RAMRI BUAI LEH HNAM ‘REVIVAL’
Tun ṭum Assam nena kan ramri buai zet chuan a chim sâng hle mai. Mizo hnam history-ah July ni 26, kum 2021 hi kumkhua atan hriatreng tura chhinchhiah a ni ta! Kan ramri veng him turin silai meuh hmeh puah a ngai ta. Assam mi leh sa 6 emaw laiin nunna an chan chu pawiti hle mah ila, an politician-ten duham leh pamham taka mi ram chhuhsak an tumna tih sual rah an seng a ni a, a pawi khawp mai.
He ramri buaina avanga thil lo lang chiang em em mai leh, zirlai hlu tak tak zir chhuah tur kan neih hi i lo thlir ho teh ang:
1. Hnama harh tharna: Hnamah ka chiang reng tawh kan ti em? A dik mai thei. Mahse, kan chiang lo leh thin a nih hi! Tun ṭum ramri buai ka lawmna em em chu, Mizo inti tawh phawtte thinlung chawh thawhin a awm a, kan ram leh hnam, kan ramri nena humhalha venghim tur chuan eng pawh huama pen chhuak turin kan inpeih at hlawm ta mai le! A va ropui em! Hmelmain kan sahuata min khawih chiah hian hnam angin kan harh a, kan ṭang rual ṭhin. Ṭawng thu chhe lo, tun aia na deuh pawh hian min han khawih se, Zofate hi ‘hnam revival' ropui tak min siamsak a ni ringawt ang!
2. Pathian a tel: Khawvel hnam tinte tana ram pe a, ramri fel taka khamsaktu Pathian chuan Mizo hnam tan Mizoram min pe a, India ram rim pawh kan hriat hma daihin ramri fel takin min khamsak diam tawh. Chu kan ram, Pathianin min pek, min lak ṭhensak tuma duhamna leh tharum nena min chuhtute laka kan lo chet dan kha a mawi a, ṭawngṭaina leh silai ri a inhne rem thlap a, a tawk vel chiah a ni! Vairengte khaw mipui huaisenzia te, ramri vengtu kan sipai leh police-te dawhtheihzia leh, a huna an huaisen sizia te kha, ṭhang lo thar zelte tan thawnthu ngaihnawm tak a la ni ngei ang.
Kristian kan nihna aṭanga thlirin tharum thawh em chu ṭul ti lo kan awm mai thei. Chutih laiin, ‘Setana agenda’ nena lo thawkte chu a ṭul ang zela kan lo hmachhawn a ngai a, sual do chuan thisen chhuak khawpa kan beih pawh a ngai ṭhin. Pathian duh loh zawnga thil tih reng reng hi Kristianten kan ngaimawh tur a ni a, mahni tana hlauhawm tur pawh ngaihtuah chang lova Jerusalem Temple thian faitu kha kan zui, Nazareth tlangval huaisen Isua hi a ni.
Vanah meuh pawh indona a awm khan, Lucifer-a hote do turin Michael-a te kha kut kuangkuahin an awm mai mai lo. Lalpa tana ṭhahnem kan ngaihna avanga indo a ṭul chuan indo mai tur a ni. Kan lamah Lalpa a ṭang tih erawh chiang em em thung ila.
3. Pathian thu leh ram hi a inzawm tlat: Ramria kan pastor ṭawngṭai lai te, kan ramri vengtuho ralthuam inchhawp reng chunga an han ṭawngṭai ho lai te social media kal tlangin kan han hmu a, thinlung a va khawih chiang em! Tun boruak avanga ram puma ringtuten Pathian kan han au chuah chuah maite hi a va inhmeh em!
Chuvangin, aw kan Pathian, hei hi kan dil ber che - Kan ram kan hnam min hruaia’n nang chauh kan thlang a che; Chhung lam leh pawn lam hmelma indona thleng mah se, Hneh zel turin min pui la, ro min relsak ang che! Amen!
Amaherawhchu, thil pakhat i hre reng ang u,Lalpa hi min hruaia ro min relsak tura kan duh chuan, kan ram politics leh khawtlang nun aṭang hian ‘corruption’ leh sualna tinreng hi dah bo ila, zonun mawi dik tak kha i chhem alh leh ang u!
4. “Party, party tih a hun lo!” Ramria kan han buai tak tak chuan, “Party, party tih a hun lo! Tun hi ṭanrual hun a ni”, kan ti ruai mai. A va dik em! Mahse, han ngaihtuah chiang teh, Mizo hnam Pathianin min pek Mizoramah hian eng tikah nge 'Party, Party' tih hun chu? Buai lai chauhvin kan ṭangrual ang a, buai a reh veleh mahni hmasial leh party induhsak biknaah kan lut leh thei ta tihna em ni? Hnai lo ve! Kan ram min chhuhsak tumtu kan ṭhenawm, ‘Politics’ chhe ber chi hmanga min nektute tih dan tho hian kan awm zui thiang tawh lo. Ramri buai lai leh buai loh lai pawhin, eng tikah mah “Party, party tih hun a awm lo!” Zoram mipuite u, tun hun hi hnamah mai ni lovin, kan ram politics-a kan harh thar hun a ni e!
5. Media mawlh hi!: Hetianga buaina kan tawh apianga kan mamawh ngawih ngawih, rualawh tina em em ṭhin chu, journalist leh media lam mi thiam, English leh Hindi thiam tak, ramri pela kan chanchin leh kan thiam thu min theh darhsak ve nghal zung zungtu tur hi an ni ṭhin. Mahse, tun ṭum chu hma kan sawn hle mai, kan hmasawnna erawh a la beitham deuh pawh a. Kan ṭhalai lehkha thiam, smart tak takte hian helamah hian ṭan i la sauh sauh ang u.
6. ‘Ar talh dan chi khat chauh a awm lo’: Mahse, chak lakna kawng khat chauh neih hi a pawi a ni. Silchar kawng an dan pin veleh a Tripura, Manipur, Bangladesh etc tih vel sawi phur chawp chuk chuk ziah lo hian, Silchar kawng a pin loh lai pawh hian heng kan ṭhenawmte nena indawr theihna kawng ṭha siam hi kan hna pawimawh hmasa a ni e.
A tawp nan: Tun ṭum buaina hian eng chen nge a awh ang a, engtin nge a kal zel dawn kan hre lo. A lan danah chuan BJP leh an Hindutva politics kal zel, Assam CM, Himanta Biswas Sarma kaltlanga hma an lakna a ni. Eng ang hmanrua pawh hmangin, finrawl leh vervekna tinreng nen rawn thawk leh mah se, keini chuan hmanraw hlawhchham ngai lo kan nei – Ṭawngṭaina! Kawng a pin rei deuh pawhin, a chhunga cheng Zofate hian in hmangaih tawn zir thar ila, tu mah tlachhamin i in awmtir lo vang u.
Lalpa duan lawk, Mizo hnam hmelhmang a lang ṭan mek zel e! Kan hneh ngei dawn a ni.