ṬANRUAL NGEI A NGAI TA LE!

Tun ṭuma Cachar ramri thua thil thleng chuan Mizoram mipuite ṭangrual ngei ngei turin min cho ta le! Tun dinhmunah pawh kan ṭanrual thiam loh chuan kan hnam mawlzia kan lantir chiang ngawt ang.

Kan ṭan rual theihna tura thil pawimawhte chu a chipchiara sawi dawn chuan sawi tur a tam maithei. Ramriah khawilai nge kan pawm tih te, document eng angte nge kan neih tih lam chu sawi ka tum lo. Ram khat, hnam khat, ṭangho kan nihna hre renga kan ṭawngkam leh kan thiltih dan fimkhur leh dik taka tih a pawimawh thu tawitea sawi kan tum ang.

1. A pawimawh hmasa berah chuan Mizoram sawrkar chelh mektuten Mizoram mipui hmahruaitu leh mawhphurtu an ni tih an inhriat chian a, party mal rilru pu miah lova ram pum tana inhawng takin, party dang mite leh NGO pawi­mawhte aiawh an huikhawm thiam a ṭul hmasa a ni.

2. Opposition party aiawhte leh NGO aiawhtute pawhin mahni pawl hming ṭhatna tur zawnga remchanna zawng miah lo leh, ram leh hnam thil a nih ang takin theihtawp chhuaha rilru inhawngin ṭan kan lak ṭheuh a ṭul.

Covid-19 do kawngah tun thlenga kan political party-te an ṭanho thlap theih loh chhan ber chu, kan sawrkar hotute hi, party dangte an intihneitu theihna tura an inhawn tlat loh vang a ni ber. Ramri thuah chuan hetiang hi kan ni tur a ni lo.

3. Kan insumna tur thilte: Political party ang zawnga mahni party leh hotute lo fak hi a hun lo. Party tinin mahni pawl hming ṭhatna tura lo kawih her tum hauh loh tur a ni. Mahni party hamṭhatna zawng hawia ṭawngkam leh thiltih kan neih zauh chuan ram leh hnam pawisawina a tling zel dawn a ni. Sawrkar chu Mizoram sawrkar a ni mai tur a ni a, mipuite chu Mizo mipuite kan ni mai tur a ni.

4. Insum lohna lam atana ṭhate: Kan CM te, HM te leh hruaitu dangte pawh fak tlaka thil an ti nia kan ngaih chuan CM a nihna te, HM a nihna te leh mi dangte pawh an mawhphurhna angah te khan fak tlak chu infak ching ila, pawl advantage lam hawi lovin, inchawimawi uar thei ila a ṭha ang.

Entirna han sawi ila:- Hmanniah Assam lamin engahmah min ngai lo em ni aw? tih khawpin hawihhawmna awm miah lovin min rawn pawng basa ngam a. Silai hial an hmet puak hmasa a. Chutah kan police-te an lo duai lo nasa mai si a, Assam lam chu a chesual zawkah ṭangin, thi leh hliamte awmin, hniak pherh vungin an tlanchhe ta kha a ni a. Khatiang thilah pawh khan, fimkhurna tur chu, Mizoram sawrkar emaw police emaw te chu tiṭha tiin kan fak ang a, MNF an nih anga advantage lak tumna chi a ni lo. Kan police-te theihtawp chhuahna kha Mizoram tan a ni mai.

Political party-ah chuan an support a dang thluah mai thei, mahse, chutiang lam ngaihtuah hun a ni lo. Kan hotute leh kan sipaite pawhin duhthu an sam lohna pawh lo awm se, sawisel bawrh bawrh a hun bawk lo. Theihtawp kan chhuah tlan ṭheuh theihna tura infuih, inṭanpui leh in ṭawngṭaipui tawn hun a ni e.