Scientific proof a ni a, a rintlak a ni te an han ti thar ta thut chu a ni a. Amaherawhchu mipui lam leh a veitu (+ve) te chu sawi loh, Medical mi leh sate ngei pawh hian kan la pawm ngam zân lo deuh niin a lang.
Mipuiin kan pawm ngam chiah lo a ni tih lanna point 2/1 lek han tarlang ila :
1. Aizawl veng pakhat (veng hming sawi lang kher lo mai ang) CCC-a thawk Nurse chu a positive hlauh mai a, ni 10 a awm tlin hnuah insawiselna engmah a neih loh avangin CCC aṭangin an chhuahtir a. Mahse, a chhungte bula han haw tur meuh chuan Negative Certificate nei lo chuan a ngaih a ngam bik chiah lo a, Private hospital-ah RAgT a ti a, a negative tih a chian hunah chiah a haw ta a ni. A awmzia chu a enkawlnaa thawkte ngei pawhin an pawm ngam chiah bik lo a nih hmel.
2. Aizawl chhimthlang lama veng pakhata 4C-a an enkawl pakhat chu July 20, 2021 khan sorkar thu angin an chhuahtir a, a chhuah ni hian LLTF lam chuan Pvt. Hospital-ah an test-tir leh tho a, a lo la positive hlauh nghe nghe a. Mahse, a lo chhuah tawh si avang leh a chhungte an inhuam tho avangin 4C-ah chuan an dah lut leh ta chiah lo. A chenpuite rilru chu ka hre pha lo naa, ṭhenawm khawvengte rilru chu ngam chiah loh deuh a rinawm.
3. Vanglaini July 23, 2021 (Zirtawpni) chhuak a, "Hripui vei dam tawhte chhuahtir danah sorkar thu anga kal leh kal lo an awm," tih thu lo langah, Aizawla veng ṭhenkhat chuan Sorkarin exit test neih ti lo mah se, veng bila LLTF thu angin exit test neihtir zel veng tam tak an awm thu kan hmu a. Tin, exit test neihtir lo veng pawhin Sorkar thu hi an pawm chiah bik lo tih lan nan an chhuah aṭanga ni 7 inkhung hrang tura an tih thu kan la hmu bawk a ni.
Rilrua zawhna awm ta chu, tuna kan medical team lamte hi an chenpuite ngei positive ve ta se, harsatna nei lovin ni 10 a ral hnuah test engmah ti lovin rawn chhuahtir ve ta se, ngaihngam takin an lo pawm ang em? Ni 7 chu an lo khung hrang ve leh tho mai lo'ng maw? tih hi a ni.
Engpawh ni se, tuna kan kalhmang hi chu, "Kan kawmthlangte'n sa min pe... paih dawn leh sa ni si; ei dawn leh... ni si," tih ang vel a ni ber awm e. Medical Team lamin an sawi hi a dik lo kan ti pawh a ni lo, a dik loh kan ring pawh a ni chuang lo. Amaherawhchu kan rilru erawh a la dam lo a ni tih chu thil chiang tak a ni thung.
Heng thil vangte hi a ni ang, keini veng lam LLTF chuan Positive lo chhuak tur reng reng chu Test nei lo chuan an in lama haw an remti rih lo a, Home Isolation te pawh test paltlang lo chuan chhuah zalen an tum lo a ni.
H. Lalchhandama, Bungkawn