Ramri chungchang

Kan tunlai boruakah hian ngaihdan leh rin dan post hmuh tur a tam hle a, kan ziak ve teh ang.

Ramri buai chung changah chuan kan ṭangrual vekin ka hria. Mahse tunah hian Assam CM hian, "Khai le buai reng ai chuan in duhna chinah ramri chu han kham teh u le, ka pawm vek ang" han ti ta phut mai sela, kan ngaihdan leh duhdan hi a hrang nuaihin ka ring.

Aizawla thil in ti hre deuh deuh, thu post vak vak ṭhin te pawh hian, a document ang chuan an hre viau mai thei, mahse a ground-ah hian chiang vak lo hi an awm nualin ka ring.

1933 Constitutional Boundary kalna pawh chiang lo, 1875 ang a Inner Line kalna pawh hre chiang chuang lo hi kan tamin ka ring.

Dholai bul Leihlawna Brig. T. Sailova'n Flag a zuk tar ringawt vang te khan khulai khu ramri emaw ti hi kan tam khawpin ka ring. Mahse, khulai khu eng record-ah mah hian ramri a ni tih ziak hi ka la hmu lo hrim hrim.

Tunah hian Google aṭangin emaw, Satelite aṭangin emaw Boundary Demarcation pawh an rawn ti thut thei a, chutah tak chuan kan duhna lai kha kan lo chian hmasak ve a pawimawh viau dawn a ni.

Entirnan: 1933 ang khan rawn rin ta se, hei hi chu ni loin, Mizoin kan delh chin tal hi chu min rin luh sak rawh u, te kan tih a la ngai dawn. A nih loh pawhin 1875 angin rawn rin ta phut se, vai MLA 5 vel leh vai MP hial te pawh kan neih a ngaih hmel si a, chu chu kan duh chiah ang em?

Heng zawng zawngah hi thu khat vua a kan lo awm hmasak kha a pawimawh dawn ta a ni. A nih loh chuan nakinah kan inpuhmawh leh ang a, tu tu te emaw thiam loh kan inchantir ang tih a hlauhawm thei tlat.