Mirethei tawrhna a zual zel

Covid-19 buaipui­tu Medical Operation Team hotupa MLA zahawm tak Dr Thiamsanga khan, "Test chu a ṭha lutuk a, mahse positive hmuh chhuah a tam chuan enkawlna kan in daih dawn lo," a tih kha a ni leh thla ka hre tawh lo. Kha thusawi khan Mizoram sorkarin a hun taka Covid test a kalpui duh loh avanga mirethei tawrhna a belhchhah nasatzia hi insum zo tawh lovin phuh chhuak pawp pawp teh ang.

Lockdown zel ringawt hian Covid a ti bo lo tih hre tur khawp chuan Mizoram sorkar hian Lockdown hi a ti rei tawh. BJP MLA Dr BD Chakma thusawi, "Mizoram sorkarin Lockdown World Record siam a tum" tia tiel taka a sawi chhan pawh kha hri leng hi lockdown hmanga do a tum vang hi a ni ta ve ang.

Hrileng chu a hri vei hmuh chhuah a, a hri vei lak hrana enkawl dam hmanga do chi a ni a, mi zawng zawng ina khung luiha hnathawk thei lova dah hi hri dona a nih pawhin hri dona ṭangkai lo tak a ni tih Aizawla hri darh zel dan aṭang hian a hriat a ni.

Hripui leng pande­mic dona kawnga hnathawk tur hian tlawmngai pawl hi an ṭangkai em em tih hai rual a ni lo. Tlawmngai pawlte awm lo se Mizoram sorkar tha leh sorkar sum chuan a daih tawh lova, Kohhran te pawh hi an ṭangkai em em bawk a, Kohhran building leh Kohhran sum pawh kan hmang ṭangkai hle a ni. Mahse tlawmngai pawl leh Kohhran hruaitute hi chu hri leng dona kawnga Lockdown leh Lockdown loh tih vel reltu tur ni lovin hnathawktu tur zawk an ni.

Delhi sorkar khuan an Hindu puithiam te an rawn pawh kan hre lova, an Delhi tlawmngai pawl an rawn pawh kan hre lova Covid hi ṭha takin an do thei a ni. Mithiamten hri do dan hi rel se, chu mi dona kawngah chuan hmanruaah lo ṭang ve se a dik zawk a ni.

Test kalpui loh kha tunah hri a darh vek tawhah kan han kalpui leh hnuhnawh chu a nia, thingtlang kilkhawrah pawh a darh tawh avangin a sawt lo chu ni lovin a tlai mah mah tawh a ni. Aizawlah bik hian mirethei retheihna hi a nasa tawh a ni.

Ni 100 pawisa lalut lo chhungkua hi engzat nge awm? Thla khat aia rei hnua mi tlem te hnena Rs 1500 vel sem ringawt hi chu in luah man pawh a daih si lo. Test tih ṭhat duh loh kha miretheiin an tuar na ta ber a, Lockdown tih leh ringawt hi rethei rahbehna tluk a ni asin le.