Huaisen tura intodelh

Mizoten kan ram chin nia kan ngaiah Assam lamin tunhnaiah harsatna an rawn siam leh a, hemi chungchang hian chanchinthar lamah pawh a lailum a chang reng mai a nih hi! Ni e, Assam nen hian ram inchuhin kan buai zing ta hle a, hetiang boruak a lo thlen chang hian sorkar lai apiang chu hma la tawk lovah puh an ni deuh zel ni pawhin a lang. Social media lamah lah a vei ber leh hre ril ber nih an tum emaw tih turin nasa mangkhenga lo pau ve tawk lah an tam narawh e. Political party tinte'n hamṭhat lak tumin an lo vir buai ve nghal char char bawk a, heti chung hian tun thlengin buaina chinfel erawh a la awm lo a, kan la buai zui zel zawk dawn nite pawhin a lang a ni.

Assam nen kan buaina hi tunhnai maia thleng a ni lova, hemi tireh tur hian kan rama sorkarna lo chelh tawhtute khan hma an la lo em ni aw tih chu ngaihtuah tham tak a tlingin ka hria. State kan nihna pawh kum tam a liam tawh a, kan buaina chinfel hi chu a hun viau tawhin a hriat a ni. Assam nen ramri chungchanga harsatna kan neih chinfel loh hi chinfel a har hle a ni thei a, chingfel tura mu tanna lian tak, kan hriat ve si loh hi a awm pawh a ni mahna. Mahse, hetianga a khát tàwka buaina awm leh ṭhin hi mipuite pawhin an ning tawh hle tih chu hairual a ni lo thung. Kan buaina chinfel thuai a nih loh chuan tun aia chinfel harsa hian a a awm thei a, kan duh loh thil hi a thleng ang tih pawh thil hlauhawm tak a ni. Chuvangin, he kan buaina chinfel kawngah hian sorkar pawh hian nasa lehzualin hma la se, tun maia chinfel a harsa a nih pawhin buaina lian zawk a chhuah hma ngeia chingfel tura hmalak a ṭha ngawt ang. Ka sawi tel hram duh chu Assam nen kan buaina chungchangah sorkar hmalakna leh sipaite hmalakna, an ṭanhmun tur thlenga hmelmate hriattheih tur zawnga social media lama thu post ching an awm hi a pawi a, sim thei se a duhawm ngawt mai. Ka ziah tum loh lam ka ziak tam ta mah mah.

Kan tum lamah peng tawh ang aw, a chunga kan sawi tak ang khian Assam nen hian ramri chungchang bakah tun hma aṭangin inhmuhthiam lohna kan lo nei fo tawh ṭhin a, hetiang hunah hian kan chak lakna ber an nihna hriain an duh hun hunah eng pawl pawlin emaw kawng an dang a, ni hnih khat lekah Mizoramah thil man a to a, ei leh bar, tuialhthei leh thil dangah kan harsa nghal a. Mipui an chiai nghal nasa ṭhin hle a nih kha. Tun ṭuma kan buainaah pawh kan chaklakna kawngpui an danchah leh hi sorkar leh mi ṭhenkhatin a ruka an hlauhthawn a ni thei mai ang em? Hetiang a thlenna chhan bulpui ber chu kan intodelh loh vang a ni tih hi chiang takin a lang a ni.

Buh leh balah kan intodelh loh avangin tuna Assam nen kan inepnaah pawh kan huai thei lo va, mipuiin huaisen takin sorkar che se an duhlaiin kan chak lohna lai chu lian takin hmuh a ni si a, sorkar chu a huai tur angin a huai thei ta ṭhin lo niin a lang. Ni e, kan huai theihna turin UT hun aṭanga State kan nih hnua tun thleng hian intodelh turin hmalakna tak tak a awm lo nite hian a ngaih theih a, kan rama sorkarna lo chelhtute khan eng ngati nge kawng khat tala min lo intodelhpui loh le tih chu zawhna lian tak a tling ta. Mizote hi buh leh balah pawh tunhma chuan intodelh ṭhin kan ni a kan changkang chho zela kan intodelh ṭhinna erawh kan changkanpui tel lo kha a pawi ber chu a ni ta a ni.

Tun thlenga kan la intodelh loh chhanah hian sorkarna lo chelh tawhtute kha dem an awl dawn ta hle mai a. Inthlan dawnah intodelh tura hmalak an tum thu campaign au hla-ah hmangin an sawi vek hlawm a. A taka chantir tu mah an la awm lo thung chu a ni bawk si. Intodelhna tak tak a thleng thei lo chungin, sem lamah hma kan la nasa hle lawi a. Sorkar chuan a thil tum, tihhlawhtlin tak tak tuma a bawh lam chu a hlawhtling mai zel tih pawh kan hmu ṭhin a. Intodelh tur hian tun kan sorkar a ni emaw sorkarna rawn la chang tur emawte thlengin tih tak takin ṭan la tawh se tih chu mipui pawhin an duh dan a ni.

Japan chu Indopui II-naah a tlawm khan a inkuangkuah mai lova, khawvel hneh tumin thil dangah ṭan a la thar a. Technology lamah nasa taka hmalain khawvelah a rawn inpholang leh thei a ni. Indopuia an tlawmna chu chakna atan hmangin, thil dangah khawvel an hneh thung a ni. Hetiang chiah hian Assam nen kan inepna chungchanga kan duh anga kan huai theih lohna intodelh lohna hi hawh u; chakna atan hmang ila, hnehna kan chan theih nan theihtawpin intodelh turin sorkar leh mipuite ṭangrualin khawvel hriat tham khawpin hma i la thar teh ang u. Tih tak takna nen sorkarin hma a lak phawt chuan mipuite pawhin an hnung kan zui hreh lo tih hriain, tuna kan sorkar hrawn mek leh lo la awm zel turte pawhin kan chak lohna hi chakna atan hmang se, intodelh turin hma kan la dawn tia sawi liam mai loin, a taka puitlin ngei tura intodelhna tur lamah hma lain, kan budget pawh hemi lamah hian tam zawk dah ni se. Tuna sorkar mek leh sorkar la awm zel turte pawhin hma la ngei rawh se.

Rsa Khuptawng