Mizo K-Poppers kan rawn ding chhuak!

K-Pop chu Korean popular music tihna mai a ni a, Korean music leh a kaihhnawih sawina tiin a tawi zawngin sawi ta mai ila, a ṭha awm e. A lo chhuah dan, a awmzia leh khawvela nghawng a neih dan te hi kan tarlan tum ber a nih loh avangin chu lam chu tarlang ta lo mai ila. Tun ṭumah chuan kan ram leh hnam tana beitu kan sipaite, ramri dep khuaa cheng mipuite, sorkar leh NGO, mi pawimawh dang zawng zawngte hnathawh hre reng chungin, social media kaltlanga kan ṭhalaite thil tih ropui fak chiam i han tum dawn ang hmiang.

K-Pop band lar tak takte hian khawvel pumah fans ṭhahnem tak neiin, fans hming pawh an nei fur a. A bikin— BTS fans-te chu A.R.M.Y an inti a, Blackpink fans te chu Blink an inti bawk a. Anni bakah EXO fans - EXO-L; Twice fans – Once; NCT fans – NCTzens; Stray Kids fans – Stay; Seventeen fans – Carat; Red Velvet fans – ReVeluv; GOT7 fans – IGOT7 tih te a ni nawk mai. Heng zingah chuan A.R.M.Y leh Blink hian Mizo zingah fans an ngah deuh ber niin a lang a; eng emaw chang chuan social media lamah heng band hrang hrang fans-te hi an band-te ṭanin a hnial pawh an inhnial nasa hle ṭhin a, social media-ah na na na chuan huhang an ngah avangin online community-ah thil an ti thei viau ṭhin.

K-Pop fans, K-Popper kan han tih takte chu Mizo ṭhalai, tleirawl tê tê zingah an tam em em mai a. Korean hla bakah film (K-Drama) thlengin an ngaina a, an incheina leh nungchang thlengin nghawng a nei nasa a, social media lamah pawh an nihna (identity) dik tak hriat theih loh khawpin an band ṭan member ṭhenkhat hming invuahin account an nei fer fur a, Korean ṭawng thiam tak tak pawh an awm nual âwm e. Chung Mizo tleirawl tê tê, social media khawih nasa em em, Korean ngaina bawk site chu alawm kan ram leh hnam tana lo ding chhuaka te chu!

July ni 26, 2021-ah Vairengte daiah Mizo sipaite leh Assam sipaite an inkap a, kha thil thleng avang khan Mizo mipuite, a bikin ṭhalaite an tho suau a ni ber. Social media platform hrang hrang — twitter, instagram, facebook leh youtube thlengin a dâp hneh hle. Khami ni la laa Assam Chief Minister Himanta Biswa Sharma leh Mizoram Chief Minister Pu Zoramthanga te twitter-a an inralsai (war of tweets) phei chu mainland media-te sawi duh tak a ni zui a. July ni 28, 2021 zan aṭang chuan K-Poppers-te chu an rawn inlar ta a ni.

A tih dan tur mumal takin an inhrilh a, thawklehkhatah an tweet (facebook-a post kan tih hi twitter-ah chuan tweet tih a ni) leh retweet (facebook-a share ang hi)-ah te hashtag hmangin #shameonassam tih te, #shameonhimantabiswasharma tih te an hmang ta chur chur mai a. India ram puma Trending No. 1 (hashtag hman tam ber) a rawn ni ta pawp pawp mai a, darkar khat chhung lekin chung hashtag chu vawi nuai chuang fe hman a hlawh hial a. Twitter lamin hastag pakhat #shameonassam tih an delete hnuah pawh #shame_on_assam tiin an bei leh ngar ngar a, top trend a rawn ni leh nghal a. User ṭhenkhatin an location chu India tih hmang lovin S. Korea te, USA leh a dang dangte an hmang a, heng hashtag hmangtu zinga tam zawk chu USA location aṭangin a ni ta daih mai a. Nuihzatthlak tak pakhat chu, thawk khat lai kha Poland rama hashtag top trend-a #shameonassam tih lo lang nawlh kha a ni.

Chutiangin kan ṭhalai, K-Poppers-te’n ram hmangaihna an lantir a ni satliah lo, Assamho chu an Chief Minister thlengin an chhaih buai ta ngang mai! Tarlan tak angin, #shameonassam tih hashtag hmangtu hmun thuma ṭhena hmun hnih chu USA aṭanga tweet a ni a (location thlak vang a ni kan tih tawh kha), hei hi sum tam tak senga bots (robot tihna, khawl amaha thil ti thei) hmang (hire)-ah an ngai ṭhup mai. Chutiang a nih avangin Assam CM phei chuan a ngai thutak ngang mai a, he thil phenah tu nge awm tih hriat a ngai a ni tiin twitter-ah a tweet hial a ni. A tak takah chuan bots (khawl) ni lovin, USA aṭang ni hek lovin, Mizorama Mizo ṭhalai tleirawl tê tête an ni reng si!

Assam Chief Minister-in he thil a han tweet phei chuan comment lamah conspiracy hrang hrang a chhuak nghal a. Chung zingah chuan, tun hnaiah Assam Chief Minister-in drugs tam tak a hal ral avangin drugs cartel/mafia te an inrawlh a ni ang tih te; Mizoram mi leh sa ni lo, USA aṭangin 3rd force a ruka inrawlh an awm a ni ang tih te; Chinese IT bots a nih ring pawl te, India ram ṭhendarh tumtute chetna a nih ring pawl te, kohhran an inrawlh a nih ring pawl te, K-Pop band ho an inrawlh a nih ring pawl te an awm bawk a, intelligent-te chet a ngai tiin an ngai thutak hle a ni. Kan Mizo K-Poppers-te erawh chuan fiamthu thawh nan an hmang zui a, hashtag hmang tho siin uangthuang tak takin an tweet-in an retweet a, kha zan zet kha zawng, online community-ah Mizote an tihlim tak zet mai.

Hei hi twitter lam ni ta se, heng kan tleirawl tê tête hi instagram lamah an che cute leh zual a! Hriat sual loh chuan, Mizo influencer pakhat Adeline Pachuau chuan instagram lamah ṭhahnemngai takin Mizo ṭhalaite chu Mizoram Chief Minister follow tura sawmna story (whatsapp-a status ang hi) a siam a. Hemi hnu hian heng K-Poppers te chu an han che leh ta tak tak a. An story-ah chuan Assam Chief Minister-in follower nuai 5 chuang zet a neih laia Mizoram Chief Minister-in follower sing tlemte chauh a neih thu te, kan CM-in follower nuai 1 tal a neih tlin theih nana ṭan la tura sawmna an siam ta sup sup mai a. Chumi zanah la la chuan Mizoram Chief Minister Instagram account follower chu a let thawka pungin, singthum chuangin follower an pun belh nghal a. He thu buatsaih lai (29/7/2021) hian CM instagram follower hi mi nuai 1 an tling tawh a, darkar 24 chhungin target an khum a ni.

Tun hmaa Chief Minister instagram post comment lama ṭawngkam mawi lo tak tak awm ṭhin chu a inlet ta thawk mai a. Comment-tu leh react/like-tu nasa taka pungin comment ṭhenkhat phei chu ‘i van che cute thei tak’ tih te, ‘duhawmpa!’ tih te, ‘fel zel ang che’ tih te, ‘i hmel pawh a ṭha leh tawh e, tunah rih chuan’ tih angreng te a ni hlawm! Tin, youtube lamah pawh N. Korea hotupa Kim Jong Un leh Chinese hotupa Xi Jinping hming anga account siam te awmin, Mizoram leh Chief Minister thlawpna thua an comment hmuh tur a awm nawk mai. Heng mite hian facebook lamah pawh nasa taka ṭan lain, Vairengte daia thil thleng chungchanga a ni lo zawnga sawina (negative comment) an hmuh chuan chilh rawn nek zelin, Mizote ṭanrual nan nasa takin tha an thawh a, pui tak an ni!

Instagram lama CM post thar ber phei chu comment 1000 dawn awm tawhin, like-tu pawh mi 25000 dawn an tling nghal a, CM post like-tu tam ber a rawn ni chiang hle. Hengte hian Chief Minister-ah phurna leh huaisenna nasa tak a thlenin a rinawm a, ramri buai chungchangah mipuite duh dana sorkar a kal tur thu Chief Minister-in a sawi ta zel a. Hetiang taka social media lama K-Pop fans-te ṭan lakna hi kan sorkar hotute pawhin an hmuh hmaih bik lo va, kan Minister pakhat Pu Robert Romawia Royte phei chuan IT leh Youth Affairs Minister a nihna angin, heng ṭhalai rualten social media hmanga ram hmangaihna an luanliampui dan chu ropui a tih thu leh chhuanawm a tihzia a tweet nghe nghe.

Sawi hmaih hauh loh tur chu, change.org lamah pawh mi ṭhahnemngai ṭhenkhatin ‘Urging NE states to unite against the Big Bully Assam CM Himanta Biswa’ tih petition siamin, darkar rei lo te chhungin mi 30000 chuangin petition an sign hman nia! Social media te, internet leh online community hi ngaihnep chi a lo ni hauh lo.

Heng aṭanga chiang taka thil lo lang chu, Mizo ṭhalaite hi hruaitu huaisen zui tur leh an tha tichak turin an inpeih reng a ni tih hi a ni. Mizo tleirawl rual tê têten ram tana eng emaw tal tih ve an duhna thinlung hi a ropui tak zet a, kan ram hruaitute pawh ram kaihhruaina kawngah te, ram venhimnaa kawngah te ṭhalaite tibeidawng lo tura hma an lak chhunzawm zel a ṭul hle a ni. Khamsamida!