ECONOMIC BLOCKADE LEH MIZORAM

Kum 1974 kum tawp lam khan, Quit Mizoram Notice Order a chhuak a, Mizorama non-Mizo sorkar hna thawkho an buai hle a, chutihlaiin Cachar Youth Action Committee intite chuan non-Mizo pakhat an thah chuan Mizo sawm kan that ang tiin thuchhuah an lo siam ve mek bawk a. Khatih laia Aizawl SP Pu. F. lalremsiama, IPS chuan Silchar lam boruak zuk thlithlai turin kei leh All Mizoram Students Federation (AMSF)-a kan thawhpui Pu. A.Lalchhuana (Fam) leh Pu. MC Lalrinthanga te chu min tir a. Kan kal hma hian Pu MK Guha te chhungkua kan zuk be hmasa a, a fapa upa ber Nirmal Kumar Guha chuan Silchar-a kan mi hmuh turte a lo biak lawk tur thu kan dawng a.

A hmasa berin Dr. HP Bhattacharjee, Principal, GC College kan hmu a. Ani'n Cachar zirlai pawl lian ber Cachar District Chhatra Parishad hote a lo hrilh lawk angin kan inbe ta a, thil kalhmang a tawp rak thlengin kan sawi a, anni'n ECONOMIC BLOCKADE neihah min vau bawk a, mahse Indian Army zawng zawng pawh dangin Mizoram aṭangin la chhuak ula kan duhthusam a lawm fiamthu titak deuha kan han tih takah chuan kan nui tlang leh thei ta a. He kan inbiaknaah hian boruak ṭha a len theihna'n thu kan sawi tlang a, Cachar Youth Action Committee thu dengkhawng tak chhakchhuaktu pawh anmahni an nih thu an sawi ta nghe nghe a. Ni 2 dang cham leh a, Cachar District-a college hrang hranga thu sawi turin min sawm nghe nghe a, an sawmna angin Cachar college, Janata college, Kabuganj leh GC College, Silchar-ah thusawina hun kan nei a. Hawlhtling kan intiin Friendship Agreement hial kan sign ta a ni.

Kum 1975 January thla tira Mizoram IGP leh a thawhpuite'n vanduaina an tawh pawh khan boruak duhawm lo Silchar lamah a thleng lem lo va. Boruak ṭha lo dang thleng lem loin 1979 July ni 16 a, Saitual SDO (PWD) misual kut tuara a boral khan Silchar-ah chuan Mizo an hmuh apiang kut an thlak emaw tih mai tur khan mi ṭhenkhat chu an khawsa a, boruak erawh thla khat hnuah a pangngai titih leh deuh mai a, ECONOMIC BLOCKADE a awm awm hriat a ni lo.

Boruak pangngai chho zelin kum 1992 kumtir lam khan Cachar Truck Driver Association ten strike an huaihawt a, ni thum an strike naah chuan (keipawh Silchar ka cham lai niin) thlai leh sangha zuarte chuan an thlai leh sangha chhe man chu strike huaihawttute an ṭhing ṭan ta a, anmahni leh anmahni an intibuai chu a ni ta der mai. Cachar District Administration a inrawlh ta hial a, Strike huaihawttute zawk chuan armed escort an dil ta ruai mai a ni. Hetih hunlai hian Pu. T.V Fambawl, MCS chu Deputy Resident commissioner, Silchar-a a awm lai a ni.

Cachar mipuite leh Mizote hi inmamawh tawn kan ni tih, a tichiangin, a uar lam deuhte phei chuan undivided Cachar te hian 30 to 40% hi Mizoram pawisa ringa khawsa an ni an ti hial a. Hetia ECONOMIC BLOCKADE an nei mai ang tih vela keimahni leh keimahni insawi ṭhaih hi thil ṭul niin a lang lo, ECONOMIC BLOCKADE pawh lo ni ta reng se, a mangang hmasa zawk chu anmahni zawk an ni dawn tih a chiang reng a ni.

K. Lalhmingthanga A-16, Upper Republic.