LOCKDOWN KAN ZO TAWH LO

Mizoram medical lama mi thiamte mitah chuan lockdown hi Covid-19 dona ṭha ber a ni maithei, chutihrual erawh chuan Covid-19 nena nun dan thiam kan in zirtir a ngai ta hle mai.

Hnam upa apiang­ah lockdown rei lutuk thlawp lo an lo awm kha a mak lo. A chhan chu ina tawm chawt chawt hian kan taksa raldo khawl a lo chau ve zel a, chu chuan kan taksaah eng natna pawh awlsan takin a lo lut a, natna kan nei awlsam phah a ni.

Mizote in hi sapho anga kawtkai nei zau, in kawta swimming pool leh gym, green house nei hi kan awm meuh lo. Puk ang tak tak, ni hmu ṭha lo tak tak leh chep tak taka in hnawhkhawm kan nih avangin Mizote tan hlei hlei hian lockdown rei lutuk hi a hlauhawm.

Sorkar hian mass testing neih hi hman aṭanga kalpui loin, lockdown tiin hun a pawt a pawt a, kan inkhung reng avangin kan taksa a chak lo tial tial si a. Awlsam takin natna hrang hrang kan lo veiin Covid19 test-naah RT-PCR kher a lo nih loh bawk chuan Covid19 positive nih kha kan hmabak a ni zel mai tawh a ni.

State dangah leh ram dangah phei chuan RT-PCR kher lo chu an pawm lo ṭan tawh a, chutihlai a, RT-PCR Lunglei a dah tura sorkar Court hmanga nawr kal a han ngai ta te kha a zahthlak takzet a ni. State dangah chuan motor-ah pawh RT-PCR hi an bun tawh hial asin le.

Lockdown thu­tlukna siamtute hi thla bi hlawh la, sorkarin a chawm an ni a, kum 20 pawh lockdown ngai se an buai a rinawm lo. A tuartu zawk chu sumdawng, daily rate a inhlawhte tho hi kan ni. Eitur min petute pawh thingtlang mite an ni ta daih mai. Lockdown tichhentute hnen aṭangin cheng khat mah kan dawng lo.

Chuvangin, nitina inhlawhte hi lockdown leh lockdown lo thurelah kan tel ve loh avangin kan hriselna a pan hma a, natna ben­vawn kan nei thuai a nih chuan lockdown tichhentute hian mawh an phur ngam tur a ni.

Bazarah thil zuarten mask an vuah ṭhat loh en diktu an tlem sawt a, dan kan zawm leh zawm loh viltute chu hmuh tur alawi an awm tawh loh hnua lockdown kalpui leh pawp zel hi Zoram thim zia a lang awm e.

Sorkar hian world record break lock­down siam a tum a nih chuan sawi tlang law law se, rilru pawh a dam deuh mahna.