Silai puak thlâwn lo hram rawh se
Vairengte leh Lailapur side ramri lam hi tunhma ai chuan tlemin hma kan sawn a. Kan hmasawn hretna lai chu, vairengte daia auto rickshaw stand aṭanga a thlang lam tlang bawk tê kha kan luah ta a. Lung vawmphak leka hmasawn ni mah ila a lawmawm hle mai a.
Chu kan hmasawnna chcu tlemte mah ni se Assam a tithinur a. Kha tlang bawk tea Mizoram Police duty post siama Mizo IR police duty laite chu July ni 26 Thawhṭanni chawhnu ṭantir lamah khan Assam police ten an rawn hnawtchhuak a, duty post an luahlan a, silai an rawn hmet puak bawk a, kan police ten chhangletin inkahna a awm phah ta a. Ramri issue-ah mellung thar kan phun a, a lawmawm ngawt mai.
He inkahna a silai puah hma lawka Vai civil ten Mizo motor an suasam lai te, Assam police lamin Mizoram police post an rawn chhuhsak teargas-a Mizote an kah pup pup lai tea lo bei lettu Vairengte ṭhalaite an fakawm tak meuh a. Huaisen taka Assam police kaptu kan police-te an va chhuanawm em! Mizoram sorkar hotute pawh, Assam police-in silai an hmet puak hmasa a nih chuan chhang let ve ang che u tia kan police-te thu an pe hi an fakawm a ni.
Hetih lai hian Assam nena kan ramri hi Lailapur side chauh hi kan buaina a ni lo a. Saihapui V te, hêtah lehlamah Aitlang lam te, Bairabi zophai lam te, khawthlang lamah Kanhmun bul Chuhvel, Thinghlun side te, a dang neih neuhte pawh a la awm ang.
Ni 27 July (Thawhlehni) khan kan hotute hnung zuiin inkahna hmun kan tlawh a. Mizoram leh Assam police position inṭhat hleihzia a lang chiang a. Assam police tan chet ngaihna a awm hlawl lo a ni. Kan police te an fakawm takzet e.
Aitlang lam kan tlawh nghal a. Helam chu a dan a dang daih mai. Mizo chhungkaw tam tak huan thlai, hmanni lawka Assam police ten an tih chhiatsakte kha an la awp zui tlat a. Kum tam tak kuhva leh hmunphiah hmuna an lo neih, kuhva kung sang pui puite chu Assam police ten an lo camp hnan a. Helai hi mizo thlam 8 vel lai an
halsakte kha an ni a. An lainatawm hle.
Assam police ho khan huan neitu Mizote hnenah, "In sangha dilte hi sah rawh u, engmah in chang tawh dawn lo," te an ti a. An hmunphiah huan aṭangten an um chhuak a, an thlamte an halsak a nih kha. Vawiin thleng hian an luahsak zui tlat mai.
Hetiang hi a nih vangin Aitlangah hian MAP dah luh ve an ni a. Chuti chung chuan Assam Police te hian an chhuahsan duh chuang lo va, inhnaih tein Assam police leh Mizoram police te hi an duty a. Aitlangah thung hi chuan Lailapur side lam nen a inletling hlauh a. Kan police ṭanhmun chu rei lo tea hup beh vek theih an ni a. Lunga vawm phak lek, a hnuai zawka ṭang an nih vangin Assam police hian an chhuk kah ve thung dawn a. Hmun 3 vel aṭangin an kah rawn thei dawn bawk a. Inkap chiah se Mizo Police te chu belchhung sa an ni mai. Tun inkahna nen an dinhmun a inletling hlauh thei. MAP te camp-na hi a rem lo takzet a ni.
Tun dinhmuna rilru tinatu chu, Aitlang rama Mizote lo leh huan tam tak, kum rei tak eizawnna'na an lo hman tawh Assam police-ten an awmchilh reng khu a ni. Engtia tih zel chi nge ni ang?
Inkah hi ramri a fel loh a, kan ram chin kan neih hlen phah loh chuan awmze awm lova thisen luanna mai a ni a. Chuvangin tuna silai puakah hian duhtawk mai tur a ni lo vang. A pawimawh ber chu kan ramri dik tak kan neih let a ni a. Silai a puak a nih pawhin chumi atan puak se la, puak thlawn lo rawh se.