HNAM HNATLANG PUI I KO ANG U LE

Assam chet lak dan han sawi kual vak hmasak zawng hun leh hmun a heh a, hetia silaiin min kap hmasa a nunna an hloh te, social media-a ṭan la kual leh a, kan thiamna zawng zawnga kan han tal ve leh a, social media lamah pawh kan Pathian avangin beih mi kan nih loh an hriat hnu a, Govt. of India lama an police hotute leh an CID lam hotute liam thla a, kan MP zahawm takin a bial chhung thilthleng, a mipuite thlavang hauhna thinlung na puak kehchhuak, a ṭawngkam la kawia CONSPIRACY inphum anga thuchhuah an han chhui velte leh chu'ng conspiracy awmte laka hriat neite tan cheng nuai 5/- lawmman pek an han tiamte hi, fin khekrekna zungzam zauhtir tumna mai an la ni cheu ngei ang.

Mizoram leh Assam buaina kara inphiarrukna ṭawngkam thumal hmang hmasa berte hian, he thumal kan rilrua la awm hauh lo hi hman nachang an hriatna chhan chu, anmahni hian Conspiracy Plan nei hmasa an nih vanga a letlinga vuttui thlawr bel tih ang chauh hi thil awm dan a ni ngei ang. Assam CM khan eng nge a sawi kha(h)? Gauhati-a HM nen an inhmuh khan Mizoram border-a Police dah tura HM Amit Shah-in a hrilh thute a sawi kha, kha kha bawhzuiin ke a pen a ni lawm ni? Eng chen nge plan an neih kan hre lo zawk a ni.

Tunah hian a him chin aṭangin kan hrawkhrui zaichah tumin Rel kawng an tichhia a, Economic Blockade min han siam hnan a. Khawvela ram leh ram inhmelmate insawisakna chi khat “Economic Sanctions” an tih te chu kan hria, chutiang entawn ni awm tak a, hreh tak chunga kan INDIAN nihpui vete chuan, an NGHO hnuhnung min han ṭhen khum a, min hrek dangchar an han tum leh ta a ni. An tum zing ta hle mai. Chutih lai chuan Mihring dinhmun dikna chanvo lam aia Political Game min khelh hnan a, min uipui tuilian thlirtu Central sawrkar hmalak dan pawh hi a theuneu rih hle. 2016 kuma kan zirlai hruaitute'n Assam silai mu tuara ralthuam nei lo civil, lungawi lohna lantir min kahte khan, khawiah nge India ram media-te an awm. Tunah lêm Pathian khawngaihnain kan han che ve a, Media-te chuan a vung thei ang berin an han la kual leh si.

Chuvangin, INDIA leh ASSAM ramte hian an duhtawka min hlamchhiah a nih pawhin, PATHIAN kan nei a lawm, kan Pathian hmachhuanin, a pawi sawi hlau takin ke pen ila, kan dik a, kan taimak a, Ama zai kan ngaih tlat bawk chuan kan dam khaw chhuak ang. Chutih hunah chuan Assam leh an sangawi zawnpuite ngei chuan, “Eheu, kan rin ang an ni hauh lo mai, heti chuan kan hneh hauh dawn lo,” an tih ngei na turin kan KE pen ila, an beisei ang hmu lo turin, i han hawi KAWKVA tir tawh teh ang u, 'HNAM HNATLANGPUI' I HAN KO TEH ANG U.

Kan CYMA leh ZKHC te hian khawngaih takin beng lo chhiin, thinlung lo hawng hram se la, kan sawrkar hotute hnenah ṭhibeh thu chu a lut turah ngaiin, hun harsa kan hnamin a tawh laia ruahmanna neih thiam a nih theih nan hma in lak ngei kan ngen che u a ni e.

Assam CM hmalakna hi kan hnam VITAMIN-ah chantir ila, kan inpumkhatna hrui min suihsaktu an nih lehzual chuan a va hlawkthlak dawn em. Kan ṭhalaite leh mithiamte 'Aw ka' Instagram leh Twitter, Youtube thlenga han hmuh a, hnamdang thu post an comment dan han chhiarte hian, an dinhmun aṭang ṭheuhin an tlanchhe lo va, kan dinhmun aṭanga talchhuak tur hian an bei a, an sualchhuak a ni, a va ropui em. Heng hi i hmuh hmaih hauh loh ang u aw.

Kan Hnam hnatlangpuiah chuan engtin nge kan hnatlan ang. Silai leh Indona ralthuam lam kawng chu a titu tur an awmah dah ila, mipuite chuan nasa takin hma kan la thei e, Hun duh rei zawk (Long Term Plan) ruahmanna leh Tuna hmalak nghal (Immediate Plan) theih, tun ngeia hmalak nghal theih te, kan relfel veleha bun chat nghal theihna tur te hi han sawi hmasa ila:-

1. KAWNGPUI SIAM HNATLANG : Kawngpui siam hnatlang hi ṭhuang thumin kal thei se, Manipur leh Tripura lam leh Bangladesh Border te hi kan hma thei ang em? A tam lu deuh kan tih chuan ṭhuang hnih pawh a ṭha tho ang e. Bangladesh border dungzuiin kawngpui han awm zui se, kan neih leh an neih inthleng tawn tur hian ramri lamah an rawn insehmur nasa dawn tih a lang reng a ni. BSF leh Assam Rifle pawhin, an mit an lo len a, an lo Arpui mitmen duh lo a nih chuan kawng dang ngaihtuah ve kan ba ang. Chutah Mizoram Earth Mover Association-in hma an hruai ang a, kawng duhthala zauvin an nawr ang. Chutih lai chuan Mizoram Truck Owner Association lamin Boulder Lung full load ṭhapin an zui ang a, Bitumen kan neih loh pawhin Road roller rualin an rawn chil mam duak zel ang. Chutih laiin dik tak leh daihzai taka hman turin, a chunga hmanrua nei ve loten kan SUM leh PAI kan lo chhungkhawm ve ang. Chu tin tha leh tui kan lo seng bawk ang a, kan nula tlangvalte'n ei leh in an lo siam suau suau dawn a ni.

2. SPECIAL ASSEMBLY KOH THU : Ram leh hnam mamawh hmasak dan thlir a, dah pawimawh hmasak ngai dang kan neih tak avangin, hmasawnna thil dang chu kan dah ṭha rih ang. Kan dam khawchhuak ang a, kan la thawk zel ang. Tunah chuan Covid-19 leh Hnam hnatlangpui atan budget Re-appropriation Session neiin kan state sum Plan leh Non Plan Chhunfin a nihna remchangah lain kan neih chhun sumpaite chu Damkhawchhuahna plan-ah dahin han theh chhuak teh se.

3. MIPUI LAM BUDGET : Sawrkar sumte Association tha leh tui, neihthinglung khawnga an chetnate lo do ve turin HNAM DAMCHHUAHNA SUMBAWMah sum kan chhung lut ang a, hlemhlet, eiruk tello, Pathian malsawmsak tlakin kan enkawl ang a. Tumah chhuanchham leh rethei bik awm lo thei ang ber turin Kohhran dingtirte dinhmun pha lo mah ila, Annania leh Saphiri te style thlauhthlain a dang zawng entawnin kal kan siam thei a ni.

4. State Volunteer Police Reserve Unit (SVPRU) : State Volunteer Police Reserved unit nei turin khawtin aṭangin mi 20 tal basic training pek ni se la. A ṭul huna ralthuam chelek thei, tuna hlawh leh senso ngen (Demand) nghal lo tur, mi inpe thlanchhuah chuan khaw 850 aṭang chuan SVPRF 17000 kan nei ang a, Ralthuam chu kan lei belh mai ang. Heng zawng zawng hi DAN chhunga tih a nih theih nan Cabinet ngeiin legalised a nih theih nan an pass a ṭha ang.

Longterm Plan lam chipchiar luhchilh chuan a sei lutuk dawn e. Hun dangah la Plan leh ang aw.

Nilen nuam u le.