Falkawn State Referral Hospital ka hmuh dan
Pu H.D. Deve Gawda India ram Prime Minister a nih laia a din nâna châng vaibelchhe 40, 1996 kuma an lo approve tawh, 1999 kuma sak tan tak State Referral Hospital, Falkawn chu January ni 22 aṭanga ni 29, 2018, (ni 8 chhung) khan nau neih avângin kan luah lum ve a. Kan vawi khat awmna a nih avângin chinchâng bangbo ang reng takin kan lut ve rawih a. Ka theih ang angin chik takin ka thlir kual ve reng a. Civil Hospital, Dawrpuia mi nena khaikhin chuan mipui pawh an zi huai huai rih lo deuh bawk a, nawm pawh a nuam hlein kan hria.
Natna vei chi tinreng mai tân doctor ṭha ṭha an dah ta emaw tih mai tûr a ni a. A main building hi Falkawn Football Playground hluiah a ṭhut avângin a hmunhma a rem hle. Dam lo tân nilum aia chhuah lawkna tûr pawh a awm tha viau hlawm a ni. Civil Hospital nena kar tawnin MST Bus nitin vawi thum a vei tawn sek a, hei hian mi chhumchhia deuh tân pawh tlawhpawh a tiawlai em em a ni.
A building a la thar avângin a la fai nalh hle hlawm a. Chutih rualin a plaster khawk leh, an thawm ṭhat mawlh mawlh lai hmuh tûr erawh a awm nuk mai. Ward chhung light system a ṭha viau mai a, oxygen leh Vacuum pipe-in word tina khum zawng zawng hnai taka a chhun vek hi emergency-ah pawh dam lo tân a thlamuanthlâk hle a ni. Word-a kan awm chhunga ka thil hmuh leh hriat te:
1. A thawktute an fel tlangpui a. MCON student te an fakawm. Zirlai an ni a, an inngaitlawm a, damlo tân biak an nuam hle. Nurse biak hrehawm tak leh vîn hlur kan tawng hauh lo - ṭhangthar apiang biak an nuam zel mai.
2. Damlo zanriah chaw dawh hun erawh duh aiin a hma mah mah em aw a tih theih. Tlai dâr 3-ahte dawh a ngai a. Ei nghal loh chuan thlêng dah leh thuai a tûl si a. A tûk zing dar 8 velah tukthuan ei leh chauh a ni a. Tukṭhuan leh zanriah ei inkâr hi chhun lamah dârkâr 7 a nih laiin zan lamah dârkâr 17 lai a ni thung a. Hei hi siam rem theih ni se a ṭha ngawt ang.
3. Damdawi In canteen-ah leh gate pawnah damlo leh a awmpuite tâna tlawm tak taka chawhmeh lei tûr awm reng a. Cheng 10, 20, 50 vel lek lekin Mizo chawhmeh leh sa thlengin ei mai theih, lei tûr a awm reng a. Hei hi hmun hla zawk aṭanga pantute tân a awlsam phah em em a, a ṭha hle a ni.
4. Hmun hla zawk aṭanga Falkawn leh a chhehvel khuaa innghahna tûr chhungte leh
ṭhian ṭha nei lo tân Khualbûk mamawhna a sâng hle mai. Sawrkârin Khualbûk hi a sa mêk a, hei hi a rang thei ang berin function se a duhawm ngawt mai. Mimal ang pawhin a bul hnaia miten siam se, sumdawnna hlâwk tak a ni ngei ang le. Mite tana malsawmna ropui tak a ni ngei bawk ang.
5. He damdawi Ina awmte pawisa leh thil hlu a bo leh
ṭhîn erawh hi chu a pawi ngawt mai. Kan awm chhûng pawhin damlo chhuak tawh mai tûrte pawisa leh ATM Card a bo vek a. Hmun hla taka awm an ni si a, an hawna tûr leh damdawi man tûr zawng zawng a bo vek si a, an hrilh hai hle. A thawktute tân pawh mipui rinhlelh an kai phah loh theih loh avângin a hrehawm hle bawk ngei ang le. Thuneituten hei hi ngaihven vat se. Security pawh dah uluk se a duhawm ngawt mai.
Mi bawrhsawmten doctor kan mamawh ṭhîn. Doctor ṭha, nurse nêlawm leh mutna khum nuam leh awm man hautak si lo kan state in kan han nei hi tu sawrkar tih pawh ni se lawm nachang i hria ang u.
Zomawia Khiangte