LLTF LEH VLTF-TE HI TIHTAWP VEK NI RAWH SE

Mizoramin Covid-19 hripui kan dona kawngah hian Mizoram sorkarin thil tih fuh em em a nei a, chu chu tualchhung level a hri do pawl - Local Level Tast Force (LLTF) leh Village Level Task Force (VLTF) a din hi a ni.

Heng tualchhung a hri do pawlte hian hri dona kawngah leh law & order kenkawh kawngah sorkar an chhawk zangkhai hle a ni. A nihna takah chuan hri dona kawnga sorkar tih tur tam zawk hi an ti deuh vek a ni ber. Ram danga sorkar miten an buaipui vek ṭhin - contact tracing chungchang te, Containment Zone siam leh enkawl chungchangah te, test kalpui leh vaccine pek kaihhruai te, mipui control nana Law & Order kenkawhna zawng zawng thlengin sorkar an awl hneh em em a. Police-te pawh an Kel-e-awl der mai a nih hi.

Veng/ khaw tam takah phei chuan an veng/ khaw chhunga hri veite enkawlna tur Community COVID Care Centre (4C) siamin, hri veng sang tam an enkawl nghe nghe, hengte hi ram dangah/ state dangah awm ve tak maw? Hetiang taka mipui vantlang tana ṭangkai, sorkar chhawk zangkhai thei Local/Village Level Task Force hi state dangah, ram dangah an awm awm hriat a ni lo a, sorkarin a buaipui vek ṭhin.

Hetiang taka tangkai LLTF/ VLTF hian lehlamah hlet ṭha lo tak a chhuah ve thung. Hetiangin :

1. LLTF/ VLTF-te hi Professional an ni lo a, tlawmngai a inpe tura ruat te, inpe tura sawmte an ni. An professional lohna chu hmun hrang hrangah a lang chhuak fo a, an hlauthawng hma em em a, ho te teah mipui zawm tur dan khirh leh khauh deuh deuh an siam fo a nih hi. Mipui tana dawnsawn nuam lo tak tak, mipui demna leh thuchhuah rum tak tak hriat tur a awm fo a, thenkhatah phei chuan kut inthlakna hial a thleng a nih kha. Veng/ khaw ṭhenkhatah phei chuan sorkarin a remti lo chungin sorkar SOP aia khauh fein khuahkhirhna an kalpui ṭhin. Thawkrim an intih em avangin sawisel an haw hle. An inpekna thuk teh mah se, heng zawng zawng hi training nei lo an nih a lanna a ni.

Veng/ khaw ṭhenkhatah phei chuan dan bawhchhia an mante hi YMA information mic-ah an puang dup dup nia! Dan an bawhchhiatna a an chawitir a, sorkar dan anga hremna an pek kha a tawk tehlul nen! An tih mualphote hian Court-ah khinlet nachang an la hre lo hlauh zawk a...

2. LLTF/ VLTF-te hian hripui dona kawngah sorkar tih tur 50% vel zet an tih avangin sorkar a hahdam phah hle. Hri veite enkawl, sample test leh vaccine pek bak sorkarin a buaipui mang lo. Heng pawh hi Local/ Village Task Force-te puihbawmna hnuaia kalpui vek an ni. Hetiang a nih avang hian sorkar a inthlahdah phah hle a, sorkar ve riang ruang chuan hri vei mi 20000 tal a ruala enkawl theih awm tak a nih laiin 5000 lek pawh a enkawl hneh lo a, heng zinga 1000 vel zet hi mipui vantlang ta 4C a enkawlna dawng an la ni zui. Sorkar enkawl tak hi chu tam tak an la ni miah lo.

Covid-19 hripui zarah damdawia inenkawlna tihchangtlunna kawngah Central sorkar a inhawng hle a, thil dil nawm vanglai tak a ni. Heti chung hian ICU siam belh chungchangah te, Covid ward siam belh chungchangah te, Laboratory din chungchangah te, Oxygen siam belh chungchang leh staff lak belh, dah belh thlengin Mizoram sorkar a che muang hle thung. Central sorkarin a phal viau chungin RT-PCR dahna tur Laboratory lah a din belh duh hek lo. Hmasawn chu inti ve bawk mah ila, kan mamawh dan leh kan dinhmun en erawh chuan hmasawn kan intihna hi a beitham hle.

Covid-19 dona kawngah hian LLTF leh VLTF-te hi thawh hlawkin, thawk rim teh mah se, state sorkarin inthlahdah phah nana a hman tak tlat avangin hma kan sawn tur angin kan sawn theih loh phah niin a lang ta hial mai. Covid-19 dona kawngah pawh kan hnufum phah niin a lang. Central sorkarin expert team meuh tirin sorkar hmalak dan an rawn enfiah hial a nih kha.

Chuvangin, Covid-19 dona kawnga thawh hlawk em em LLTF leh VLTF te hi hma kan sawn lehzual theih nan tih tawp vek ni rawh se. Ram dang, state dangah pawh LLTF leh VLTF-te tel lovin Covid-19 an do hneh khawp hi maw...