SORKAR KA THLAWPNA KA HLIP TA E

Twitter account hmang ṭhenkhat chuan min hriat mai ka ring. IG Twitter, FB, YouTube thlenga ram pawn news, Assam CM leh Assam DGP, Assam police te profile a lut a. Va do a, Assam CM leh midangte tag ve hmak hmak mai kha ka ni. A sarhu lai chuan kan ṭang tlang vek a ni.

A chang chuan ni khatah twitter kaltlang vawi 500 dawn te tweet leh retweet neiin ramri kal thei lote tih angin sorkar thlawp zawngin hma ka la ve a. Ka account pawh robot emaw tiin vawi 5 siam ṭhat ngai leh call dawn ngaiin ka awm phah hial reng a ni.

Sorkar ka thlawpna ka hlih chhan chu lockdown a ni 117-na atan a an pawtsei leh hi a ni. Lockdown tirin mipuiin lockdown hi a chinfel dan a ni lo, vai ram angin mass testing nei ula kan ti a. MNF MLA ngeiin tih an tum loh thu chiang takin a sawi a nih kha.

Tichuan vawk angin min han khung a, central aṭanga sum lo lut chu hruaitu rualhoin an insem laiin a harsa zual chan chu mi inphalten CM Relief Fund a an pek, cheng sang hnih khat thla 2 dan vela dawn hi a ni mai. Chu chu lockdown duh lotute ei leh in hmuhna a ni.

Vairam khu en ila, Mizote aiin an luhlul zawk a, festival hrang hrang an kalpui reng tho. Mahse sorkarin mass testing neiin record siam mawlh mawlh mah se kar khat bak a awh ngai lo. Chutiang tura sorkar nawr hi a tira mipui tum a ni a, mahse sorkar berin lockdown, lockdown a ti reng thung a ni.

Intodelh a ṭulzia sawi uar a, hnathawh tam a ngaih hun lai takin lockdown hi Assam hian min ngam ngawt ang.

Dawr luah man, in luah man, garage fee, naupang sikul fee, ei leh in, damloh nia in entirna man, tui bill, electric bill, tv bill, phone bill te hi khawi aṭangin nge pe se min tih? Thla 3 kan in sang mar tawh a, a lutuk tawh lo maw?

Lockdown thlawptute hi chuan kum 100 pawh tise hlawh an hmu reng a, an ei leh in a ngai reng dawn. Mahse midang dinhmun dawn lo roreltu sorkarin kan nei hi sorkar thlawp lehzel tlak niin ka hre tawh lo. Social media kaltlanga ram tana ka lo tih ve tawhna chu chhunzawm tlak niin ka hre tawh lo a ni.

Inkhung reng hian zun thlum vei a awl a, zun thlum te hi thlahte thlenga in kai chhawn theih natna a nih avangin lockdown intih luata zun thlum vei tamna state-ah min hlang kai lo ang tih a sawi theih ta lo e.

Mizoram India ram state zinga top 1 a lo nih tawhnate:

1. Aids/HIV vei tam
2. Cancer vei tamna
3. Puitling movie en tamna
4. Peon thlenga eiruk tamna
5. Ram hruaitu dawhheh ber tamna
6. Rulling party MLA hausa chak ber tamna
7. Lockdown uar ber state
8. Skul kal mumal loh laia a ruka zirtirtu 152 lak duhna state
9. Medical staff te in volunteer tura beisei tlatna state
10. Next - Zun thlum