LOCKDOWN KÂRA MIRETHEI ÂU AW!
Inthlan lai te, ramin harsatna a tawh laite hian miretheite hian hriatreng an hlawhin, hmatheh an ni fo ṭhin a. Miretheite hma ngai taka thusawi hi hnial ngamawm a ni lo fo.
Mak ve deuh chu, Kohhran inkhawm leh nihphungah pawh hian, miin Thlarau thianghlim ṭawng chhana thu an sawi miau chuan hnial a hrehawm duh hle. An awmdana kan rin loh zawng takte pawh ni se, Thlarau thianghlim an ṭawng chhan tlat chuan, a chhe berah pawh ngawih a ṭul fo ṭhin a nih hi! Vawi khat chu Ka Pû Upa Lalhlira Sailo kha inkhawm chairman a ni a, mihlim nu pakhat kha a lam ṭûl reh hleithei lo va. Ka pû khan programme kalpui a duh tawh si a, a kalpui lui ta a. Mihlim nu khan kut zungchal vilik vah chunga a ṭhutna pan pahin 'Kan zingah Lalpa Thlarau lal ber rawh se' tiin a han au ṭhat ṭhat a, mipui an amén dual mai. Ka pû khan zawi sup hian, 'Umm a ṭha e' a ti sup ringawt!
Ni e, ram leh mipui himna tura khawtlang inenkawlna kawngah mipui zawm tur dân zam a nih chang pawhin, roreltute nekna atana kan hmanraw hriam ber chu Miretheite âu âw hi a ni fo mai.
Retheihna hi a taka tawng ve lem lo tân chuan sawi hi a nuam viau a ni maithei a, han retheih tak tak chuan âw chhuah ngam erawh a har hle. Pheikhawk bun tur neih miah loh avânga silipar nena khawlai len a zahthlak em em laiin, in lama a ṭha bun tur nei tân ke lawnga kal a zahthlak lo ang deuh hi a ni awm e.
Thingpui pâwtna tur nei zo lo tan thingpuisen sawi mawi ve ngawt hi a zahthlak ru tlat a, kekawr ṭha nei zo lo tan kekawr ṭet hak a zahthlak em em laiin, a ṭhenin a ṭha lai an zai ṭet lui thung a. Hringnun hi a har mang e.
Kan damdawi Inin min zo lo ṭan, enkawla dam thei hi enkawl sen loh avânga thih puk a hlauhawm a ni ngei ang, kan hruaitute'n a tihdan awmchhun Lockdown an han pawt sei leh ta. Lockdown pawh sei hi an duhthusàm a ni bik hauh lo vang tih a rin theih. Miretheite kan âu/âutîr ṭan leh ta luai luai mai le!
A hminga thlakipa hlawh lo nei ve dek dek tan chuan ngaihdan sawi pawh a inthlahrunawm ngei mai. Politician te leh sumdâwngtu te, rawngbawltu leh kan zavaia kan hmangaih rawn êm êm miretheite kan âu chhuahtir miau ṭhin avángin.
Keini, veng hmawr deuhva awma, mirethei inṭhenawm pêt pêtho kan han titi khawm erawh chuan, "Keini chhûng hi chu kan vei palh chuan inenkawlna kan nei dâwn si lo va, pawna chhuah loh hrim hrim hi kan tan chuan a ṭha a ni mai, Pathian leh ṭhenawm khawvengte zarah kan nghei bik em lo'ng chu, a damin dam teh phawt ila," kan ti chuai raih mai thung si!
Miretheite aiawha âu ṭhinte hian kan sawrkar lai hian miretheite hi hre reng ṭhinin, kan dâwr thilte hi rate tlâwm zawkin zuar thei ṭhin ila chuan retheihna hi eng emaw chen chu kan ram aṭang hian kan ûm bo ngeiin a rinawm khawp mai.
Miretheite âu aw dik tak hi Campaign Hall aṭangin emaw, Social media platform aṭangin emw kan hre tak tak ngaiin ka ring lo. An âw hian heng puipunna hmun leh technology hmanga inkawmkhawmna hmun hi a thleng pha ve tlat lo.
Mirethei âu aw dik tak chu, an in chhung ngeiah pawh benga hriat har khawpa zawi a ni. Neih loh tak tak chuan neih loh thu sawi hi a zahthlak êm vângin benga hriat phakin a ri chhuak zo mang lo, mita hriat chi a ni zawk mah!
Ramin hun khirh tak mai a tawng a, dam khaw chhuahna tura beihpui a thlâk lai hian, kan tihtùr leh tih loh tùr kawngah, an aiawh ni lo, miretheite âu aw dik tak hre tur hian kan roreltute hian beng chhi mai lovin an mit lèn tak tak se a ṭha ngawt mai.
Veng tin khaw tinah Local Task Force te kan nei a, VC/LC leh YMA-te kan nei bawk a. Anniho hmang hian survey urhsun tak neih ni se la. He hripui do tura kan ṭan theih chin dik tak hre turin Chhungkaw tinte khawsak hi a hmunah zirchian a ṭul khawp mai.
Mi duham leh sum âtchilh tak takte hi chuan midang nunna chauh ni lo, anmahni nunna ngei pawh an sum hmuh theihna turah chuan an thâp duh ṭhin avángin, mirtheite âu àw dik tak hi, commission (In hmun hralh chhawngtute sawina atana kan hman commission ang hi) kal tlang lo va hriat a ṭul viauin a lang!
Jh. Za Hluna